ଭୁବନେଶ୍ୱର : ଅହିଂସାକୁ ଭାରତୀୟ ସମ୍ବିଧାନର ମୁଖବନ୍ଧରେ ସ୍ଥାନିତ କରାଗଲେ ଜାତିର ପିତା ମହାତ୍ମା ଗାନ୍ଧିଙ୍କ ପ୍ରତି ତାଙ୍କର ୧୫୦ତମ ଜନ୍ମବାର୍ଷିକୀରେ ତାହା ସବୁଠୁ ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ।
ରାଷ୍ଟ୍ରପତି ଭବନରେ ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଅନୁଷ୍ଠିତ ମହାତ୍ମା ଗାନ୍ଧିଙ୍କ ୧୫୦ତମ ଜୟନ୍ତୀ ସମାରୋହ ଉପଲକ୍ଷେ ବୁଧବାର ଅନୁଷ୍ଠିତ ବୈଠକରେ ଯୋଗ ଦେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଏହି ମତ ଦେଇଛନ୍ତି । ମୁଖ୍ୟମନ୍ତ୍ରୀ କହିଛନ୍ତି ଯେ ମହାତ୍ମା ଗାନ୍ଧିଙ୍କ ଅହିଂସା ସମ୍ପର୍କିତ ସିଦ୍ଧାନ୍ତ ଅନୁସାରେ “ଦାରିଦ୍ର୍ୟ ଓ ସାମାଜିକ ଅନ୍ୟାୟ ହେଉଛି ସବୁଠାରୁ ବଡ଼ ହିଂସା ।” ସାରା ପୃଥିବୀର ଭବିଷ୍ୟତ ବଂଶଧରମାନେ ଏହି ନୀତିର ବାସ୍ତବ ସତ୍ୟକୁ ମନେରଖିପାରିବେ ଓ ହୃଦୟଙ୍ଗମ କରିପାରିବେ । ଦେଶରେ ଦାରିଦ୍ର୍ୟ ରହିଥିବା ପର୍ଯ୍ୟନ୍ତ ସ୍ୱାଧୀନତା ହେଉଛି କେବଳ ଏକ ଶୁଷ୍କ କାଷ୍ଠ ସଦୃଶ । ଯେକୌଣସି ସରକାର ପାଇଁ ଦାରିଦ୍ର୍ୟ ଦୂରୀକରଣ ହେଉଛି ସବୁଠୁ ବଡ଼ ଆହ୍ୱାନ । ଅହିଂସା ବିନା ଏହା ହାସଲ କରିହେବ ନାହିଁ । ସମ୍ବିଧାନର ମୁଖବନ୍ଧରେ ଥିବା ସିଦ୍ଧାନ୍ତଗୁଡ଼ିକ ସମ୍ପୂର୍ଣ୍ଣ ଭାବେ ପାଶ୍ଚାତ୍ୟ ଗଣତାନ୍ତ୍ରିକ ଚିନ୍ତାଧାରାରେ ହୋଇଥିବାବେଳେ ଅହିଂସା ହେଉଛି ଭାରତୀୟ ପରମ୍ପରା ଓ ଦର୍ଶନର ନିଚ୍ଛକ ପ୍ରତିଫଳନ । ତେଣୁ ଅହିଂସାକୁ ମୁଖବନ୍ଧରେ ସାମିଲ କରାଯିବା ଉଚିତ୍ । ବିକାଶ ପାଇଁ ଶାନ୍ତି ଆବଶ୍ୟକ । ଯେଉଁମାନେ ସମାଜକୁ ଜାତି,ଧର୍ମ ଓ ଶ୍ରେଣୀ ଆଦି ବିଭିନ୍ନ ଗୋଷ୍ଠୀ ନାଁରେ ଭାଗଭାଗ କରୁଛନ୍ତି, ବିକାଶ ମାଧ୍ୟମରେ ସେମାନଙ୍କୁ ପରାସ୍ତ କରିବାର ଆବଶ୍ୟକତା ରହିଛି ବୋଲି ଶ୍ରୀ ପଟ୍ଟନାୟକ ମତ ଦେଇଥିଲେ ।
