ଭୁବନେଶ୍ୱର : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଆସନ୍ତାକାଲି ପୂର୍ବାହ୍ନ ସାଢ଼େ ୧୧ଟା ସମୟରେ ମନ୍ତ୍ରିପରିଷଦ ବୈଠକ ଅନୁଷ୍ଠିତ ହେବ । ବୈଠକରେ ୨୦୧୪ ସାଧାରଣ ନିର୍ବାଚନରେ ବିଜେଡି ଦେଇଥିବା ପ୍ରତିଶ୍ରୁତିକୁ ପୂରଣ ଦିଗରେ ସରକାର ନେଇଥିବା ପଦକ୍ଷେପ ଓ ବାକି ରହିଥିବା କାର୍ଯ୍ୟ ସମ୍ପର୍କରେ ଆଲୋଚନା ହେବ । ମନ୍ତ୍ରିପରିଷଦ ବୈଠକରେ ଉପସ୍ଥିତ ରହିବା ପାଇଁ ସମସ୍ତ ମନ୍ତ୍ରୀଙ୍କୁ ସଂସଦୀୟ ବ୍ୟାପାର ପକ୍ଷରୁ ଅବଗତ କରାଯାଇଛି । ବୈଠକରେ ବିଶେଷକରି ଗତ ୪ବର୍ଷ ମଧ୍ୟରେ ନିର୍ବାଚନୀ ଇସ୍ତାହାର ଆଧାରରେ ନିଆଯାଇଥିବା ପଦକ୍ଷେପର ସମୀକ୍ଷା କରାଯିବ । ବାକି ରହିଥିବା ପ୍ରତିଶ୍ରୁତି ଯଥା-ନିଜସ୍ୱ ଖାଦ୍ୟ ଯୋଜନା, ରାଜ୍ୟର ପ୍ରତ୍ୟେକ ଜିଲ୍ଲାରେ ବୃହତ୍ ଶିଳ୍ପ ସ୍ଥାପନ, ବସ୍ତି ଥଇଥାନ ବୋର୍ଡ ଗଠନ, ମଡେଲ୍ ଗ୍ରାମ ପଞ୍ଚାୟତ ଓ ଗାଁ ପ୍ରତିଷ୍ଠା ଆଦି କାର୍ଯ୍ୟକୁ ଚଳିତବର୍ଷ ସୁଦ୍ଧା ସାରିବା ଉପରେ ଗୁରୁତ୍ୱ ଦିଆଯିବ । ସୂଚନାଯୋଗ୍ୟ ନବୀନ ପଟ୍ଟନାୟକଙ୍କ ନେତୃତ୍ୱରେ ଚତୁର୍ଥ ପାଳି ସରକାର ୨୦୧୪ ଏପ୍ରିଲ ୨୧ତାରିଖରେ ଶପଥ ଗ୍ରହଣ କରିବା ଦିନ ହିଁ ମନ୍ତ୍ରିପରିଷଦ ବୈଠକରେ ଦଳର ଇସ୍ତାହାରକୁ କାର୍ଯ୍ୟକାରୀ ନିମନ୍ତେ ଅନୁମୋଦନ କରାଇଥିଲେ ।
