ଭୁବନେଶ୍ୱର(ଓଡ଼ିଶା ୱେୟାର): ଝାଡ଼ଖଣ୍ଡ ସରକାରଙ୍କ ଦ୍ୱାରା ନିର୍ମାଣଧୀନ ଇଚ୍ଛା ଡ୍ୟାମ୍ ପ୍ରକଳ୍ପ କାର୍ଯ୍ୟ ଶୀଘ୍ର ସାରିବା ପାଇଁ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଫୋନ୍ ଯୋଗେ କଥା ହୋଇଛନ୍ତି । ଏହାସହିତ ଚିଠି ଲେଖି ସୁବର୍ଣ୍ଣରେଖା ବହୁମୁଖୀ ଜଳସେଚନ ପ୍ରକଳ୍ପର ଚାନ୍ଦିଲ ଡ୍ୟାମରେ ବନ୍ୟା ନିୟନ୍ତ୍ରଣ, ଇଚ୍ଛା ଡ୍ୟାମ୍ ନିର୍ମାଣ କାର୍ଯ୍ୟ ପାଇଁ ଓଡ଼ିଶା ସରକାର ଅଧିଗ୍ରହଣ କରିଥିବା ୫୧୬୯ଏକର ଜମି ସମ୍ପର୍କରେ ଚିଠି ଲେଖି ସୂଚନା ଦେଇଛନ୍ତି ।
ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଇଚ୍ଛା ଡ୍ୟାମ୍ ଓ ସୁବର୍ଣ୍ଣରେଖା ବହୁମୁଖୀ ପ୍ରକଳ୍ପର ଚାନ୍ଦିଲ ଡ୍ୟାମରେ ବନ୍ୟା ନିୟନ୍ତ୍ରଣ ନେଇ ଝାଡ଼ଖଣ୍ଡ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି । ତ୍ରିପାକ୍ଷିକ ଚୁକ୍ତି ଅନୁସାରେ ସହଯୋଗ କରିଥିବାରୁ ଧନ୍ୟବାଦ ଜଣାଇବା ସହ ଝାଡ଼ଖଣ୍ଡ ସରକାରଙ୍କୁ ଓଡ଼ିଶା ନିଜର ଅଂଶଧନ ବାବଦ ୧୦୨୭କୋଟି ଟଙ୍କା ଦେଇଥିବା ସୂଚନା ଅବଗତ କରିଛନ୍ତି । ନିର୍ମାଣାଧୀନ ଇଚ୍ଛା ଡ୍ୟାମ୍ କାର୍ଯ୍ୟ ଶୀଘ୍ର ସରିଲେ ଓଡ଼ିଶାରର ଜଳସେଚନ, ବନ୍ୟା ପରିଚାଳନା ଓ କୃଷି କ୍ଷେତ୍ର ଉପକୃତ ହେବ ବୋଲି ନବୀନ କହିଛନ୍ତି । ଶ୍ରୀ ପଟ୍ଟନାୟକ ମଧ୍ୟ ଟେଲିଫୋନ୍ ଯୋଗେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ଶ୍ରୀ ସୋରେନଙ୍କ ସହ ଆଲୋଚନା କରି ଦୁଇ ରାଜ୍ୟର ବରିଷ୍ଠ ପଦାଧିକାରୀମାନଙ୍କ ମଧ୍ୟରେ ଭିଡିଓ କନଫରେନ୍ସିଂ ମାଧ୍ୟମରେ ଆଲୋଚନା ପାଇଁ ପ୍ରସ୍ତାବ ଦେଇଛନ୍ତି । ଇଚ୍ଛା ଡ୍ୟାମ ସମ୍ପୂର୍ଣ୍ଣ ହେବାପରେ ଓଡ଼ିଶାର ସୁବର୍ଣ୍ଣରେଖା ପ୍ରକଳ୍ପ ପୂର୍ଣ୍ଣ କ୍ଷମତାରେ କାର୍ଯ୍ୟ କରିବ ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଚିଠିରେ ଉଲ୍ଲେଖ କରିଛନ୍ତି । ଉଭୟ ରାଜ୍ୟକୁ ଲାଭ ଦେଉଥିବା ଡ୍ୟାମର କାର୍ଯ୍ୟ ଶୀଘ୍ର ସାରିବା ପାଇଁ ସେ ଝାଡ଼ଖଣ୍ଡ ମୁଖ୍ୟମନ୍ତ୍ରୀଙ୍କ ସହଯୋଗ କାମନା କରିଥିବା ଜଣାପଡ଼ିଛି ।
