ଭୁବନେଶ୍ୱର(ଓଡ଼ିଶା ୱେୟାର): ଆସନ୍ତାକାଲିଠୁ ବିଧାନସଭାର ବଜେଟ୍ ଅଧିବେଶନ ଆରମ୍ଭ ହେଉଥିବାବେଳେ ଆଜି ସର୍ବଦଳୀୟ ବୈଠକ ଅନୁଷ୍ଠିତ ହୋଇଛି । କୋଭିଡ୍ କଟକଣା ଥିଲେ ମଧ୍ୟ ଏଥର ଗୃହରେ ପ୍ରଶ୍ନକାଳ, ଶୂନ୍ୟକାଳ ଓ ମୁଲତବୀ ଆଲୋଚନା ପାଇଁ ସମୟ ଧାର୍ଯ୍ୟ ହୋଇଛି । ଏଥର ବିଧାନସଭାର ଅଧିବେଶନ ନିୟମିତ ଦିନରେ ୫ଘଣ୍ଟା ଓ ବିଶେଷଦିନ ଗୁଡ଼ିକରେ ୬ଘଣ୍ଟା ଚାଲିବା ପାଇଁ ନିଷ୍ପତ୍ତି ହୋଇଛି ।
ଆଜି ବାଚସ୍ପତି ସୂର୍ଯ୍ୟନାରାୟଣ ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ସର୍ବଦଳୀୟ ବୈଠକ ପରେ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ବିଧାନସଭାର ଅଧିବେଶନ ଚଳିତଥର ୫ଘଣ୍ଟା ଚାଲିବା ପାଇଁ ସର୍ବଦଳୀୟ ବୈଠକରେ ନିଷ୍ପତ୍ତି ହୋଇଛି । ଅଧିବେଶନରେ ଚଳିତଥର ପ୍ରଶ୍ନକାଳ ଓ ଶୂନ୍ୟ କାଳ ଏକ ଘଣ୍ଟା ଲେଖାଏଁ ଚାଲିବ । ମୁଲତବୀ ଆଲୋଚନା ଦେଢ଼ଘଣ୍ଟା ହେବ । ଯେଉଁଦିନ କିଛି ସ୍ୱତନ୍ତ୍ର ଦିନ ଥିବ ସେଦିନ ଗୃହର କାର୍ଯ୍ୟ ଏକ ଘଣ୍ଟା ଅଧିକ ଚାଲିବ । ଅନ୍ୟ ସମସ୍ତ ଦିନ ଗୃହ କାର୍ଯ୍ୟ ପ୍ରଥମାର୍ଦ୍ଧରେ ସାଢ଼େ ୧୦ଟାରୁ ସାଢ଼େ ୧ଟା ପର୍ଯ୍ୟନ୍ତ ଓ ଦ୍ୱିତୀୟାର୍ଦ୍ଧରେ ୪ଟା ୬ଟାରୁ ପର୍ଯ୍ୟନ୍ତ ଚାଲିବ । ପୂର୍ବରୁ ଦ୍ୱିତୀୟାର୍ଦ୍ଧରେ ଗୃହ ୩ରୁ ୫ଟା ପର୍ଯ୍ୟନ୍ତ ଚାଲୁଥିଲା । ଚଳିତଥର ବିଧାନସଭା ଅଧିବେଶନର ସମସ୍ତ ତଥ୍ୟ ‘ନେଭା’ ଆପ୍ ମାଧ୍ୟମରେ ଉପଲବ୍ଧ ହେବ ବୋଲି ଶ୍ରୀ ପାତ୍ର କହିଛନ୍ତି ।
ସୂଚନାଯୋଗ୍ୟ, ଆସନ୍ତାକାଲିଠୁ ବିଧାନସଭାର ବଜେଟ୍ ଅଧିବେଶନ ଆରମ୍ଭ ହେବ । ପ୍ରଥମଦିନରେ ରାଜ୍ୟପାଳ ପ୍ରଫେସର ଗଣେଶୀଲାଲ ନିଜର ଅଭିଭାଷଣ ରଖିବେ । ଫେବୃୟାରୀ ୨୨ତାରିଖରେ ୨୦୨୧-୨୨ ଆର୍ଥିକ ବର୍ଷର ରାଜ୍ୟ ବଜେଟ୍ ଉପସ୍ଥାପନ ହେବାକୁ ଥିବାବେଳେ ପ୍ରଥମ ପର୍ଯ୍ୟାୟ ଅଧିବେଶନ ଏପ୍ରିଲ ୯ତାରିଖ ପର୍ଯ୍ୟନ୍ତ ଚାଲିବ ।
