ଭୁବନେଶ୍ୱର : ଗ୍ରାମ ରୋଜଗାର ସେବକଙ୍କ ମାସିକ ଦରମା ୫ହଜାର ଟଙ୍କାରୁ ୭ହଜାର ଟଙ୍କାକୁ ବୃଦ୍ଧି ପାଇଁ ରାଜ୍ୟ ସରକାର ନିଷ୍ପତି ନେଇଛନ୍ତି । ଏହା ସହିତ ସେମାନଙ୍କୁ ଅନ୍ୟାନ୍ୟ ଆର୍ଥିକ ପ୍ରୋତ୍ସାହନ ବାବଦରେ ପ୍ରତିମାସରେ ଅତିରିକ୍ତ ୧୫୦୦ଟଙ୍କା ଦିଆଯିବ ବୋଲି ପଂଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି । ଦରମା ବୃଦ୍ଧି ଓ ସ୍ଥାୟୀ ଚାକିରି ଦାବିରେ ଗତକାଲି ଭୁବନେଶ୍ୱର ପିଏମ୍ଜି ଛକରେ ଆନ୍ଦୋଳନ କରୁଥିବା ଗ୍ରାମ ରୋଜଗାର ସେବକଙ୍କ ଉପରେ ପୁଲିସ୍ ଲାଠି ମାଡ଼ କରିଥିଲା । ଆଜି ଗ୍ରାମ ରୋଜଗାର ସେବକଙ୍କ ଆନ୍ଦୋଳନକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସମର୍ଥନ ଜଣାଇବା ସହ ଲାଠିମାଡ଼କୁ ନିନ୍ଦା କରିଥିଲେ । ସେମାନଙ୍କ ଦାବି ପ୍ରସଙ୍ଗରେ ସିଏ ନିଜେ ରାଜ୍ୟ ପଂଚାୟତିରାଜ ମନ୍ତ୍ରୀ ଓ ସଚିବଙ୍କ ସହ କଥା ହେବେ ଏବଂ ଏ ସମ୍ପର୍କରେ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିବେ ବୋଲି ପ୍ରତିଶ୍ରୁତି ଦେଇଥିଲେ । ଏହାପରେ ସାମ୍ବାଦିକଙ୍କୁ ପ୍ରତିକ୍ରିୟା ଦେଇ ପଂଚାୟିତରାଜ ମନ୍ତ୍ରୀ ଶ୍ରୀ ମହାରଥୀ କହିଛନ୍ତି ଯେ ଗ୍ରାମ ରୋଜଗାର ସେବକଙ୍କ ଦରମା ପୂର୍ବରୁ ୩ହଜାର ଟଙ୍କା ଥିଲା । ସେମାନଙ୍କର ଦରମା ୫ହଜାର ଟଙ୍କାକୁ ବୃଦ୍ଧି କରାଯାଇଛି । ଏବେ ଆଉ ୨ହଜାର ଟଙ୍କା ବଢ଼ାଇବାକୁ ସରକାର ରାଜି ଅଛନ୍ତି । ଦରମାକୁ ଛାଡ଼ିଲେ ସେମାନଙ୍କୁ ପ୍ରତିମାସରେ ଅତିରିକ୍ତ ପ୍ରାୟ ୧୫୦୦ଟଙ୍କା ଆର୍ଥିକ ପ୍ରୋତ୍ସାହନ ମଧ୍ୟ ସରକାର ଯୋଗାଇ ଦେବେ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ଗ୍ରାମ ରୋଜଗାର ସେବକଙ୍କୁ ଆନ୍ଦୋଳନ ପାଇଁ ଉସ୍କାଉଛନ୍ତି । ସେମାନଙ୍କ ଚାକିରିକୁ ସ୍ଥାୟୀ କରିବା ପାଇଁ ସିଏ କେନ୍ଦ୍ର ସରକାରଙ୍କୁ କୁହନ୍ତୁ । ମୋତେ ଡାକିଲେ ମୁଁ ଦିଲ୍ଲୀ ଯାଇ ଆଲୋଚନା କରିବାକୁ ପ୍ରସ୍ତୁତ ଅଛି ବୋଲି ଶ୍ରୀ ମହାରଥୀ କହିଛନ୍ତି ।
