ଭୁବନେଶ୍ୱର : ବିଜୁ ପକ୍କାଘର ଓ ପ୍ରଧାନମନ୍ତ୍ରୀ ଆବାସ ଯୋଜନାରେ ପାଣ୍ଠି ନେଇ ଗୃହ ନିର୍ମାଣ କରିନଥିବା ହିତାଧିକାରୀଙ୍କଠୁ ଅର୍ଥ ଫେରସ୍ତ ଆଣିବା ଓ ସେମାନଙ୍କୁ ଏହି ଯୋଜନାରେ ସାମିଲ ବୋଲି ଦର୍ଶାଇବାକୁ ବିଧାନସଭା ଷ୍ଟାଣ୍ଡିଂ କମିଟି ରାଜ୍ୟ ସରକାରଙ୍କୁ ସୁପାରିସ୍ କରିଛି । ପଞ୍ଚାୟତିରାଜ ଓ ପାନୀୟ ଜଳ ବିଭାଗର ଷ୍ଟାଣ୍ଡିଂ କମିଟି ତାଙ୍କ ରିପୋର୍ଟରେ ପ୍ରତ୍ୟେକ ନିର୍ବାଚନମଣ୍ଡଳୀକୁ ସ୍ୱତନ୍ତ୍ର ବିଜୁ ପକ୍କାଘର ସଂଖ୍ୟାକୁ ୧୦୦ରୁ ୩୦୦କୁ ବୃଦ୍ଧି, ୨୦୧୯ ସୁଦ୍ଧା ସବୁ ଗାଁକୁ ପାଇପ୍ ଯୋଗେ ପାନୀୟ ଜଳ ଯୋଗାଣ, ଆମ ଗାଁ ଆମ ବିକାଶ ଯୋଜନାରେ ବିଭିନ୍ନ ପ୍ରକଳ୍ପ କାର୍ଯ୍ୟକାରିତାରେ ବିଧାୟକମାନଙ୍କ ପରାମର୍ଶ ନେବାକୁ ସରପଞ୍ଚଙ୍କୁ ଅବଗତ କରାଇବାକୁ ସୁପାରିସ୍ କରିଛନ୍ତି । ଏହାସହିତ କମିଟି କହିଛନ୍ତି ଯେ ଘର ନିର୍ମାଣ ପାଇଁ ବହୁ ହିତାଧିକାରୀ ବିଜୁ ପକ୍କାଘର,ପ୍ରଧାନମନ୍ତ୍ରୀ ଆବାସ ଯୋଜନାରେ ଟଙ୍କା ନେଇଛନ୍ତି । କିନ୍ତୁ ସେମାନେ ଘର ନିର୍ମାଣ କରିନାହାନ୍ତି । ସେଭଳି ହିତାଧିକାରୀଙ୍କୁ ଚିହ୍ନଟ କରି ସେମାନଙ୍କଠୁ ଟଙ୍କା ଫେରସ୍ତ ସହ ସେମାନଙ୍କୁ ଗୃହ ନିର୍ମାଣ ସରିଥିବା ହିତାଧିକାରୀ ଭାବେ ବିବେଚନା କରିବାକୁ କମିଟି ପରାମର୍ଶ ଦେଇଛନ୍ତି । ବିଧବା, ବାର୍ଦ୍ଧକ୍ୟ ଓ ଭିନ୍ନକ୍ଷମ ଭତ୍ତା ନେଉଥିବା ହିତାଧିକାରୀଙ୍କୁ ଖରାଦିନେ ୨୦୦ଟଙ୍କା ଓ ଶୀତଦିନେ ୧୦୦ଟଙ୍କା ଅଧିକ ଭତ୍ତା ଦେବାକୁ କମିଟି ସୁପାରିସ୍ କରିଛନ୍ତି ।
ସେହିପରି କୃଷି ଓ କୃଷକ ସଶକ୍ତିକରଣ ବିଭାଗ ଷ୍ଟାଣ୍ଡିଂ କମିଟି ରିପୋର୍ଟରେ ସଦସ୍ୟମାନେ ବିଜୁ କୃଷକ କଲ୍ୟାଣ ଯୋଜନାରେ ନିର୍ଦ୍ଧାରିତ କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ପଞ୍ଜିକୃତ କରାଯାଇ ନଥିବାରୁ ଉଦ୍ବେଗ ପ୍ରକାଶ କରିଛନ୍ତି । ୨୦୧୨-୧୩ରେ ରାଜ୍ୟର ୬୦ଲକ୍ଷ ୨୭ହଜାର ୪୪୦ଜଣ କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ପଞ୍ଜିକରଣର ଟାର୍ଗେଟ୍ ରଖାଯାଇଥିବାବେଳେ ଆଜି ସୁଦ୍ଧା ମାତ୍ର ୫୭ଲକ୍ଷ ୬୪ହଜାର ୩୫୯ଜଣ ଚାଷୀ ପଞ୍ଜିକୃତ ହୋଇଛନ୍ତି । ୨୦୧୮-୧୯ ମସିହାରେ ବାକି ଥିବା ଚାଷୀଙ୍କୁ ତୁରନ୍ତ ବିଜୁ କୃଷକ କଲ୍ୟାଣ ଯୋଜନାରେ ପଞ୍ଜିକୃତ କରିବାକୁ କମିଟି ସୁପାରିସ୍ କରିଛନ୍ତି । ଚାଷୀଙ୍କୁ ସ୍ଥାନୀୟ ଅଞ୍ଚଳରେ ଉତ୍ତମ ଦରରେ ପନିପରିବା ଓ ଫଳ ବିକ୍ରି କରିବା ପାଇଁ ଆବଶ୍ୟକ ବଜାର ଭିତ୍ତିଭୂମି ସରକାର ଯୋଗାଇ ଦେବାକୁ ପରାମର୍ଶ ଦେଇଛନ୍ତି । ସେହିପରି ଏବେ ଜଳନିଧି(ବ୍ୟକ୍ତିଗତ) କାର୍ଯ୍ୟକ୍ରମରେ ସାଧାରଣ ବର୍ଗର ଚାଷୀଙ୍କୁ ୨୦ହଜାର ଟଙ୍କା ଓ ବିପିଏଲ ବର୍ଗର ଅନୁସୂଚିତ ଜାତି ଓ ଜନଜାତି ବର୍ଗର ଚାଷୀଙ୍କୁ ୧୦ହଜାର ଟଙ୍କା ଦେବାକୁ ପଡ଼ୁଥିଲା । ତେବେ ଅଧିକ ଅର୍ଥ ଯୋଗୁ କାର୍ଯ୍ୟକ୍ରମର ଫାଇଦା ଗରିବ ଚାଷୀ ଉଠାଇପାରୁନଥିବାରୁ ସାଧାରଣ ବର୍ଗର ଚାଷୀଙ୍କ ପାଇଁ ୧୦ହଜାର ଟଙ୍କା ଓ ଅନୁସୂଚିତଜାତି/ଜନଜାତି ବର୍ଗଙ୍କ ପାଇଁ ୫ହଜାର ଟଙ୍କାର ଅଂଶଧନ ବ୍ୟବସ୍ଥା କରିବାକୁ କମିଟି ସୁପାରିସ୍ କରିଛନ୍ତି । ଚାଷୀମାନେ ନିଜ ଅଞ୍ଚଳରେ ବିହନ ଓ ସାର ପାଉନଥିବାରୁ କମିଟି ଉଦ୍ବେଗ ପ୍ରକାଶ କରିଛନ୍ତି ।
