ଭୁବନେଶ୍ୱର(ଓଡ଼ିଶା ୱେୟାର): ଆଜି ଆକାଶରେ ଜହ୍ନ(ଚନ୍ଦ୍ର)ରେ ଏକ ବଳୟ ଦେଖିବାକୁ ମିଳିଛି । ଯାହାକୁ ନେଇ ଲୋକଙ୍କ ମଧ୍ୟରେ ଉତ୍ସାହ ଓ ଦ୍ୱନ୍ଦ୍ୱ ଦେଖାଦେଇଛି । ରାଜ୍ୟର ବିଭିନ୍ନ ଅଂଚଳର ଲୋକେ ଜହ୍ନରେ ଏହି ବଳୟ ଦେଖିଥିବାବେଳେ ଏହା ଏକ ସାଧାରଣ ଜାଗତିକ ଘଟଣା ବୋଲି ବୈଜ୍ଞାନିକମାନେ ମତବ୍ୟକ୍ତ କରିଛନ୍ତି ।
ସୂଚନା ଅନୁସାରେ, ଆଜି ରାତି ପ୍ରାୟ ୮ଟା ପରଠୁ ରାଜଧାନୀ ଆକାଶରେ ଜହ୍ନରେ ଏକ ଗୋଲାକାର ବଳୟ ଦେଖିବାକୁ ମିଳିଥିଲା । କେବଳ ରାଜଧାନୀ ନୁହେଁ ଉପକୂଳ ଓଡ଼ିଶାର ଅନ୍ୟ କେତେକ ଜିଲ୍ଲାର ଲୋକମାନେ ମଧ୍ୟ ଜହ୍ନରେ ଏଭଳି ବଳୟ ଦେଖିଛନ୍ତି । ଆକାଶରେ ବର୍ଷା ଓ ବାଦଲ ଥିବାରୁ ଅନେକ ଅଂଚଳରେ ମଧ୍ୟ ଏହା ଦୃଶ୍ୟମାନ ହୋଇପାରିନି । ତେବେ ଏହାକୁ ନେଇ ଲୋକଙ୍କ ମନରେ ଉତ୍ସାହ ବୃଦ୍ଧି ପାଇଥିବାବେଳେ ବୈଜ୍ଞାନିକମାନେ ସୂର୍ଯ୍ୟ ଓ ଚନ୍ଦ୍ରରେ ଏଭଳି ‘ବଳୟ’ ପୂର୍ବରୁ ଅନେକଥର ଦେଖାଦେଇଛି ବୋଲି ମତ ଦେଇଛନ୍ତି । ବୈଜ୍ଞାନିକଙ୍କ ମତରେ ଏହାକୁ ‘୨୨ଂ ହାଲୋ ବା ୨୨ ଡିଗ୍ରୀ ପ୍ରଭାମଣ୍ଡଳ’ କୁହାଯାଏ ।
୨୦୧୨ ମସିହାରେ ଆମେରିକାରେ ବାତ୍ୟା ‘ସ୍ୟାଣ୍ଡି’ ଲ୍ୟାଣ୍ଡଫଲ୍ କରିବା ପୂର୍ବ ରାତ୍ରିରେ ଏଭଳି ବଳୟ ଚନ୍ଦ୍ରରେ ଦେଖିବାକୁ ମିଳିଥିଲା । ଏହାବ୍ୟତୀତ ପୃଥିବୀର ବିଭିନ୍ନ ସ୍ଥାନରେ ବିଭିନ୍ନ ସମୟରେ ଚନ୍ଦ୍ର ଓ ସୂର୍ଯ୍ୟରେ ଏଭଳି ବଳୟ ଦେଖାଯାଇଥାଏ ।
ସମ୍ଭବତଃ ସାମୁଦ୍ରିକ ଝଡ଼ ‘ନିଭାର’ ଆଜି ମଧ୍ୟରାତ୍ରିରେ ତାମିଲନାଡୁ ଓ ପୁଡୁଚେରୀ ମଧ୍ୟରେ ଉପକୂଳରେ ଲ୍ୟାଣ୍ଡଫଲ୍ କରିବାର ସମ୍ଭାବନା ଥିବାରୁ ତା’ର ପ୍ରଭାବରେ ଚନ୍ଦ୍ରରେ ଏଭଳି ବଳୟ ଦେଖାଦେଇ ପାରିଥାଏ ବୋଲି ପାଣିପାଗ ବିଶେଷଜ୍ଞଙ୍କଠୁ ସୂଚନା ମିଳିଛି ।
