ଭୁବନେଶ୍ୱର : ବିଜେପି ନେତ୍ରୀ ଡଃ ଲେଖାଶ୍ରୀ ସାମନ୍ତସିଂହାରଙ୍କ ପ୍ରତି ‘ସ୍ୱାମୀ ଛାଡ଼ି ଅଙ୍ଗନୱାଡି’ ବୋଲି ମନ୍ତବ୍ୟ ଦେଇ ବିବାଦୀୟ ହୋଇଥିବା ବରିଷ୍ଠ ମନ୍ତ୍ରୀ ତଥା ବିଜେଡି ଉପସଭାପତି ଡାକ୍ତର ଦାମୋଦର ରାଉତଙ୍କ ପାଇଁ ଅଡ଼ୁଆ ବଢ଼ିଛି । ୩ଜଣ ମନ୍ତ୍ରୀ ସୂର୍ଯ୍ୟନାରାୟଣ ପାତ୍ର, ମହେଶ୍ୱର ମହାନ୍ତି ଓ ଅନନ୍ତ ଦାସ ଆଜି ଦାମଙ୍କ ମନ୍ତବ୍ୟକୁ ନାପସନ୍ଦ କରିଥିବାବେଳେ ଆଜି ରାଜ୍ୟ ସରକାର ତାଙ୍କର ସୁରକ୍ଷା ବୃଦ୍ଧି କରିଛନ୍ତି । ଶିଶୁଭବନ ଛକଠୁ କ୍ୟାପିଟାଲ ହସ୍ପିଟାଲ ଛକ ପର୍ଯ୍ୟନ୍ତ ପୁଲିସ୍ ଛାଉଣି ହୋଇଥିବବେଳେ ତାଙ୍କ ସରକାରୀ ବାସଭବନରେ ପୁଲିସ୍ ମୁତୟନ ହୋଇଛନ୍ତି । ସେପଟେ ଲେଖାଶ୍ରୀ ଆଜି ପୁଣିଥରେ ଏକ ସାମ୍ବାଦିକ ସମ୍ମିଳନୀ କରି ଡାକ୍ତର ରାଉତଙ୍କୁ କଡ଼ା ସମାଲୋଚନା କରିଛନ୍ତି । ମହିଳାଙ୍କୁ ଦାମ ଖରାପ ଦୃଷ୍ଟିରେ ଦେଖନ୍ତି ବୋଲି ଅଭିଯୋଗ କରିଛନ୍ତି । ଦାମ ବିନା ସର୍ତରେ କ୍ଷମା ନମାଗିଲେ ତାଙ୍କ ବିରୋଧରେ ରାଜ୍ୟବ୍ୟାପୀ ଆନ୍ଦୋଳନ କରାଯିବ ବୋଲି ବିଜେପି ଧମକ ଦେଇଛି । ଯାଜପୁର ଜିଲ୍ଲା ବିଞ୍ଝାରପୁର ନିର୍ବାଚନମଣ୍ଡଳୀରେ ଏକ ଜନସମ୍ପର୍କ ଯାତ୍ରାରେ ଲେଖାଶ୍ରୀଙ୍କ ପ୍ରତି ଦାମ ଦେଇଥିବା ମନ୍ତବ୍ୟ ‘ସ୍ୱାମୀ ଛାଡ଼ି ଅଙ୍ଗନୱାଡି’କୁ ଆଜି ବିଜେଡି ବରିଷ୍ଠ ଉପସଭାପତି ସୂର୍ଯ୍ୟନାରାୟଣ ପାତ୍ର ନାପସନ୍ଦ କରିଛନ୍ତି । ଶ୍ରୀ ପାତ୍ର କହିଛନ୍ତି ଯେ ‘ଦାମବାବୁଙ୍କର ଏଭଳି କହିବା ଠିକ୍ ହୋଇନି, ଏହା ଦୁର୍ଭାଗ୍ୟଜନକ । ପ୍ରତ୍ୟେକ ଲୋକଙ୍କ ପାଇଁ ଲକ୍ଷ୍ମଣରେଖା ରହିବା ଉଚିତ୍ । ରାଜନେତାଙ୍କ ପାଇଁ ମଧ୍ୟ ଲକ୍ଷ୍ମଣରେଖା ରହିବା ଉଚିତ୍’ । ସେହିପରି ମନ୍ତ୍ରୀ ମହେଶ୍ୱର ମହାନ୍ତି କହିଛନ୍ତି ଯେ ‘ଦାମବାବୁ ଜଣେ ପୋଖତ ନେତା । ସେ ଏଭଳି କହିବା ଉଚିତ୍ ନଥିଲା । କେଉଁ ପରିପ୍ରେକ୍ଷୀରେ ଏଭଳି କହିଛନ୍ତି ତାହା ସେ ଜାଣନ୍ତି ନାହିଁ ।’ ମନ୍ତ୍ରୀ ଅନନ୍ତ ଦାସ ମଧ୍ୟ ଦାମଙ୍କ ମନ୍ତବ୍ୟକୁ ନାପସନ୍ଦ କରି କହିଛନ୍ତି ଯେ ‘ପ୍ରତ୍ୟେକ ବ୍ୟକ୍ତି କଥାବାର୍ତାରେ ଶାଳୀନତା ରଖିବା ଉଚିତ୍ । ଦାମବାବୁ ଯାହା କୁହନ୍ତି ତା’ର ବିଭିନ୍ନ ଅର୍ଥ ଥାଏ । ଯଦି ସେ ଏଭଳି କହିଥାନ୍ତି ତାହା କହିବା ତାଙ୍କର ଠିକ୍ ହୋଇନି’ । ଅନ୍ୟପକ୍ଷରେ ସୂର୍ଯ୍ୟଙ୍କ ମନ୍ତବ୍ୟ ଉପରେ କଟାକ୍ଷ କରି ଡାକ୍ତର ରାଉତ କହିଛନ୍ତି ଯେ “ସୂର୍ଯ୍ୟ ରାମରେଖା ଭିତରେ ରୁହନ୍ତୁ । ଯେତେବେଳେ ନବୀନଙ୍କୁ ଧୃତରାଷ୍ଟ୍ର ଓ ତାଙ୍କୁ ଶିଖଣ୍ଡି କୁହାଯାଉଥିଲା ସେତେବେଳେ ସୂର୍ଯ୍ୟ କେଉଁଠି ଶୋଇଥିଲେ?” ଅନ୍ୟପକ୍ଷରେ ଆଜି ପ୍ରେସ୍ ମିଟ୍ କରି ଲେଖାଶ୍ରୀ କହିଛନ୍ତି ଯେ “ଯେଉଁ ମହିଳାମାନେ ଭଲ କାର୍ଯ୍ୟ କରୁଛନ୍ତି ତାଙ୍କୁ ଖରାପ ଦୃଷ୍ଟିରେ ଦେଖାଯାଉଛି । ମାଆମାନଙ୍କୁ ଦାମବାବୁ ଖରାପ ଦୃଷ୍ଟିରେ ଦେଖୁଛନ୍ତି । ମୁଖିଆ ତାଙ୍କୁ ଢାଲ ଭଳି ବ୍ୟବହାର କରୁଛନ୍ତି । ଦାମବାବୁଙ୍କ ମନ୍ତବ୍ୟରୁ ତାଙ୍କର ମା’ମାନଙ୍କ ପ୍ରତି ସମ୍ମାନ ଜଣାପଡ଼ିଯାଉଛି ।” ସୂଚନାଯୋଗ୍ୟ ଗତକାଲି ବିଜେପି ମହିଳା ମୋର୍ଚ୍ଚା ପକ୍ଷରୁ ଡାକ୍ତର ରାଉତଙ୍କ ମନ୍ତବ୍ୟକୁ ନିନ୍ଦା କରାଯିବା ସହ କ୍ଷମା ନମାଗିଲେ ରାଜ୍ୟବ୍ୟାପୀ ଆନ୍ଦୋଳନ କରାଯିବ ବୋଲି ଧମକ ଦିଆଯିବା ପରେ ଆଜି ତାଙ୍କ ସରକାରୀ ବାସଭବନରେ ସୁରକ୍ଷା ବୃଦ୍ଧି କରାଯାଇଛି ।
