ଭୁବନେଶ୍ୱର(ଓଡ଼ିଶା ୱେୟାର): ଉଜ୍ଜ୍ୱଳା ଯୋଜନା ଦୁର୍ନୀତିରେ ବୁଡ଼ି ରହିଛି ଓ ଏହି ଦୁର୍ନୀତିରୁ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସିଧାସଳଖ ଅର୍ଥ ସଂଗ୍ରହ କରୁଛନ୍ତି ବୋଲି ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା କହିଛନ୍ତି ।
ଆଜି ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇ ମନ୍ତ୍ରୀ ଶ୍ରୀ ଜେନା କହିଛନ୍ତି ଯେ ରାଜନଗରରେ ଘଟିଥିବା ଉଜ୍ଜ୍ୱଳା ମହାଦୁର୍ନୀତି ଭାତ ହାଣ୍ଡିରୁ ଗୋଟିଏ । ଭୂତ ହିତାଧିକାରୀଙ୍କ ନାମରେ ଟାଙ୍କି ଉଠାଯାଇଛି । ହିତାଧିକାରୀଙ୍କ ଅଜାଣତରେ ବି ଟାଙ୍କି ଉଠିଛି । ସମଗ୍ର ଓଡ଼ିଶାରେ ଏପରି ଦୁର୍ନୀତି କରାଯାଇ କୋଟି କୋଟି ଟଙ୍କା ନିର୍ବାଚନୀ ଚାନ୍ଦା ଉଠାଇଛନ୍ତି ଧର୍ମେନ୍ଦ୍ର ପ୍ରଧାନ । ଦୁର୍ନୀତିର ଏହି ପୋଷ୍ଟର ବୟ ଏବେ ପେଟ୍ରୋଲ ଟାଙ୍କି, ଗ୍ୟାସ୍ ଏଜେନ୍ସି ଏବଂ ତାଙ୍କ ଅଧୀନରେ ଥିବା ସଂସ୍ଥାଗୁଡିକୁ ପାଣ୍ଠି ଯୋଗାଣକାରୀ ଦୁଧିଆଳି ଗାଈ ଭଳି ବ୍ୟବହାର କରୁଛନ୍ତି । ବିଜେପୁର ଉପନିର୍ବାଚନରେ ଗୋଟିଏ ପେଟ୍ରୋଲ ଟାଙ୍କିରୁ ୪୬ଲକ୍ଷ ଟଙ୍କା ଜବତ ହେବା, ଧର୍ମେନ୍ଦ୍ରଙ୍କ ଦୁର୍ନୀତିର ଢଙ୍ଗକୁ ସୂଚାଉଛି । ନିର୍ବାଚନ ମଣ୍ଡଳୀ ନଥିବା ଏହି ନେତାଙ୍କ କାର୍ଯ୍ୟକଳାପକୁ ଲୋକ ଖୋଲାଖୋଲି ପ୍ରଶ୍ନ କରିବା ଆରମ୍ଭ କଲେଣି ବୋଲି ବରିଷ୍ଠ ବିଜେଡି ନେତା ଶ୍ରୀ ଜେନା କହିଛନ୍ତି ।
