ଭୁବନେଶ୍ୱର(ଓଡ଼ିଶା ୱେୟାର):କଂଗ୍ରେସ ବିଧାୟକ ପ୍ରକାଶ ବେହେରା ବିଜେଡିରେ ସାମିଲ ହେବାକୁ ନେଇ ଚାଲିଥିବା ଚର୍ଚ୍ଚା ଥମିବାର ନାଁ ଧରୁନି। ଗତ ୨୯ତାରିଖରେ ଦଳୀୟ ଚିହ୍ନ ଓ ପୋଷ୍ଟର ବିନା ସାଲେପୁରରେ ଶକ୍ତି ପ୍ରଦର୍ଶନ କରିଥିବା ଶ୍ରୀ ବେହେରାଙ୍କ ପୋଷ୍ଟର ଏବେ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଦେଖିବାକୁ ମିଳିଛି । ତାଙ୍କ ସାଲେପୁର ନିର୍ବାଚନମଣ୍ଡଳୀରେ ଆୟୋଜିତ ‘ପିଠା’ କାର୍ଯ୍ୟକ୍ରମରେ ଏକ ବିଶାଳ ପୋଷ୍ଟରରେ ନବୀନଙ୍କ ସହ ତାଙ୍କର ଫଟୋ ଲଗାଯିବା ପରେ ଏବେ ଶ୍ରୀ ବେହେରାଙ୍କ ଅସଲ ଉଦ୍ଦେଶ୍ୟ ପଦାରେ ପଡ଼ିଛି ।
ସୂଚନା ଅନୁସାରେ ସାଲେପୁର ବ୍ଲକରେ ପିଠା କାର୍ଯ୍ୟକ୍ରମ ପାଇଁ ନବୀନଙ୍କ ସହ ବିଧାୟକ ଶ୍ରୀ ବେହେରାଙ୍କ ପୋଷ୍ଟର ଲାଗିଛି । କଂଗ୍ରେସ ଦଳ ଏହି କାର୍ଯ୍ୟକ୍ରମକୁ ବିରୋଧ କରୁଥିବାବେଳେ ତାଙ୍କର ଏହି ପୋଷ୍ଟର କିଭଳି ଲାଗିଛି ବୋଲି ଗଣମାଧ୍ୟମ ପ୍ରଶ୍ନର ଉତ୍ତର ଦେଇ ଶ୍ରୀ ବେହେରା କହିଛନ୍ତି ଯେ, ତାଙ୍କର କେହି ସମର୍ଥକ ଏଭଳି ପୋଷ୍ଟର ଲଗାଇ ଦେଇଥିବ । କିନ୍ତୁ ଏହା ଅର୍ଥ ନୁହେଁ ଯେ ସେ ବିଜେଡିରେ ସାମିଲ ହୋଇଗଲେ । ଅବଶ୍ୟ ସେ ତାଙ୍କର ଭବିଷ୍ୟତ କାର୍ଯ୍ୟପନ୍ଥା ନେଇ ଗଣମାଧ୍ୟମ ଆଗରେ ମୁହଁ ଖୋଲିବାକୁ ରାଜି ନାହାନ୍ତି ।
ଏପଟେ ବିଜେଡି ସୂତ୍ରରୁ ମିଳିଥିବା ସୂଚନା ଅନୁସାରେ, ପ୍ରକାଶଙ୍କ ବିଜେଡିରେ ଏଣ୍ଟ୍ରିକୁ ବରିଷ୍ଠ ନେତା ଧର୍ମାନନ୍ଦ ବେହେରାଙ୍କ ପୁଅ ପ୍ରଶାନ୍ତ ବେହେରା ଜୋରଦାର ବିରୋଧ କରୁଛନ୍ତି । ୨୦୦୯ରେ ବିଧାନସଭା ମଣ୍ଡଳୀର ପୁନର୍ଗଠନ ପରଠୁ ସେ ସାଲେପୁରର ବିଜେଡି ସଂଗଠନକୁ ନିଜ ନିୟନ୍ତ୍ରଣରେ ରଖିଛନ୍ତି । ସେ ଗତଥର କମ ବ୍ୟବଧାନରେ ପରାଜିତ ହୋଇଥିଲେ ଓ ଏଥର ପୁଣିଥରେ ଦଳୀୟ ଟିକେଟ ପାଇଁ ଆଶାବାଦୀ ଅଛନ୍ତି । ସାଲେପୁରରେ ବିଜେଡିର କର୍ମୀମାନେ ପ୍ରଶାନ୍ତଙ୍କ ସପକ୍ଷରେ ରହିଥିବାରୁ ପ୍ରକାଶଙ୍କୁ ଏଣ୍ଟ୍ରି ପାଇଁ କୌଣସି ନିର୍ଦ୍ଦିଷ୍ଟ ପ୍ରତିଶ୍ରୁତି ମିଳିପାରୁନି । ତଥାପି ବିଜେଡିର ଗୋଟିଏ ପ୍ରଭାବଶାଳୀ ଗୋଷ୍ଠୀ ଏବେ ପ୍ରକାଶଙ୍କୁ ବିଜେଡିରେ ସାମିଲ କରିବା ପାଇଁ ଲବି ଜାରି ରଖିଥିବା ଜଣାପଡ଼ିଛି ।
