ଭୁବନେଶ୍ୱର(ଓଡ଼ିଶା ୱେୟାର): ପରୀକୁ ନ୍ୟାୟ ଦେବା ପାଇଁ ଆସନ୍ତା ୨୦ତାରିଖରୁ ବିଜେପି ୫ଦିନିଆ ପଦଯାତ୍ରା କରିବ । ଭୁବନେଶ୍ୱରସ୍ଥିତ ମହାପ୍ରଭୁ ଲିଙ୍ଗରାଜ ମନ୍ଦିର ସାମ୍ନାରୁ ୫ବର୍ଷୀୟା ଝିଅ ‘ପରୀ’ର ଗାଁ ନୟାଗଡ଼ର ଯଦୁପୁର ପର୍ଯ୍ୟନ୍ତ ଏହି ପଦଯାତ୍ରା ୫ଦିନ ଧରି ଚାଲିବ । ଏହି ପଦଯାତ୍ରାରେ ସାମିଲ ହେବାକୁ ସମାଜର ସବୁ ବର୍ଗର ସଚେତନ ନାଗରିକଙ୍କୁ ରାଜ୍ୟ ବିଜେପି ପକ୍ଷରୁ ଅନୁରୋଧ କରାଯାଇଛି ।
ରାଜ୍ୟ ବିଜେପି ସଭାପତି ସମୀର ମହାନ୍ତି ଆଜି ରାଜ୍ୟର ସମସ୍ତ ସଚେତନ ନାଗରିକ, ବୁଦ୍ଧିଜୀବୀ, ଛାତ୍ରନେତା, ସାମାଜିକ କର୍ମୀ ଓ ସମାଜର ସବୁ କ୍ଷେତ୍ରର ନେତୃତ୍ୱଙ୍କୁ ‘ପରୀକୁ ନ୍ୟାୟ ପାଇଁ ପଦଯାତ୍ରା’ରେ ସାମିଲ ହେବାକୁ ନିବେଦନ କରିଛନ୍ତି । ଏହା କେବଳ ପରୀକୁ ନ୍ୟାୟ ନୁହେଁ ବରଂ ଓଡ଼ିଶାର ମାତୃଶକ୍ତି ଓ ଶିଶୁ ସମ୍ପଦର ସୁରକ୍ଷା ପାଇଁ ଆୟୋଜନ ହୋଇଛି ବୋଲି କହିଛନ୍ତି । ପରୀର ହତ୍ୟା ଓ ଅଙ୍ଗଚୋରୀ ଘଟଣାରେ ଦୋଷୀକୁ ଘଂଟ ଘୋଡ଼ାଇବା ପ୍ରୟାସ ଚାଲିଛି । ଯାହାକି ସାଧାରଣ ମାନବିକ ସମ୍ବେଦନା ଓ ଚେତନାକୁ ଗଭୀର ଆଘାତ ଦେଇଛି । ପରୀ ହତ୍ୟା ମାମଲାରେ ପ୍ରଶାସନର ସ୍ଥାଣୁତା ଯୋଗୁ ପ୍ରକୃତ ଦୋଷୀକୁ ଧରିବାରେ ପ୍ରଶାସନ ବିଫଳ ହୋଇଛି ଓ ମନ୍ତ୍ରୀ ଅରୁଣ ସାହୁ ଦୋଷୀଙ୍କୁ ଘଂଟ ଘୋଡ଼ାଉଥିବା କଥା ମଧ୍ୟ ପଦାକୁ ଆସିଛି । ନାରୀ ସୁରକ୍ଷା ଓ ଶିଶୁ ସୁରକ୍ଷା ଏବେ ରାଜ୍ୟରେ ଚରମ ଅବହେଳାର ଶିକାର ହୋଇଛନ୍ତି । ଗତ ୨ବର୍ଷ ମଧ୍ୟରେ ୫୫୦୦ ଶିଶୁ ନିଖୋଜ ହୋଇଛନ୍ତି । ସେମାନଙ୍କ ମା’ଙ୍କର ଛାତିର କୋହକୁ ଶୁଣିବା ପାଇଁ କି ଆଖିର ଲୁହକୁ ପୋଛିବା ନିମନ୍ତେ ସରକାରଙ୍କ ଆଗ୍ରହ ନାହିଁ କି କିଛି ମଧ୍ୟ ପ୍ରୟାସ ହେଉନି ।
ତେଣୁ ଏସବୁ କାରଣରୁ ରାଜ୍ୟ ସରକାରଙ୍କ ସମ୍ବେଦନହୀନତା ଓ ଅପରାଧୀକୁ ଘଂଟ ଘୋଡ଼ାଇବାର ଅପଚେଷ୍ଟାକୁ ବିରୋଧ କରି ପରୀକୁ ନ୍ୟାୟ ସୁନିଶ୍ଚିତ କରିବା ନିମନ୍ତେ ବିଜେପି ଆସନ୍ତା ୨୦ତାରିଖରୁ ୫ଦିନ ବ୍ୟାପୀ ପଦଯାତ୍ରା କରିବାକୁ ନିଷ୍ପତ୍ତି ନେଇଛି ବୋଲି ଶ୍ରୀ ମହାନ୍ତି କହିଛନ୍ତି ।
