ଭୁବନେଶ୍ୱର : ସତ୍ୟବାଦୀର ବକୁଳ ବନର ପୁନରୁଦ୍ଧାର ପାଇଁ ରାଜ୍ୟ ସରକାର ଏକ ଉଚ୍ଚସ୍ତରୀୟ କମିଟି ଗଠନ କରିଛନ୍ତି । ପଞ୍ଚସଖା ବକୁଳ ବନର ସୁରକ୍ଷା ସହିତ ସ୍ଥିତି ଅନୁଧ୍ୟାନ କରି ଏହି କମିଟି ୧୫ଦିନ ମଧ୍ୟରେ ସରକାରଙ୍କୁ ରିପୋର୍ଟ ପ୍ରଦାନ କରିବ ବୋଲି ଜଣାପଡ଼ିଛି ।
ସଚିବାଳୟରେ ଅର୍ଥମନ୍ତ୍ରୀ ଶଶୀଭୂଷଣ ବେହେରାଙ୍କ ଅଧ୍ୟକ୍ଷତାରେ ବକୁଳ ବନର ପୁନରୁଦ୍ଧାର ପାଇଁ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା । ଏଥିରେ ସଂସ୍କୃତି ମନ୍ତ୍ରୀ ଅଶୋକ ପଣ୍ଡା, ସ୍ଥାନୀୟ ବିଧାୟକ ଉମାକାନ୍ତ ସାମନ୍ତରାୟଙ୍କ ସମେତ ବିଭାଗୀୟ ସଚିବ ଓ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ବକୁଳ ବନକୁ ଭାରତ ବର୍ଷର ଏକ ଆକର୍ଷଣୀୟ ସ୍ଥଳୀ ଭାବେ ଚିହ୍ନଟ କରିବା ପାଇଁ ସରକାର ପଦକ୍ଷେପ ନେବେ । ବକୁଳ ବନର ପୁନରୁଦ୍ଧାର ପାଇଁ ଗଠିତ କମିଟିରେ ସଂସ୍କୃତି ମନ୍ତ୍ରୀ, ସ୍ଥାନୀୟ ସତ୍ୟବାଦୀ ବିଧାୟକ, ପୁରୀ ଜିଲ୍ଲାପାଳ, ଲୋକସେବକ ମଣ୍ଡଳୀର ଅଧିକାରୀ, ବିଭାଗୀୟ ସଚିବ, ସ୍ଥାନୀୟ ପ୍ରଶାସକ ସଦସ୍ୟ ରହିବେ ବୋଲି ଜଣାପଡ଼ିଛି ।
