ଭୁବନେଶ୍ୱର(ଓଡ଼ିଶା ୱେୟାର): ଦିନକ ପରେ ୨୨ବର୍ଷରେ ପଦାର୍ପଣ କରିବାକୁ ଯାଉଥିବା ବିଜେଡିକୁ ଏବେ ପାଣ୍ଠି ଚିନ୍ତା ଘାରିଛି । ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଥମଥର ପାଇଁ ଦଳୀୟ ପାଣ୍ଠି ବୃଦ୍ଧି ନିମନ୍ତେ ସହଯୋଗର ହାତ ବଢ଼ାଇବାକୁ ଦଳର ବିଧାୟକ ଓ ସାଂସଦଙ୍କୁ ଏକମାସର ଦରମା ଦାନ କରିବା ପାଇଁ ଅନୁରୋଧ କରିଛନ୍ତି । ବିଜେଡିର ଶୁଭେଚ୍ଛୁ ଓ ସମର୍ଥକମାନଙ୍କଠୁ ଅର୍ଥ ସହାୟତା ସଂଗ୍ରହ ନିମନ୍ତେ ଦଳର ଜିଲ୍ଲା ସଭାପତିମାନଙ୍କୁ ପ୍ରତି ସପ୍ତାହରେ ଥରେ ସମୀକ୍ଷା କରିବାକୁ ମଧ୍ୟ ସେ ନିର୍ଦ୍ଦେଶ ଦେଇଛନ୍ତି ।
ବିଜେଡି ସଭାପତି ଶ୍ରୀ ପଟ୍ଟନାୟକ ଆଜି ଦଳର ସମସ୍ତ ରାଜ୍ୟ କର୍ମକର୍ତା, ଜିଲ୍ଲା ପର୍ଯ୍ୟବେକ୍ଷକ, ଜିଲ୍ଲା ସଭାପତି, ସାଂସଦ,ବିଧାୟକ, ଛାମୁଆ ସଂଗଠନର ସଭାପତି, ବ୍ଲକ ଓ ନଗର ସଭାପତିମାନଙ୍କୁ ଚିଠି ଲେଖି ଦଳୀୟ ପାଣ୍ଠି ଓ ନୂଆ ସଭ୍ୟ ସଂଗ୍ରହ ନିମନ୍ତେ ଆହ୍ୱାନ ଦେଇଛନ୍ତି । ଶ୍ରୀ ପଟ୍ଟନାୟକ ନିଜ ପତ୍ରରେ ଦର୍ଶାଇଛନ୍ତି ଯେ ବିଜେଡି ୨୧ବର୍ଷ ପୂରଣ କରି ୨୨ବର୍ଷରେ ପଦାର୍ପଣ କରିବାକୁ ଯାଉଛି ।ସମସ୍ତଙ୍କ ସହଯୋଗ,ପ୍ରତିବଦ୍ଧତା ଓ ଶୃଙ୍ଖଳା ଯୋଗୁ ବିଜେଡି ସୁଦୃଢ଼ ହୋଇଛି । ରାଜ୍ୟବାସୀଙ୍କ ଭଲପାଇବା ଓ ସମର୍ଥନ ଦଳକୁ ଦୃଢ଼ ଆଂଚଳିକ ଦଳ କରାଇଛି ।ରାଜ୍ୟବାସୀଙ୍କ ଭଲ ପାଇବା ଆମ ଦଳର ଶକ୍ତି ।ରାଜ୍ୟ ଭିତରେ ଓ ବାହାରେ ରହିଥିବା ଅଜସ୍ର ଶୁଭେଚ୍ଛୁ ଓ ସମର୍ଥକ ହେଉଛନ୍ତି ଦଳର ସାମର୍ଥ୍ୟ ।ରାଜ୍ୟବାସୀଙ୍କ ପ୍ରତି ବିଜେଡିର ରହିଥିବା ସାମାଜିକ ପ୍ରତିବଦ୍ଧତାକୁ ଆହୁରି ବ୍ୟାପକ କରିବା ପାଇଁ ସମସ୍ତେ ସହଯୋଗର ହାତ ବଢ଼ାଇବାକୁ ଶ୍ରୀ ପଟ୍ଟନାୟକ ନିବେଦନ କରିଛନ୍ତି ।
ଦଳର ସାଂସଦ ଓ ବିଧାୟକମାନଙ୍କୁ ନିଜର ଏକମାସର ଦରମା ଚେକ୍ ଆକାରରେ ପ୍ରଦାନ କରିବାକୁ ଶ୍ରୀ ପଟ୍ଟନାୟକ ଅନୁରୋଧ କରିଛନ୍ତି । ଦଳକୁ ସହଯୋଗର ହାତ ବଢ଼ାଇବାକୁ ଚାହୁଁଥିବା ସମର୍ଥକଙ୍କଠୁ ଚେକ୍ ଓ ଅନଲାଇନ ମାଧ୍ୟମରେ ଯିଏ ଯେତେ ପରିମାଣର ଅର୍ଥ ସହାୟତା ଦେଇପାରିବେ ତାହା ସଂଗ୍ରହ କରିବାକୁ ଜିଲ୍ଲା ସଭାପତିମାନଙ୍କୁ ସେ ନିର୍ଦ୍ଦେଶ ଦେଇଛନ୍ତି । ଏହି ସମସ୍ତ ସହାୟତା ଅର୍ଥ ଟିକସମୁକ୍ତ ଓ ଏହାର ରସିଦ୍ ମଧ୍ୟ ଦଳର କୋଷାଧ୍ୟକ୍ଷ ଯୋଗାଇଦେବେ ବୋଲି ଶ୍ରୀ ପଟ୍ଟନାୟକ କହିଛନ୍ତି ।
ଦଳୀୟ ପାଣ୍ଠି ସଂଗ୍ରହ ବ୍ୟତୀତ ସେ ପ୍ରତି ପଂଚାୟତ ଓ ସହରାଂଚଳର ୱାର୍ଡରେ ଅତିକମରେ ୨୦୦ ନୂଆ ସଦସ୍ୟ ସଂଗ୍ରହ କରିବା ପାଇଁ ଜିଲ୍ଲା ସଭାପତିମାନଙ୍କୁ ସେ ଟାର୍ଗେଟ୍ ଦେଇଛନ୍ତି ।ଏହା ସହିତ ‘ଜୀବନବିନ୍ଦୁ’ ମାଧ୍ୟମରେ ୩ଲକ୍ଷ ରକ୍ତଦାତା ରକ୍ତଦାନ କରିଥିବାରୁ ଶ୍ରୀ ପଟ୍ଟନାୟକ ସମସ୍ତଙ୍କୁ କୃତଜ୍ଞତା ଜଣାଇଛନ୍ତି ।
