ଭୁବନେଶ୍ୱର((ଓଡ଼ିଶା ୱେୟାର)): ପାରଳାଖେମୁଣ୍ଡି ରାଜା ଗୋପିନାଥ ଗଜପତିଙ୍କ ଝିଅ ତଥା ରାଜକୁମାରୀ କଲ୍ୟାଣୀ ଦେବୀ ଆଜି ଆନୁଷ୍ଠାନିକ ଭାବେ ନିଜର ସମର୍ଥକଙ୍କ ସହ ବିଜେଡିରେ ସାମିଲ ହୋଇଛନ୍ତି। ସେ ଆଗାମୀ ସାଧାରଣ ନିର୍ବାଚନରେ ବ୍ରହ୍ମପୁର ଲୋକସଭା ଆସନରୁ ବିଜେଡି ପ୍ରାର୍ଥୀ ହେବାର ସମ୍ଭାବନା ରହିଛି।
ରାଜକୁମାରୀ କଲ୍ୟାଣ ଦେବୀ ଆଜି ନିଜର ପ୍ରାୟ ୩୦୦ ସମର୍ଥକଙ୍କ ସହ ନବୀନ ନିବାସ ଯାଇ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ବିଜେଡିରେ ସାମିଲ ହୋଇଛନ୍ତି। କଲ୍ୟାଣ ଦେବୀ ଓ ତାଙ୍କ ସମର୍ଥକଙ୍କୁ ଦଳରେ ସ୍ୱାଗତ କରିବା ସହ ସେମାନଙ୍କ ମିଶ୍ରଣ ଯୋଗୁ ଗଞ୍ଜାମ ଓ ଗଜପତି ଜିଲ୍ଲାରେ ଦଳୀୟ ସଂଗଠନ ଅଧିକ ସୁଦୃଢ଼ ହେବ ବୋଲି ଶ୍ରୀ ପଟ୍ଟନାୟକ ଆଶାବ୍ୟକ୍ତ କରିଛନ୍ତି। ରାଜକୁମାରୀ କଲ୍ୟାଣ ଦେବୀଙ୍କ ପିତା ଗୋପିନାଥ ଗଜପତି ଦୁଇଥର ସାଂସଦ ଭାବେ କାର୍ୟ୍ୟ କରିସାରିଛନ୍ତି। ପାରଳା ରାଜପରିବାର ସହ ବିଜୁ ପଟ୍ଟନାୟକଙ୍କ ଘନିଷ୍ଠ ସମ୍ପର୍କ ରହି ଆସିଥିବାରୁ ସେ ବିଜେଡିରେ ଯୋଗ ଦେବା ନେଇ ବହୁ ପୂର୍ବରୁ ଚର୍ଚ୍ଚା ହେଉଥିଲା। କଲ୍ୟାଣୀ ଦେବୀ ଅଧିକାଂଶ ସମୟ ଚେନ୍ନାଇରେ ରହୁଥିଲେ। ବିଜେଡି ଆଗାମୀ ସାଧାରଣ ନିର୍ବାଚନରେ ବ୍ରହ୍ମପୁର ଲୋକସଭା ଆସନରେ ପ୍ରାର୍ଥୀ ପରିବର୍ତ୍ତନ କରିବାର ସମ୍ଭାବନା ଥିବାରୁ ସେଠାରେ କଲ୍ୟାଣୀ ଦେବୀଙ୍କୁ ଦଳୀୟ ଟିକେଟ୍ ମିଳିପାରେ ବୋଲି ଚର୍ଚ୍ଚା ହେଉଛି।
