ଭୁବନେଶ୍ୱର୍ : ରାଜ୍ୟରେ କଂଗ୍ରେସକୁ ସଂଗଠିତ କରିବା ପାଇଁ ଚାଲିଥିବା ଉଦ୍ୟମକୁ ନେଇ ବିଜେଡର ବରିଷ୍ଠ ନେତା ଡାକ୍ତର ଦାମୋଦର ରାଉତ ଭବିଷ୍ୟବାଣୀ କରିଛନ୍ତି । କଂଗ୍ରେସ ସଂଗଠିତ ହେଲେ ବି ଆସନ୍ତା ନିର୍ବାଚନରେ ବିଜେଡିର ବିଶେଷ କ୍ଷତି ହେବାର ନାହିଁ । ଅବଶ୍ୟ ବିଜେଡିର ସଂଖ୍ୟା ଟିକେ କମିଯାଇପାରେ କିନ୍ତୁ କଂଗ୍ରେସ ରାଜ୍ୟରେ ସରକାର ଗଢ଼ିବ ନାହିଁ ବୋଲି ସେ ଦମ୍ଭୋକ୍ତି ବ୍ୟକ୍ତ କରିଛନ୍ତି ।
ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇ ଡାକ୍ତର ରାଉତ କହିଛନ୍ତି ଯେ, କଂଗ୍ରେସ ସଂଗଠିତ ହେଲେ ତା’ର ପ୍ରଭାବ ବିଜେଡି ଉପରେ ପଡ଼ିବ । କିନ୍ତୁ ବିଶେଷ କ୍ଷତି ହେବ ନାହିଁ । ଆସନ ସଂଖ୍ୟା ଟିକେ କମିଯାଇପାରେ । ଏବେ ବିଜେଡିର ୧୧୭ ବିଧାୟକ ଅଛନ୍ତି । ଯଦି କଂଗ୍ରେସ ଶକ୍ତିଶାଳୀ ହୁଏ ତା’ହେଲେ ଏହି ସଂଖ୍ୟା ୧୦୦ କି ୮୫କୁ ଖସି ଆସିବ । କିନ୍ତୁ ବେଶୀ କ୍ଷତି ବିଜେପିର ହେବ । ବିଜେପିର ଉତ୍ଥାନରେ ରୋକ୍ ଲାଗିବ ଓ ତା’ର ଅହଙ୍କାର ଭାଙ୍ଗିବ । କଂଗ୍ରେସର ଉତ୍ଥାନ ରାଜ୍ୟ ରାଜନୀତି ପାଇଁ ଶୁଭ ଖବର ବୋଲି ଡାକ୍ତର ରାଉତ କହିଛନ୍ତି । ଅନ୍ୟପକ୍ଷରେ ବିଜେଡି ମୁଖପାତ୍ର ସମୀର ରଞ୍ଜନ ଦାସ କହିଛନ୍ତି ଯେ, ବିଜେଡି ଲୋକଙ୍କ ସହ ରହିଛି । ରାଜନୀତିକ ଦଳ ଭାବେ ବିଜେଡି ଉପରେ କଂଗ୍ରେସ ଶକ୍ତିଶାଳୀ ହେବାର ବିଶେଷ ପ୍ରଭାବ ପଡ଼ିବ ନାହିଁ । ବରଂ ବିଜେପି ଅଧିକ କ୍ଷତିଗ୍ରସ୍ତ ହେବ । ଯେହେତୁ ବିଜେପି ଏବେ ରାଜ୍ୟରେ କଂଗ୍ରେସର ସ୍ଥାନ ନେବାକୁ ଉଦ୍ୟମ କରୁଛି । ସେହିପରି ବିଜେପି ବିଧାୟକ ପ୍ରଦୀପ ପୁରୋହିତ କହିଛନ୍ତି ଯେ, କଂଗ୍ରେସ ଶକ୍ତିଶାଳୀ ହେବାର ପ୍ରଭାବ ବିଜେଡିକୁ ଅଧିକ କ୍ଷତି କରାଇବ । କାରଣ କଂଗ୍ରେସ ଭୋଟ୍କୁ ଅକ୍ତିଆର କରିବା ପାଇଁ ଗୁପ୍ତରେ ଉଦ୍ୟମ କରୁଥିଲେ ସେଥିରେ ରୋକ୍ ଲାଗିବ ।
