ବିଜୁ ଜନତା ଦଳକୁ ପୁଣି ଲାଗିଲା ଶକ୍ତ ଝଟକା । ଦଳ ଛାଡୁଛନ୍ତି ଜଣଙ୍କ ପରେ ଜଣେ ନେତା । ଆଜି ପୂର୍ବତନ ବିଧାୟକ ପ୍ରକାଶ ଚନ୍ଦ୍ର ବେହେରା ବିଜେଡ଼ିରୁ ଇସ୍ତଫା ଦେଇଛନ୍ତି । ଦଳର ସଭାପତି ନବୀନ ପଟ୍ଟନାୟକଙ୍କୁ ନିଜର ଇସ୍ତଫା ପତ୍ର ପଠାଇଥିବା ସୂଚନା ମିଳିଛି । କିନ୍ତୁ ସେ କାହିଁକି ଦଳ ଛାଡ଼ିଲେ ତାର କାରଣ ସ୍ପଷ୍ଟ ଜଣା ପଡିନାହିଁ।
ସୂଚନା ଯୋଗ୍ୟ; ୨୦୧୪ ମସିହାରେ ପ୍ରକାଶ ବେହେରା ସାଲେପୁର ଆସନରୁ କଂଗ୍ରେସରୁ ଟିକେଟ ପାଇ ବିଜୟୀ ହୋଇଥିଲେ । ଏହା ପରେ ସେ ୨୦୧୯ ନିର୍ବାଚନ ପୂର୍ବରୁ କଂଗ୍ରେସ ଛାଡ଼ି ବିଜେପିରେ ମିଶିଥିଲେ। ସେ ସେହି ବର୍ଷ ବିଜେପି ଟିକେଟରେ ସାଲେପୁର ବିଧାନସଭା ଆସନରୁ ନିର୍ବାଚନ ଲଢ଼ିଥିଲେ। କିନ୍ତୁ ସେ ବିଜେଡି ପ୍ରାର୍ଥୀ ପ୍ରଶାନ୍ତ ବେହେରାଙ୍କ ଠାରୁ ହାରି ଯାଇଥିଲେ । ଏହା ପରେ ସେ ଦଳ ଡେଇଁଥିଲେ । ଟିକେଟ୍ ଲୋଭରେ ପୁଣି ସେ ବିଜେଡ଼ିରେ ଯୋଗ ଦେଇଥିଲେ । ଚଳତବର୍ଷ ବିଜେଡ଼ିରୁ ସେ କଟକ-ବାରବାଟୀ ଆସନରୁ ଟିକେଟ୍ ପାଇ ନିର୍ବାଚନ ଲଢ଼ିଥିଲେ । ମାତ୍ର ସେ କଂଗ୍ରେସର ସୋଫିଆ ଫିର୍ଦ୍ଦୋସଙ୍କ ଠାରୁ ହାରି ଯାଇଥିଲେ ।
