ଭୁବନେଶ୍ୱର(ଓଡ଼ିଶା ୱେୟାର): ନିର୍ବାଚନ କାଉଂଟଡାଉନ୍ ଆରମ୍ଭ ହୋଇଥିବାବେଳେ ରାଜନୀତିକ ଦଳଗୁଡ଼ିକ ଏବେ ପାଣ୍ଠି ସଂଗ୍ରହ ଉପରେ ଗୁରୁତ୍ୱ ଦେବା ଆରମ୍ଭ କରିଛନ୍ତି । ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦଳୀୟ ପାଣ୍ଠି ବୃଦ୍ଧି ନିମନ୍ତେ ପ୍ରଥମଥର ପାଇଁ ନିଜ ଦଳର ବିଧାୟକ ଓ ସାଂସଦଙ୍କୁ ଏକମାସର ଦରମା ଦେବାକୁ ଅନୁରୋଧ କରିବା ସହ ସମର୍ଥକଙ୍କଠୁ ପାଣ୍ଠି ସଂଗ୍ରହ ପାଇଁ ଆହ୍ୱାନ କରିଛନ୍ତି । ତେବେ ନବୀନଙ୍କ ଏହି ପାଣ୍ଠି ମାଗିବାକୁ ଗତକାଲି କଟାକ୍ଷ କରିଥିବା କଂଗ୍ରେସ ଆଜି ସେହି ଫର୍ମୂଲା ଆପଣାଇଛି ।
ପିସିସି ସଭାପତି ନିରଞ୍ଜନ ପଟ୍ଟନାୟକ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ, ପ୍ରତି ବୁଥରେ ଲୋକଙ୍କଠୁ ପାଣ୍ଠି ସଂଗ୍ରହ କରାଯିବ ।ସଂଗୃହୀତ ପାଣ୍ଠିରେ ଦଳୀୟ ପ୍ରାର୍ଥୀମାନେ ନିର୍ବାଚନ ଲଢ଼ିବେ ।ଦଳ ପାଖରେ ଅର୍ଥ ନଥିବାରୁ କଂଗ୍ରେସ ଏଭଳି ନିଷ୍ପତି ନେଇଛି । ତେବେ ଗତକାଲି ପିସିସି ସଭାପତି ଶ୍ରୀ ପଟ୍ଟନାୟକ ବିଜେଡିର ପାଣ୍ଠି ସଂଗ୍ରହକୁ କଟାକ୍ଷ କରି କହିଥିଲେ ଯେ, ବିଜେଡି ଆଉ କେତେ ପାଣ୍ଠି ସଂଗ୍ରହ କରିବ ।ପାଣ୍ଠି ସଂଗ୍ରହ ପାଇଁ ବିଧାୟକ ଓ ସାଂସଦଙ୍କ ଦରମା ମାଗିବା କେବଳ ଲୋକଦେଖାଣିଆ ।ଭଗବାନଙ୍କ ଆଶୀର୍ବାଦ ସେମାନଙ୍କ ଉପରେ ଅଛି ।ନିର୍ବାଚନ ଲଢ଼ିବା ପାଇଁ ସେମାନଙ୍କ ପାଖରେ ଯଥେଷ୍ଟ ଅର୍ଥ ଅଛି ।
ଅନ୍ୟପକ୍ଷରେ ବିଜେଡି ଏହି ପାଣ୍ଠି ସଂଗ୍ରହ ଆହ୍ୱାନ ମାଧ୍ୟମରେ ଲୋକଙ୍କ ସହ ଯୋଡ଼ି ହେବାକୁ ନୂଆ ରଣନୀତି ପ୍ରସ୍ତୁତ କରିଛି ।ପାଣ୍ଠିର ସର୍ବନିମ୍ନ ଓ ସର୍ବାଧିକର କୌଣସି ସୀମା ସ୍ଥିର ନକରି ବିଜେଡି ପଂଚାୟତସ୍ତରରେ ପାଣ୍ଠି ସଂଗ୍ରହ ମାଧ୍ୟମରେ ଲୋକଙ୍କ ନିକଟତର ହେବାକୁ ପ୍ରୟାସ କରିଛି । ବିଜେଡି ଏବେ ୱାର୍ଡକମିଟି ମାଧ୍ୟମରେ ଏହି ପାଣ୍ଠି ସଂଗ୍ରହ ଓ ସଭ୍ୟ ସଂଗ୍ରହ ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ନିଷ୍ପତି ନେଇଥିବା ସୂଚନା ମିଳିଛି ।
