ଲଣ୍ଡନ: ଭାରତରେ କୋଭିଡ୍ ସଂକ୍ରମଣ ମାରାତ୍ମକ ହୋଇଥିବା ଦେଖି ବ୍ରିଟେନ ପ୍ରଧାନମନ୍ତ୍ରୀ ବୋରିଶ ଜନସନ ତାଙ୍କ ଗସ୍ତ ଏବେ ପାଇଁ ବାତିଲ କରିଛନ୍ତି। ଏପ୍ରିଲ ଅନ୍ତିମ ସପ୍ତାହରେ ବୋରିଶ ଜନସନ ଭାରତ ଆସିବେ ବୋଲି ସୂଚନା ରହିଥିଲା। ଏହି ଗସ୍ତ ସମୟରେ ଦୁୁଇ ଦେଶ ମଧ୍ୟରେ ବିଭିନ୍ନ ଦ୍ୱିପାକ୍ଷିକ ଚୁକ୍ତି ହେବାର କାର୍ୟ୍ୟକ୍ରମ ଥିଲା। ପ୍ରଥମେ ବୋରିଶ ଚାରି ଦିନିଆ ଭାରତ ଗସ୍ତରେ ଆସିବେ ବୋଲି ସୂଚନା ରହିଥିଲା। ଏହାପରେ ତାଙ୍କ ଅଫିସ ଏହି ଗସ୍ତସୂଚୀକୁ କାଣ୍ଟଛାଣ୍ଟ କରି ଅଳ୍ପଦିନ କରିଥିଲା।
ଗତକାଲି ବୋରିଶ ଭାରତ ଗସ୍ତ ନକରିବା ଉଚିତ ବୋଲି ବ୍ରିଟେନର ବିରୋଧୀ ଦଳ ଲେବର ପାର୍ଟି କହିଥିଲା। ଯେହେତୁ ଭାରତରେ କୋଭିଡ ସଂକ୍ରମଣ ବୃଦ୍ଧି ପାଉଛି ତେଣୁ ବୋରିଶ ତାଙ୍କ ବ୍ୟବସାୟିକ କାର୍ୟ୍ୟକ୍ରମ ଅନ୍ ଲାଇନ୍ ଜରିଆରେ ଭାରତ ସହ କରିବା ଦରକାର ବୋଲି ଲେବର ପାର୍ଟି କହିଥିଲା। ଆଉ ଏହାପରେ ବୋରିଶଙ୍କ ଭାରତ ଗସ୍ତ ବାତିଲ୍ ହୋଇପାରେ ବୋଲି ସମ୍ଭାବନା ଦେଖାଦେଇଥିଲା।
