ଭୁବନେଶ୍ୱର : ମହାନଦୀ ଜଳକୁ ନେଇ ଓଡ଼ିଶା ଓ ଛତିଶଗଡ଼ ମଧ୍ୟରେ ଚାଲିଥିବା ବିବାଦର ଆଇନଗତ ସମାଧାନ ପାଇଁ କେନ୍ଦ୍ର ସରକାର ରାଜି ହୋଇଛନ୍ତି । ବିବାଦର ଆପୋଷ ସମାଧାନ ପାଇଁ କେନ୍ଦ୍ର ସରକାରଙ୍କ ଉଦ୍ୟମ ଫେଲ୍ ମାରିବା ପରେ ଏକ ଟ୍ରିବ୍ୟୁନାଲ ଗଠନ କରି ମହାନଦୀ ବିବାଦର ସମାଧାନ କରାଯିବ ବୋଲି କେନ୍ଦ୍ର ସରକାର କହିଛନ୍ତି । ଟ୍ରିବ୍ୟୁନାଲ ଗଠନ ପାଇଁ କେନ୍ଦ୍ର ସରକାର ନିଷ୍ପତି ନେଇଛନ୍ତି ଓ ଏଥିପାଇଁ କ୍ୟାବିନେଟ୍ ଚିଠା ପ୍ରସ୍ତାବ ସରିଛି ବୋଲି କେନ୍ଦ୍ର ଜଳ ସମ୍ପଦ ରାଷ୍ଟ୍ରମନ୍ତ୍ରୀ ଡା. ସଞ୍ଜୀବ କୁମାର ବାଲ୍ୟାନ ରାଜ୍ୟସଭାରେ ସୂଚନା ଦେଇଛନ୍ତି ।
ସାଂସଦ ଏ.ଭି.ସ୍ୱାମୀଙ୍କ ଏକ ପ୍ରଶ୍ନର ଉତର ଦେଇ ଶ୍ରୀ ବାଲ୍ୟାନ କହିଛନ୍ତି ଯେ ଓଡ଼ିଶା ସରକାର ୨୦୧୬ ନଭେମ୍ବର ୧୧ ତାରିଖରେ ଆନ୍ତଃ ରାଜ୍ୟ ନଦୀ ଜଳ ବିବାଦ ଅଧିନିୟମ,୧୯୫୬ର ଧାରା ୩ ଆଧାରରେ ମହାନଦୀ ଜଳ ବିବାଦ ସମ୍ବନ୍ଧରେ କେନ୍ଦ୍ର ସରକାରଙ୍କ ନିକଟରେ ଅଭିଯୋଗ କରିଥିଲେ । ଏହା ସହିତ ଟ୍ରିବ୍ୟୁନାଲ ଗଠନ ପାଇଁ ଦାବି ଜଣାଇଥିଲା । ତେବେ ଓଡ଼ିଶାର ଦାବିକୁ ବିଚାରକୁ ନେଇ ପ୍ରଚଳିତ ଆନ୍ତଃ ରାଜ୍ୟ ନଦୀ ଜଳ ବିବାଦ ଅଧିନିୟମ-୧୯୫୬ର ଧାରା ୪ ଅନୁସାରେ କେନ୍ଦ୍ର ଜଳ ସମ୍ପଦ ମନ୍ତ୍ରଣାଳୟ, ମହାନଦୀ ପ୍ରବାହିତ ସମସ୍ତ ରାଜ୍ୟ, କେନ୍ଦ୍ରୀୟ ଜଳ ଆୟୋଗ, ଭାରତୀୟ ପାଣିପାଗ ବିଭାଗ ଓ ଜାତୀୟ ଜଳ ବିଜ୍ଞାନ ସଂସ୍ଥାନର ସଦସ୍ୟଙ୍କୁ ସାମିଲ କରି ୨୦୧୭ ଜାନୁୟାରୀ ୧୯ ତାରିଖରେ ଆଲୋଚନା ମାଧ୍ୟମରେ ବିବାଦର ସମାଧାନ ପାଇଁ ଏକ ବୁଝାମଣା କମିଟି ଗଠନ କରିଥିଲେ । ଏହି କମିଟିର ବୈଠକ ୨୦୧୭ ଫେବୃୟାରୀ ୨୮ ଓ ମେ’ ୨୨ତାରିଖରେ ବସିଥିଲେ ମଧ୍ୟ ଉଭୟ ଓଡ଼ିଶା ଓ ଛତିଶଗଡ଼ ସରକାର ଯୋଗ ଦେଇନଥିଲେ । ତେଣୁ ବିବାଦର ଆପୋଷ ଆଲୋଚନା ମାଧ୍ୟମରେ ହୋଇପାରିବ ନାହିଁ ବୋଲି ଜଳସମ୍ପଦ ମନ୍ତ୍ରଣାଳୟ ଅନୁଭବ କରିଥିଲେ । ବିବାଦର
ଆଇନଗତ ସମାଧାନ ପାଇଁ ଏକ ଟ୍ରିବ୍ୟୁନାଲ ଗଠନ ନିମନ୍ତେ ନିଷ୍ପତି ହୋଇଛି । ଏ ସମ୍ବନ୍ଧରେ କ୍ୟାବିନେଟ୍ ଚିଠା ପ୍ରସ୍ତାବ ମଧ୍ୟ ପ୍ରସ୍ତୁତ କରାଯାଇସାରିଛି ବୋଲି ଡା. ବ୍ୟାଲାନ କହିଛନ୍ତି । ଏହା ବ୍ୟତୀତ ଏ ସମ୍ବନ୍ଧରେ ସୁପ୍ରିମକୋର୍ଟରେ ଓଡ଼ିଶା ସରକାର ଏକ ମାମଲା ରୁଜୁ କରିଛନ୍ତି । ଯାହାର ଶୁଣାଣି ଅଗଷ୍ଟ ୨ତାରିଖରେ କରିବା ପାଇଁ ସୁପ୍ରିମକୋର୍ଟ ଦନ ଧାର୍ଯ୍ୟ କରିଛନ୍ତି ।
