ଭୁବନେଶ୍ୱର : 2018 ମାଟ୍ରିକ୍ ପରୀକ୍ଷା ଫଳ ପ୍ରକାଶ ପାଇଛି । ଏଥର ପୁଅଙ୍କୁ ପଛରେ ପକାଇଛନ୍ତି ଝିଅ। ମୋଟ ୨ ଲକ୍ଷ ୨୨ ହଜାର ୪୩ ଜଣ ଝିଅ ପାସ୍ କରିଥିବା ବେଳେ ପୁଅ ୨ ଲକ୍ଷ ୧୬ ହଜାର ୩୦୫ ଜଣ ପାସ୍ କରିଛନ୍ତି। ବାଲେଶ୍ୱର ଜିଲ୍ଲାରେ ସର୍ବାଧିକ ପାସହାର ୮୮.୧୫ ପ୍ରତିଶତ ଥିବାବେଳେ ମୟୂରଭଞ୍ଜ ଜିଲ୍ଲାରେ ସର୍ବନିମ୍ନ ପାସହାର ୬୫.୭୬ ପ୍ରତିଶତ ରହିଛି। ସେହିପରି ମାଲକାନଗିରି ଜିଲ୍ଲାରେ ସର୍ବନିମ୍ନ ପାସହାର ୫୯.୩୨ ପ୍ରତିଶତ ରହିଛି। A1ଗ୍ରେଡ୍ରେ ମୋଟ୍ ୧୭୧୫ ପିଲା ଉତ୍ତୀର୍ଣ୍ଣ ହୋଇଛନ୍ତି। A2 ଗ୍ରେଡରେ ୧୫ ହଜାର ୬୮୯ ପରୀକ୍ଷାର୍ଥୀ ଛାତ୍ରଛାତ୍ରୀ ପାସ୍ କରିଥିବା ବେଳେ B1ରେ ୩୯ ହଜାର ୨୫୨, B2 ରେ ୬୮ ହଜାର ୯ଜଣ ପରୀକ୍ଷାର୍ଥୀ, C ଗ୍ରେଡ୍ ପାଇଛନ୍ତି ୯୭ ହଜାର ୭୪୬ ପରୀକ୍ଷାର୍ଥୀ ଓ D ଗ୍ରେଡରେ ୧ ଲକ୍ଷ ୨୩ ହଜାର ୭୬୩ ପିଲା ପାସ୍ କରିଛନ୍ତି। ଚଳିତବର୍ଷ ୬ଲକ୍ଷ ୮ ହଜାର ୬୫୯ ପରୀକ୍ଷାର୍ଥୀ ପରୀକ୍ଷା ଦେଇଥିଲେ। ମୋଟ ୭୬.୨୩ ପିଲା ପାସ୍ କରିଛନ୍ତି। କଟକ ସ୍ଥିତ ମାଧ୍ୟମିକ ଶିକ୍ଷା ପରିଷଦ ଅଫିସ୍ରେ ଗଣ ଶିକ୍ଷା ମନ୍ତ୍ରୀ ବଦ୍ରି ନାରାୟଣ ପାତ୍ର ଆନୁଷ୍ଠାନିକ ଭାବେ ପରୀକ୍ଷା ଫଳ ପ୍ରକାଶ କରିଛନ୍ତି। ଅନ୍ୟପକ୍ଷରେ ମ୍ୟାଟ୍ରିକ ପରୀକ୍ଷାରେ ଯେଉଁ ସ୍କୁଲଗୁଡ଼ିକର ଶତ ପ୍ରତିଶତ ଛାତ୍ରଛାତ୍ରୀ ଫେଲ୍ ହୋଇଛନ୍ତି ସେହି ସ୍କୁଲର ଶିକ୍ଷକମାନେ ଉତ୍ତରଦାୟୀ ରହିବେ ବୋଲି ସ୍କୁଲ ଓ ଗଣଶିକ୍ଷା ସଚିବ ପ୍ରଦୀପ୍ତ କୁମାର ମହାପାତ୍ର କହିଛନ୍ତି । ପରୀକ୍ଷା ଫଳ କାହିଁକି ଖରାପ ହେଲା, ତାହାର ଅନୁଧ୍ୟାନ କରାଯିବ । ସେହି ସ୍କୁଲର ଶିକ୍ଷକମାନଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ ବୋଲି ଶ୍ରୀ ମହାପାତ୍ର ଚେତାବନୀ ଦେଇଛନ୍ତି । ଅପରପକ୍ଷରେ ବିଭାଗ ସୂତ୍ରରୁ ମିଳିଥିବା ସୂଚନା ଅନୁସାରେ ଯେଉଁ ସ୍କୁଲଗୁଡ଼ିକରେ ମ୍ୟାଟ୍ରିକ ପରୀକ୍ଷା ଫଳ ଖରାପ ହୋଇଛି ତା’ର ତାଲିକା ପ୍ରସ୍ତୁତ କରିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି । ସମସ୍ତ ଜିଲ୍ଲାର ଶିକ୍ଷା ଅଧିକାରୀଙ୍କୁ ଏନେଇ ବିସ୍ତୃତ ରିପୋର୍ଟ ଦାଖଲ କରିବାକୁ କୁହାଯାଇଥିବା ଜଣାପଡ଼ିଛି ।
