ଭୁବନେଶ୍ୱର(ଓଡ଼ିଶା ୱେୟାର): ଆଗାମୀ ଲୋକସଭା ନିର୍ବାଚନ ପାଇଁ ବିଜେଡି ପ୍ରାୟ ୭ଜଣ ମହିଳାଙ୍କୁ ମଇଦାନକୁ ଓହ୍ଲାଇବାକୁ ରଣନୀତି ପ୍ରସ୍ତୁତ କରିଛି। ବିଜେଡି ଯେଉଁମାନଙ୍କୁ ପ୍ରାର୍ଥୀ କରିବାକୁ ନିଷ୍ପତ୍ତି ନେଇଛି ସେମାନଙ୍କ ମଧ୍ୟରେ ଅଧିକାଂଶ ନୂଆ ମୁହଁ ବୋଲି ଜଣାପଡ଼ିଛି।
ନିର୍ଭରଯୋଗ୍ୟ ସୂତ୍ରରୁ ମିଳିଥିବା ସୂଚନା ଅନୁସାରେ, ବିଜେଡି ଲୋକସଭାରେ ୭ଜଣ ମହିଳା ଓ ବିଧାନସଭାରେ ପ୍ରାୟ ୨୫ରୁ ୩୦ଜଣ ମହିଳାଙ୍କୁ ପ୍ରାର୍ଥୀ କରିବାର ଯଥେଷ୍ଟ ସମ୍ଭାବନା ରହିଛି। ରାଜ୍ୟର ମୋଟ ୨୧ଟି ଲୋକସଭା ଆସନ ମଧ୍ୟରୁ ୭ଟି(୨ଜଣ ଅନୁସୂଚିତ ଜାତି,୨ଜଣ ଅନୁସୂଚିିତ ଜନଜାତି ଓ ୩ଜଣ ସାଧାରଣ ବର୍ଗ)ରେ ମହିଳାଙ୍କୁ ପ୍ରାର୍ଥୀ କରିବ ଓ ସେମାନେ ଅଧିକାଂଶ ନୂଆ ମୁହଁ। ସମ୍ମାନଜନକ କେନ୍ଦ୍ରାପଡ଼ା ଆସନରେ ଦଳ ନିଜର ଟ୍ରମ୍ପ କାର୍ଡ ଭାବେ ଜଣେ ବରିଷ୍ଠ ମହିଳା ଆଇଏଏସଙ୍କୁ ପ୍ରାର୍ଥୀ କରିପାରେ। ଏଥିପାଇଁ ଦଳ ପକ୍ଷରୁ ମାର୍ଗ ପ୍ରଶସ୍ତ ହୋଇଛି।
ସେହିପରି ଯାଜପୁର ସଂରକ୍ଷିତ ଲୋକସଭା ଆସନରେ ବିଜେଡି ଶର୍ମିଷ୍ଠା ସେଠୀଙ୍କୁ ପ୍ରାର୍ଥୀ କରିବ। ଶ୍ରୀମତୀ ସେଠୀ ଅର୍ଥ ବିଭାଗରେ ଅତିରିକ୍ତ ବାଣିଜ୍ୟକର ଅଫିସର ଭାବେ କାର୍ଯ୍ୟ କରୁଥିଲେ ତଥା ଇତିମଧ୍ୟରେ ଚାକିରିରୁ ଇସ୍ତଫା ଦେଇସାରିଛନ୍ତି। ସିଏ କ୍ରୀଡ଼ା ମନ୍ତ୍ରୀଙ୍କ ବ୍ୟକ୍ତିଗତ ସଚିବ ରବିନ୍ଦ୍ର ସେଠୀଙ୍କ ପତ୍ନୀ। ଶ୍ରୀ ସେଠୀ ଏବେ ବିଜେଡିର ସୋଶାଲ ମିଡିଆ ଦାୟିତ୍ୱରେ ଅଛନ୍ତି।
ଏହି ଦୁଇ ଆସନ ବ୍ୟତୀତ ଜଗତସିଂହପୁର ସଂରକ୍ଷିତ ଲୋକସଭା ଆସନରେ ବିଧାୟିକା ରାଜଶ୍ରୀ ମଲ୍ଲିକ କିମ୍ବା ବିଜେଡି ସଭାନେତ୍ରୀ ମିନତୀ ବେହେରାଙ୍କୁ ପ୍ରାର୍ଥୀ କରିପାରେ। ତେବେ ରାଜଶ୍ରୀଙ୍କ ଲୋକସଭା ପ୍ରାର୍ଥୀ ହେବାର ଯଥେଷ୍ଟ ସମ୍ଭାବନା ରହିଛି। ସେହିପରି ସୁନ୍ଦରଗଡ଼ ସଂରକ୍ଷିତ ଲୋକସଭା ଆସନରେ ପୂର୍ବତନ ମୁଖ୍ୟମନ୍ତ୍ରୀ ହେମାନନ୍ଦ ବିଶ୍ୱାଳଙ୍କ ଝିଅ ସୁନିତା ବିଶ୍ୱାଳ , କେନ୍ଦୁଝର ସଂରକ୍ଷିତ ଲୋକସଭା ଆସନରେ ଦଳ ବର୍ତ୍ତମାନର ସାଂସଦ ଶକୁନ୍ତଳା ଲାଗୁରୀ , ଆସିକା ଲୋକସଭା ଆସନରେ ଲତିକା ପ୍ରଧାନ, କନ୍ଧମାଳ ଆସନରେ ପ୍ରତ୍ୟୁଷା ରାଜେଶ୍ୱରୀଙ୍କୁ ପ୍ରାର୍ଥୀ କରିବ ବୋଲି ଜଣାପଡ଼ିଛି।
ଉଲ୍ଲେଖଯୋଗ୍ୟ ଏପ୍ରିଲ ୧୧ତାରିଖରେ ପ୍ରଥମ ପର୍ଯ୍ୟାୟ ନିର୍ବାଚନ ୪ଟି ଲୋକସଭା ଓ ୨୮ଟି ବିଧାନସଭା ପାଇଁ ନାମାଙ୍କନ ଦାଖଲ ପ୍ରକ୍ରିୟା ଆସନ୍ତା ୧୮ତାରିଖରୁ ଆରମ୍ଭ ହେଉଥିବାବେଳେ ହାତରେ ଆଉ ମାତ୍ର ଏକ ସପ୍ତାହ ବାକି ରହିଛି। ତେଣୁ ଦଳ ଆସନ୍ତା ଦିନେ ଦୁଇଦିନ ମଧ୍ୟରେ ନିଜର ପ୍ରାର୍ଥୀ ତାଲିକା ଘୋଷଣା କରିବ ବୋଲି ଜଣାପଡ଼ିଛି।
