ଭୁବନେଶ୍ୱର : ଦୀର୍ଘ ୫ବର୍ଷ ଧରି ଦଳରେ ଅଣଦେଖା ହୋଇ ରହିଥିବା ବରିଷ୍ଠ ନେତା ରଘୁନାଥ ମହାନ୍ତିଙ୍କୁ ଆଜି ବିଜେଡି ଉପସଭାପତି ଭାବେ ନିଯୁକ୍ତି ମିଳିଛି । ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ଦଳର ସକ୍ରିୟ ସଂଗଠନ କାର୍ଯ୍ୟକୁ ଫେରାଇ ଆଣି ପୁଣିଥରେ ଉପସଭାପତି ପଦରେ ଅବସ୍ଥାପିତ କରିଥିବାବେଳେ ଢେଙ୍କାନାଳ ଜିଲ୍ଲା ପର୍ଯ୍ୟବେକ୍ଷକ ଦାୟିତ୍ୱ ନ୍ୟସ୍ତ କରିଛନ୍ତି । ଦଳର ସାଧାରଣ ସମ୍ପାଦକ ପ୍ରଣବ ପ୍ରକାଶ ଦାସ ଆଜି ଏକ ପ୍ରେସ୍ ଇସ୍ତାହାରରେ ଏନେଇ ସୂଚନା ଦେଇଛନ୍ତି । ବରିଷ୍ଠ ନେତା ଡାକ୍ତର ଦାମୋଦର ରାଉତଙ୍କୁ ଉପସଭାପତି ପଦରୁ ବହିଷ୍କାର କରାଯିବା ପରେ ଦଳରେ ଗୋଟିଏ ଉପସଭାପତି ପଦ ଖାଲି ପଡ଼ିଥିଲା । ଡାକ୍ତର ରାଉତ ମଧ୍ୟ ଢେଙ୍କାନାଳ ଜିଲ୍ଲାର ପର୍ଯ୍ୟବେକ୍ଷକ ଥିଲେ । ଏବେ ଶ୍ରୀ ମହାନ୍ତି ଏହି ଦୁଇଟି ଯାକ ଦାୟିତ୍ୱ ତୁଲାଇବେ । ବୋହୂ ବର୍ଷାସୋନିକୁ ନିର୍ଯାତନା ଦେବା ଅଭିଯୋଗରେ ଶ୍ରୀ ମହାନ୍ତି ବିଜେଡି ଉପସଭାପତି ଓ ମନ୍ତ୍ରୀ ପଦ ହରାଇଥିଲେ ।
