ଭୁବନେଶ୍ୱର୍ : ରାଜ୍ୟ ସରକାର ଓ ଘରୋଇ ବସ୍ ମାଲିକ ସଂଘ ମଧ୍ୟରେ ଆଲୋଚନା ପରେ ଅପରାହ୍ନ ୫ଟା ପରଠାରୁ ବସ୍ ଚଳାଚଳ ସ୍ୱାଭାବିକ ହୋଇଛି । ୧୧ ଦଫା ଦାବିରେ ବୁଧବାର ସକାଳ ୬ଟାରୁ ଅନିର୍ଦ୍ଦିଷ୍ଟ କାଳ ପାଇଁ ରାଜ୍ୟବ୍ୟାପୀ ଘରୋଇ ବସ୍ ଧର୍ମଘଟ ହୋଇଥିଲା, ଯାହା ସନ୍ଧ୍ୟାରେ ପ୍ରତ୍ୟାହୃତ ହୋଇଛି । ଭୁବନେଶ୍ୱର୍ : ରାଜ୍ୟ ସରକାର ଓ ଘରୋଇ ବସ୍ ମାଲିକ ସଂଘ ମଧ୍ୟରେ ଆଲୋଚନା ପରେ ଅପରାହ୍ନ ୫ଟା ପରଠାରୁ ବସ୍ ଚଳାଚଳ ସ୍ୱାଭାବିକ ହୋଇଛି । ୧୧ ଦଫା ଦାବିରେ ବୁଧବାର ସକାଳ ୬ଟାରୁ ଅନିର୍ଦ୍ଦିଷ୍ଟ କାଳ ପାଇଁ ରାଜ୍ୟବ୍ୟାପୀ ଘରୋଇ ବସ୍ ଧର୍ମଘଟ ହୋଇଥିଲା, ଯାହା ସନ୍ଧ୍ୟାରେ ପ୍ରତ୍ୟାହୃତ ହୋଇଛି । ରାଜ୍ୟ ଘରୋଇ ବସ୍ ମାଲିକ ସଂଘ ମୁଖପାତ୍ର ଦେବାଶିଷ ନାୟକ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ଘରୋଇ ବସ୍ ନିମନ୍ତେ ଟୋଲ୍ ଫି ଛାଡ଼, ସିଟି ବସ୍ର ରୁଟ୍ ଚାର୍ଟରେ ପାରଦର୍ଶିତା, ମୋଟର ଯାନ ଟିକସ ବୃଦ୍ଧିକୁ ପ୍ରତ୍ୟାହାର ଆଦି ୧୧ଦଫା ଦାବିରେ ୧୪ତାରିଖ ସକାଳ ୬ଟାରୁ ରାଜ୍ୟବ୍ୟାପୀ ଧର୍ମଘଟ ନିମନ୍ତେ ଘରୋଇ ବସ୍ ମାଲିକ ସଂଘ ଘୋଷଣା କରିଥିଲା । ଘରୋଇ ବସ୍ ମାଲିକ ସଂଘ ଓ ରାଜ୍ୟ ପରିବହନ ମନ୍ତ୍ରୀଙ୍କ ମଧ୍ୟରେ ମଙ୍ଗଳବାର ଆଲୋଚନା ସତ୍ତେ୍ୱ ସମାଧାନ ରାସ୍ତା ବାହାରି ପାରିନଥିଲା । ରାଜ୍ୟ ସରକାର ସମସ୍ତ ଦାବି ମାନିନେବା ପରେ ରାଜ୍ୟବ୍ୟାପୀ ବସ୍ ଧର୍ମଘଟକୁ ପ୍ରତ୍ୟାହାର କରିନିଆଯାଇଛି । ଅପରାହ୍ନ ୫ଟା ପରଠାରୁ ବସ୍ ଚଳାଚଳ ସ୍ୱାଭାବିକ ହୋଇଛି । ମଙ୍ଗଳବାର ପରିବହନ ମନ୍ତ୍ରୀ ଡଃ ନୃସିଂହ ସାହୁଙ୍କ ସହ ସଂଘର ଆଲୋଚନାବେଳେ ସରକାର ଅଧିକାଂଶ ଦାବିକୁ ମାନିନେଇଥିଲେ । ବୁଧବାର ମଧ୍ୟାହ୍ନରେ ପୁଣିଥରେ ସଂଘ କର୍ମକର୍ତ୍ତାଙ୍କ ସହ ପରିବହନ ମନ୍ତ୍ରୀ ଓ ନଗର ଉନ୍ନୟନ ମନ୍ତ୍ରୀଙ୍କ ଆଲୋଚନାବେଳେ ସିଟି ବସ୍ ଚଳାଚଳକୁ ନେଇ ରହିଥିବା ବିବାଦର ସମାଧାନ ହୋଇଛି । ଆସନ୍ତା ୩ମାସ ପର୍ଯ୍ୟନ୍ତ ରାଜ୍ୟ ସରକାର କୌଣସି ସିଟି ବସ୍କୁ ଚଳାଚଳ ପାଇଁ ନୂଆ ରୁଟ୍ ପରମିଟ୍ ଦେବେ ନାହିଁ । ସରକାର ଏକ ଉଚ୍ଚସ୍ତରୀୟ କମିଟି ଗଠନ କରିବେ ଓ ସେହି କମିଟିର ରିପୋର୍ଟ ଆଧାରରେ ସିଟି ବସ୍ ଚଳାଚଳକୁ ସୁବ୍ୟବସ୍ଥିତ କରାଯିବ । ସରକାର ପ୍ରାୟତଃ ସମସ୍ତ ଦାବିକୁ ନେଇ ସକରାତ୍ମକ ଆଭିମୁଖ୍ୟ ପୋଷଣ କରିଥିବାରୁ ବସ୍ ଧର୍ମଘଟକୁ ପ୍ରତ୍ୟାହାର କରାଯାଇଛି ବୋଲି ଶ୍ରୀ ନାୟକ କହିଛନ୍ତି । ସେହିପରି ନଗର ଉନ୍ନୟନ ମନ୍ତ୍ରୀ ନିରଞ୍ଜନ ପୂଜାରୀ କହିଥିଲେ ଯେ, ଘରୋଇ ବସ୍ ମାଲିକ ସଂଘ ସହ ବୈଠକ ସଫଳ ହୋଇଛି । ସିଟି ବସ୍ ଚଳାଚଳକୁ ନେଇ ଯେଉଁ ବିବାଦ ରହିଥିଲା ତା’ର ସମ୍ପୂର୍ଣ୍ଣ ସମାଧାନ ୩ମାସ ପରେ ହୋଇଯିବ । ଏବେ ଏକ ଉଚ୍ଚସ୍ତରୀୟ କମିଟି ଗଠନ କରିବାକୁ ନିଷ୍ପତ୍ତି ହୋଇଛି ଓ କମିଟି ହିଁ ରୁଟ୍ ପରମିଟ୍ ଆଦି ପ୍ରସଙ୍ଗରେ ତା’ର ରିପୋର୍ଟ ଦେବ । ସୂଚନାଯୋଗ୍ୟ ଯେ ଆଜି ସକାଳୁ ଘରୋଇ ବସ୍ ଧର୍ମଘଟରେ ପ୍ରାୟ ୧୭ହଜାର ଘରୋଇ ବସ୍ ସାମିଲ ହୋଇଥିଲେ ।
