ଶ୍ରୀମନ୍ଦିରରେ ଶ୍ରୀକୃଷ୍ଣଙ୍କ ଜନ୍ମନୀତି ସମ୍ପନ୍ନ
ପାଞ୍ଚଘଣ୍ଟା ଦର୍ଶନ ବନ୍ଦ
ଭାଦ୍ରବ କୃଷ୍ଣପକ୍ଷ ଅଷ୍ଟମୀ ତିଥିରେ ଆଜି ଶ୍ରୀମନ୍ଦିରରେ ଜନ୍ମାଷ୍ଟମୀ ନୀତି ସମ୍ପନ୍ନ ହୋଇଛି । ଭକ୍ତିପୂତ ପରିବେଶ ମଧ୍ୟରେ ଭଗବାନ ଶ୍ରୀକୃଷ୍ଣଙ୍କ ଜନ୍ମୋତ୍ସବ ପାଳିତ ହୋଇଛି । ଏହି ଉପଲକ୍ଷେ ବହୁ ସଂଖ୍ୟାରେ ଭକ୍ତ ଶ୍ରୀମନ୍ଦିରକୁ ଯାଇ ଶ୍ରୀଜିଉମାନଙ୍କୁ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ । ଜନ୍ମାଷ୍ଟମୀ ପାଇଁ ଉପବାସ କରିଥିବା ମହିଳାମାନେ ପ୍ରତ୍ୟୁଷରୁ ଶୁଚିମନ୍ତ ହୋଇ ପୂଜାର୍ଚ୍ଚନା କରିବା ସହ ଶ୍ରୀମନ୍ଦିରରେ ପୂଜା କରିଥିଲେ । ଆଜି ମହାପ୍ରଭୁଙ୍କୁ ଦର୍ଶନ କରିବା ପାଇଁ ମନ୍ଦିରରେ ପ୍ରବଳ ଜନସମାଗମ ହୋଇଥିଲା । ଦୀର୍ଘସମୟ ଧରି ଦର୍ଶନ ବନ୍ଦ ରହିବ ବୋଲି ପୂର୍ବରୁ ଘୋଷଣା କରାଯାଇଥିବାରୁ ପୂର୍ବାହ୍ଣରେ ଭିଡ଼ ପରିଲକ୍ଷିତ ହୋଇଥିଲା । ସନ୍ଧ୍ୟାଧୂପ ବେଶ ସମୟରେ ଶ୍ରୀବିଗ୍ରହମାନଙ୍କୁ ଅଳଙ୍କାର ଲାଗି କରାଯାଇଥିଲା । ପରେ ଅପରାହ୍ଣ ୫ଟା୨୫ରେ ଜୟବିଜୟ ଦ୍ୱାର ବନ୍ଦ କରାଯାଇ ଭଣ୍ଡାର ଘର ଆଗରେ ଶୁଦ୍ଧ ସୁଆରମାନେ ପୋଛା ମାରିଥିଲେ । ପଞ୍ଚବର୍ଣ୍ଣ ମୁରୁଜରେ ପୂଜାପଣ୍ଡା ଭଦ୍ରମଣ୍ଡଳ ଅଙ୍କନ କରିଥିଲେ । ଭିତରେ ପାଣିପଡ଼ି ଧୋପଖାଳ ହେବାପରେ ଶୁଦ୍ଧ ସୁଆର ମଣ୍ଡଳପାଖରେ ପୂଜାଠା କରିଥିଲେ । ଜନ୍ମ ଚକଡ଼ା ପାଖରେ ବସି ପୂଜାପଣ୍ଡା, ପତି ଓ ମୁଦିରସ୍ତ ସଂକଳ୍ପ ବାକ୍ୟ ଉଚ୍ଚାରଣ କରିଥିଲେ । ଏହାପରେ କଳସରେ ବରୁଣପୂଜା କରାଯାଇଥିଲା । ଚିତ୍ରକାରଙ୍କ ପ୍ରଦତ୍ତ କୃଷ୍ଣ ଜନ୍ମପଟି, ରୂପା ପଦ୍ମପାଖୁଡ଼ା ପୂଜାପଣ୍ଡା ମଣ୍ଡଳ ଉପରେ ରଖିଥିଲେ । ଏହି ରୁପା ପାଖୁଡ଼ାରେ ଦେବକୀ, ବସୁଦେବ, ନନ୍ଦ, ଯଶୋଦା, ଲକ୍ଷ୍ମୀ, ଉଗ୍ରସେନ, ବଳଭଦ୍ର, ଗାବ ଋଷି ଓ କୃଷ୍ଣଙ୍କ ଭଳି ୯ଟି ମୂର୍ତ୍ତି ଲେଖାଯାଇଥାଏ । ପୂଜାପଣ୍ଡା ଗୋଟିଏ ସୁନା କୃଷ୍ଣମୂର୍ତ୍ତି ମଣ୍ଡଳ ଉପରେ ରଖିଥିଲେ । ପରେ ଚକଡ଼ା ଛାମୁରେ ପାଣିପଡ଼ି ୯ଟି ଭୋଗ ବଢ଼ାଯାଇଥିଲା । ଫୁଲମାଳ ଓ ଚନ୍ଦନଲାଗି ପରେ ପୂଜାପଣ୍ଡା ସେବାୟତ ପଞ୍ଚପୋଚାରରେ ପୂଜାକରି ପନ୍ତିଭୋଗ କରିଥିଲେ । ଦକ୍ଷିଣଘରୁ ମଦନମୋହନଙ୍କୁ ଉଲଗ୍ନ କରି ସିଂହାସନ ଉପରେ ବିଜେ କରାଯାଇଥିଲା । ମୁଦିରସ୍ତ ମହାପ୍ରଭୁଙ୍କ ବାଡ଼ରୁ ମଦନମୋହନଙ୍କୁ ଦଣ୍ଡି ପ୍ରସାଦ ଓ ଆଜ୍ଞାମାଳ ଦେବା ପରେ ଜନ୍ମ ଚକଡ଼ାରେ ମହାଜନମାନେ ମଦନମୋହନକୁ ବିଜେ କରାଇଥିଲେ । ସେଠାରେ ପୂଜାପଣ୍ଡା ଷୋଡ଼ଶ ଉପଚାରରେ ଶୀତଳ ଭୋଗ ମଣୋହି କରିଥିଲେ । ପରେ ଦୁଇଜଣ ମହାଜନ ସେବକ ଲୁଗା ଘୋଡ଼ାଇ ହୋଇ ଦେବକୀ ଓ ବସୁଦେବଙ୍କ ବେଶରେ ଜନ୍ମ ଚକଡ଼ାଠାରେ ଶ୍ରୀକୃଷ୍ଣଙ୍କୁ ଜନ୍ମ କରାଇଥିଲେ । ମୁଦିରସ୍ତ ପ୍ରସାଦ ଲାଗି କରିଥିଲେ । ପାଳିଆ ମହାସୁଆର ଦୁଧ, ଲହୁଣି ଓ ଗଣ୍ଡୁସ ମସଲା ଦେବା ପରେ ପୂଜାପଣ୍ଡା ସମର୍ପଣ କରି ମଣୋହି କରାଇଥିଲେ । କର୍ପୂର ଆଳତି ପରେ ଭଣ୍ଡାର ମେକାପ ଦେଇଥିବା ଥାଳିରେ କୃଷ୍ଣ (ମଦନମୋହନ) ବିଜେ ହୋଇ ଦେବକୀ ଓ ବସୁଦେବଙ୍କ ସହିତ ଜଗମୋହନ ଦେଇ ସରସ୍ୱତୀଙ୍କ ମନ୍ଦିର ସମ୍ମୁଖସ୍ଥ ଯମୁନା ନଦୀ ପାଖରେ ବିଜେ କରିଥିଲେ । ଜଣେ ପୂଜାପଣ୍ଡା ଉଗ୍ରସେନ ବେଶରେ ଭେଟ ହୋଇ ଦଣ୍ଡପ୍ରଣାମ କରିଥିଲେ । ଏହି ନୀତି ସମୟରେ ଠାକୁରଙ୍କ ମସ୍ତକ ଉପରେ ବେହେରା ଖୁଣ୍ଟିଆ ସପ୍ତଫେଣୀ ବାସୁକୀ ଧରି ଚାଲିଥିଲେ । ଉଗ୍ରସେନଙ୍କ ଦଣ୍ଡପ୍ରଣାମ ପରେ ମୁଦିରସ୍ତ ପ୍ରସାଦ ଲାଗି କରିଥିଲେ । ଏହାପରେ ନାଭିକଟା ମଣ୍ଡପଠାରେ ମଦନମୋହନ ଖଟଶେଯ ଉପରେ ବିଜେ କରିଥିଲେ । ତାଙ୍କ ସହିତ ରାମକୃଷ୍ଣ ବିଜେ ହୋଇଥିଲେ । ଏହାପରେ ପୂଜାପଣ୍ଡା ନାଭିଚ୍ଛେଦ କରି ମହାସ୍ନାନ ବଢ଼ାଇଥିଲେ । ମହାଜନ ସେବକ ଠାକୁରଙ୍କୁ ଜଗମୋହନରେ ଲଗାଯାଇଥିବା ଦୋଳିରେ ବିଜେ କରାଇଥିଲେ । ମଦନମୋହନ ରାମକୃଷ୍ଣ ଦୋଳିରେ ବିଜେ କରିବା ପରେ ଶୀତଳ ଭୋଗ ସମ୍ପନ୍ନ ହୋଇଥିଲା । ଏଥିପାଇଁ ପ୍ରାୟ ୫ ଘଣ୍ଟାଧରି ଦ୍ୱାର ବନ୍ଦ ଥିବାରୁ ଦର୍ଶନାର୍ଥୀମାନେ ଶ୍ରୀଜିଉଙ୍କ ଦର୍ଶନରୁ ବଞ୍ôଚତ ହୋଇଥିଲେ । ଏହାପରେ ଭିତରେ ପାଣିପଡ଼ି ବଡ଼ସିଂହାର ଭୋଗ ଓ ପହୁଡ଼ ନୀତି ସମ୍ପନ୍ନ ହୋଇଥିଲା । ଶ୍ରୀମନ୍ଦିରରେ ଶ୍ରୀକୃଷ୍ଣଙ୍କ ଏହି ଜନ୍ମନୀତି ଦେଖିବା ପାଇଁ ବିଳମ୍ବିତ ରାତି ପର୍ଯ୍ୟନ୍ତ ଭକ୍ତଙ୍କ ଗହଳି ଲାଗିରହିଥିଲା ।
