ଭୁବନେଶ୍ୱର : ୨୦୧୭ ମସିହାରେ ରାଜ୍ୟର ଆଇନଶୃଙ୍ଖଳା ପରିସ୍ଥିତି ମୋଟାମୋଟି ଶାନ୍ତିପୂର୍ଣ୍ଣ ରହିଛି ବୋଲି ରାଜ୍ୟର ସ୍ୱରାଷ୍ଟ୍ର ବିଭାଗ ପକ୍ଷରୁ ପ୍ରକାଶିତ ଶ୍ୱେତପତ୍ରରେ ଦାବି କରାଯାଇଛି । ବିଧାୟକମାନଙ୍କୁ ବଣ୍ଟନ କରାଯାଇଥିବା ଶ୍ୱେତପତ୍ର-୨୦୧୭ ଅନୁସାରେ ରାଜ୍ୟରେ ମୋଟ ୧ଲକ୍ଷ ୩ହଜାର ୮୬୬ଟି ଧର୍ତ୍ତବ୍ୟ ଅପରାଧ ମାମଲା ପଞ୍ଜିକୃତ ହୋଇଛି । ଯାହାକି ୨୦୧୬ ମସିହାରେ ୧ଲକ୍ଷ ୩ହଜାର ୭୦୨ଟି ଥିଲା । ତେବେ ୨୦୧୭ ମସିହାରେ ରାଜ୍ୟରେ ଅପରାଧ,ଦୁଷ୍କର୍ମ, ଦଙ୍ଗା ,ଲୁଣ୍ଠନ, ଅର୍ଥନୀତିକ ଅପରାଧ ଓ ମୋଟରଯାନ ଦୁର୍ଘଟଣା ମାମଲା ବୃଦ୍ଧି ପାଇଥିବାବେଳେ ନରହତ୍ୟା, ଠକେଇ ଓ ଡକାୟତି ମାମଲା ହ୍ରାସ ପାଇଛି ବୋଲି ଶ୍ୱେତପତ୍ରରେ କୁହାଯାଇଛି । ରାଜ୍ୟରେ ୨୦୧୬ ମସିହାରେ ଦୈନିକ ହାରାହାରି ୫.୮ଟି ଧର୍ଷଣ ମାମଲା ପଞ୍ଜିକୃତ ହୋଇଥିବାବେଳେ ୨୦୧୭ ମସିହାରେ ଏହା ଦୈନିକ ହାରାହାରି ୬.୦୮କୁ ବୃଦ୍ଧି ପାଇଛି । ୨୦୧୭ ମସିହାରେ ଦୁଷ୍କର୍ମ ମାମଲା ମୋଟ ୨୨୨୧ଟି ପଞ୍ଜିକୃତ ହୋଇଥିବାବେଳେ ୨୦୧୬ରେ ଏହା ୨୧୪୪ଟି ଥିଲା । ଅର୍ଥାତ ୨୦୧୭ ମସିହାରେ ଦୈନିକ ହାରାହାରି ୬.୦୮ଜଣ ମହିଳା ଓ ନାବାଳିକା ଦୁଷ୍କର୍ମର ଶିକାର ହୋଇଛନ୍ତି । ରାଜ୍ୟର ୮ଟି ଜିଲ୍ଲାରେ ମାଓବାଦୀ ସମସ୍ୟା ଉଦ୍ବେଗଜନକ ଥିବାବେଳେ ଦିନକୁ ୩ଟି ହତ୍ୟା, ୧୧ଟି ସିନ୍ଧିଚୋରି,୮ଟି ଠକେଇ,୧୫ଟି ଯୌତୁକ ମାମଲା, ୨୫ଟି ଚୋରି ଓ ୫ଟି ଲୁଣ୍ଠନ ହେଉଥିବାବେଳେ ପ୍ରତି ସପ୍ତାହରେ ୯ଟି ଯୌତୁକଜନିତ ହତ୍ୟା ସଂଘଟିତ ହୋଇଛି । ୨୦୧୬ ମସିହାରେ ୧୯୧୪ଟିଟି ଦଙ୍ଗା ମାମଲା ପଞ୍ଜିକୃତ ଥିବାବେଳେ ୨୦୧୭ ମସିହାରେ ଏହା ବୃଦ୍ଧି ପାଇ ୨୪୦୭ଟିରେ ପହଞ୍ôଚଛି । ସେହିପରି ୨୦୧୬ରେ ୩୪ଟି ଅର୍ଥନୀତିକ ଅପରାଧ ମାମଲା ପଞ୍ଜିକୃତ ହୋଇଥିବାବେଳେ ୨୦୧୭ରେ ଏହା ବୃଦ୍ଧି ପାଇ ୫୮ରେ ପହଞ୍ôଚଛି । ରାଜ୍ୟରେ ମୋଟ ୮୭ଟି ଜେଲ୍ରେ ମୋଟ ୧୭୧୯୮ଟି ବନ୍ଦୀ ରହିବା ପାଇଁ ସ୍ଥାନ ଥିବାବେଳେ ୧୫,୬୧୪ଜଣ ବନ୍ଦୀ ରହିଥିଲେ । ଏଥିରେ ୫୪ଜଣ ବାମସାମ୍ମୁଖ୍ୟ ଚରମପନ୍ଥୀ ଓ ୧୨ଜଣ ବିଦେଶୀ ନାଗରିକ ସାମିଲ ଅଛନ୍ତି । ୨୦୧୭ ମସିହାରେ ରାଜ୍ୟ ସରକାର ପୁଲିସ୍ ବିଭାଗର ବିଭିନ୍ନ ପଦବୀରେ ମାତ୍ର ୪୬୨ଜଣଙ୍କୁ ନିଯୁକ୍ତି ଦେଇଛନ୍ତି । ୨୦୧୬ରେ ମୋଟ ପୁଲିସ କର୍ମଚାରୀଙ୍କ ସଂଖ୍ୟା ୩୦,୦୮୦ଜଣ ଥିବାବେଳେ ୨୦୧୭ରେ ଏହା ୩୦୫୪୨କୁ ବୃଦ୍ଧି ପାଇଛି ।
