ଜମ୍ମୁ-କଶ୍ମୀରର ଅଖନୁର ସେକ୍ଟରରେ ନିୟନ୍ତ୍ରଣ ରେଖା (ଏଲଓସି) ନିକଟରେ ସେନା ବାହିନୀ ଉପରେ ହୋଇଥିବା ଆକ୍ରମଣରେ ସମ୍ପୃକ୍ତ ଥିବା ତିନି ଜଣ ଆତଙ୍କବାଦୀଙ୍କୁ ମଙ୍ଗଳବାର ସକାଳେ ଆତଙ୍କବାଦ ବିରୋଧୀ ଅଭିଯାନରେ ନିପାତ କରାଯାଇଛି। ଯୋଗୱାନ ଗାଁରେ ଲୁଚି ରହିଥିବା ଏହି ଗୋଷ୍ଠୀ ଉପରେ ସୁରକ୍ଷା ବାହିନୀ ଚୂଡ଼ାନ୍ତ ଆକ୍ରମଣ କରିବା ପରେ ପୁଣି ଗୁଳିବିନିମୟ ଆରମ୍ଭ ହୋଇଥିଲା।
ସୋମବାର ସେନା ଆମ୍ବୁଲାନ୍ସ ଉପରକୁ ଗୁଳି ଚଳାଇଥିବା ଜଣେ ଆତଙ୍କବାଦୀ ସ୍ପେଶାଲ ଫୋର୍ସ ଓ ଏନଏସଜି କମାଣ୍ଡୋଙ୍କ ନେତୃତ୍ୱରେ ହୋଇଥିବା ଅପରେସନରେ ନିହତ ହୋଇଥିଲା। ଅବଶିଷ୍ଟ ଆତଙ୍କବାଦୀମାନେ ଖୋରର ଅସାନ ମନ୍ଦିର ନିକଟରେ ଘେରି ଯାଇଥିଲେ। ଅନ୍ୟ ୨ ଜଣ ଆତଙ୍କବାଦୀ ମଙ୍ଗଳବାର ଦିନ ତୀବ୍ର ଗୁଳିବିନିମୟ ନିପାତ ହୋଇଛନ୍ତି। ଏହି ଅପରେସନରେ ସେନା ୪ଟି ବିଏମ୍ପି-୨ ପଦାତିକ ଯୁଦ୍ଧ ଯାନ ସହ ହେଲିକପ୍ଟର ଓ ଡ୍ରୋନ୍ ବ୍ୟବହାର କରି ଆତଙ୍କବାଦୀଙ୍କ ଅବସ୍ଥାନ ଠାବ କରିଥିଲା। ଅନ୍ୟପଟରେ ଆତଙ୍କବାଦୀଙ୍କ ଗୁଳିରେ ଭାରତୀୟ ସେନାର ସାହସୀ କୁକୁର ‘ଫ୍ୟାଣ୍ଟମ୍’ ସହିଦ ହୋଇଛି। ଏହି ବୀର ଓ ବିଶ୍ୱସ୍ତ ସାଥୀଙ୍କ ସହିଦକୁ ସେନା ସଲାମ କରିଛି।
ଜମ୍ମୁସ୍ଥିତ ହ୍ୱାଇଟ୍ ନାଇଟ୍ କର୍ପସ୍ ଏକ୍ସରେ ଏକ ପୋଷ୍ଟରେ ଲେଖିଛି, ଆମେ ଆମର ପ୍ରକୃତ ବୀର- ବୀର ଭାରତୀୟ ସେନାର କୁକୁର, ଫ୍ୟାଣ୍ଟମ୍ ର ସର୍ବୋଚ୍ଚ ବଳିଦାନକୁ ନମସ୍କାର କରୁଛୁ।ସୂଚନାଯୋଗ୍ୟ, ସୋମବାର ସକାଳେ ସେନାର ଏକ ଆମ୍ବୁଲାନ୍ସ ଜମ୍ମୁ-କଶ୍ମୀରର ଅଖନୁର ସହରର ଯୋଗୱାନ ଅଞ୍ଚଳକୁ ଯାଉଥିଲା। ସକାଳ ୭ଟା ୨୫ ମିନିଟରେ ଯୋଗୱାନର ଶିବସାନ ମନ୍ଦିର ନିକଟବର୍ତ୍ତୀ ବଟ୍ଟାଳ ଅଞ୍ଚଳରେ ଏହି ଆକ୍ରମଣ ହୋଇଥିଲା। ଆମ୍ବୁଲାନ୍ସ ଓ ଅନ୍ୟାନ୍ୟ ଗାଡ଼ି ଉପରକୁ ୩ରୁ ୪ ଜଣ ଆତଙ୍କବାଦୀ ୧୫ରୁ ୨୦ ରାଉଣ୍ଡ ଗୁଳି ଚଳାଇଥିଲେ।
