ଭୁବନେଶ୍ୱର : ଆସନ୍ତାମାସ ୧୦ତାରିଖରୁ ୩ଦିନ ଧରି ଭୁବନେଶ୍ୱରରେ ଜିଏସଟି କାଉନସିଲର ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ । ଏଥିରେ ଉଭୟ ଜିଏସଟି ଲ’ କମିଟି ଓ ଲ’ ରିଭ୍ୟୁ କମିଟିର ସଦସ୍ୟମାନେ ଯୋଗଦେବେ । ପେଟ୍ରୋଲିୟମ ସାମଗ୍ରୀକୁ ଜିଏସଟି ଅନ୍ତର୍ଭୁକ୍ତ କରିବା ପାଇଁ ବିଭିନ୍ନ ମହଲରେ ହେଉଥିବା ଦାବି ଉପରେ ଏହି ବୈଠକରେ ଚର୍ଚ୍ଚା ହେବାର ସମ୍ଭାବନା ରହିଛି । ମିଳିଥିବା ସୂଚନା ଅନୁସାରେ ରାଜଧାନୀର ହୋଟେଲ ମେ’ୟେଫାରରେ ୩ଦିନ ଧରି ଜିଏସଟି କାଉନସିଲର ଏହି ବୈଠକ ଅନୁଷ୍ଠିତ ହେବ । ଏଥିରେ ଭାରତ ସରକାରଙ୍କ ୨୫ରୁ ୩୦ଜଣ ବରିଷ୍ଠ ଅଧିକାରୀଙ୍କ ସମେତ ବିଭିନ୍ନ ରାଜ୍ୟର ପଦାଧିକାରୀମାନେ ଯୋଗ ଦେବେ । ଜିଏସଟିି ଲ’ କମିଟିରେ ସଦସ୍ୟ ଥିବା ଭାରତ ସରକାରଙ୍କ ଅର୍ଥ ମନ୍ତ୍ରଣାଳୟ ଓ ବିଭିନ୍ନ ଏଜେନ୍ସିର ଅଧିକାରୀଙ୍କ ବ୍ୟତୀତ ଗୁଜରାଟ, ମହାରାଷ୍ଟ୍ର, କର୍ଣ୍ଣାଟକ, କେରଳ, ପଶ୍ଚିମବଙ୍ଗ ଓ ବିହାର ସରକାରଙ୍କ ପ୍ରତିନିଧି ଯୋଗଦେବେ । ସେହିପରି ଲ’ ରିଭ୍ୟୁ କମିଟିରେ ସଦସ୍ୟ ଥିବା ଆସାମ, ଓଡ଼ିଶା, ପଞ୍ଜାବ, ରାଜସ୍ଥାନ ଓ ମଧ୍ୟପ୍ରଦେଶ ସରକାରଙ୍କ ପ୍ରତିନିଧି ସାମିଲ ହେବେ । ରାଜ୍ୟରେ ପେଟ୍ରୋଲିୟମ ସାମଗ୍ରୀର ଦରବୃଦ୍ଧି ହେଉଥିବାରୁ ଏହାକୁ ଜିଏସଟିି ପରିସରଭୁକ୍ତ କରିବା ନିମନ୍ତେ ରୂପରେଖ ଉପରେ ବୈଠକରେ ଆଲୋଚନା ହେବ ବୋଲି ଜଣାପଡ଼ିଛି ।
