ଲକ୍ଷ୍ନୌ: ଆଜି ଠାରୁ ରାଜ୍ୟରେ ବିଧାୟକ ପ୍ରାର୍ଥୀମାନଙ୍କ ପାଇଁ ନାମାଙ୍କନ ବି ଆରମ୍ଭ ହୋଇଯାଇଛି । ଉତ୍ତର ପ୍ରଦେଶରେ ଏବେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହି କ୍ରମରେ ଆଗ୍ରାର ହସନୁରାମ ବି ପୁଣି ନିର୍ବାଚନ ଲଢିବାକୁ ନିଷ୍ପତ୍ତି ନେଇଛନ୍ତି । ହସନୁରାମ ଆମ୍ବେଦକର ଉତ୍ତର ପ୍ରଦେଶର ଏକ ଚର୍ଚ୍ଚିତ ନାମ । ୭୫ ବର୍ଷିୟ ହସନୁରାମ ତାଙ୍କ ଜୀବନକାଳରେ ୯୩ ଥର ନିର୍ବାଚନ ଲଢିସାରିଛନ୍ତି । ହେଲେ କୌଣସି ଥର ସେ ବିଜୟର ସ୍ୱାଦ ଚାଖିପାରି ନାହାଁନ୍ତି । ହେଲେ ଏନେଇ ତାଙ୍କ ମନରେ କୌଣସି ଅନୁତାପ ନାହିଁ । ଖେରାଗଡ ତହସିଲର ନଗଲା ଦୁହ୍ଲାଠାରେ ରହୁଥିବା ହସନୁରାମଙ୍କ ନିର୍ବାଚନ ଲଢିବା ପଛରେ କିଛି ରୋଚକ କାହାଣୀ ରହିଛି ।
୩୬ ବର୍ଷ ପୂର୍ବେ ହସନୁରାମଙ୍କୁ ଏକ ବଡ ରାଜନୈତିକ ଦଳ ପକ୍ଷରୁ ନିର୍ବାଚନରେ ଟିକେଟ ଦେବାକୁ ପ୍ରତିଶ୍ରୁତି ଦିଆଯାଇଥିଲା । ହେଲେ କୌଣସି କାରଣରୁ ତାଙ୍କୁ ଟିକେଟ ମିଳିଲା ନାହିଁ । ଏହି ରାଗରୁ ସେ ପ୍ରତିଥର ନିର୍ବାଚନ ଲଢିବାକୁ ନିଷ୍ପତ୍ତି ନେଇଗଲେ । ଏବେ ସେ ନିର୍ବାଚନ ହାରିବାରେ ରେକର୍ଡ କରିବାକୁ ପ୍ରସ୍ତୁତ ହୋଇଛନ୍ତି ।
ହସନୁରାମଙ୍କ ଜନ୍ମ ୧୯୪୭ ମସିହା ଅଗଷ୍ଟ ୧୫ ତାରିଖରେ ହୋଇଥିଲା । ଅର୍ଥାତ ଦେଶ ସ୍ୱାଧୀନ ହେବା ଦିନ ହସନୁରାମ ଜନ୍ମଗ୍ରହଣ କରିଥିଲେ । ହସନୁରାମ କହିଛନ୍ତି କି ସେ ରାଜସ୍ୱ ବିଭାଗର ଅମିନ ଭାବେ କାମ କରୁଥିଲେ । ସେହିସମୟରେ ସେ ବମପନ୍ଥୀ ଦଳର ସଦସ୍ୟ ଥିଲେ । ୧୯୮୫ ମସିହାରେ ଏକ ଆଞ୍ଚଳିକ ଦଳ ତାଙ୍କୁ ବିଧାନସଭା ପାଇଁ ପ୍ରାର୍ଥୀ କରିବାକୁ ପ୍ରତିଶ୍ରୁତି ଦେଇଥିଲା । ଏହାପରେ ସେ ଚାକିରୀ ଛାଡି ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଦେଇଥିଲେ । ହେଲେ ନିର୍ବାଚନ ସମୟରେ ତାଙ୍କ କଥା ଦେଇଥିବା ଦଳ ଟିକେଟ ଦେଇ ନଥିଲା ।
ଏହାପରେ ସେ କ୍ରମାଗତ ଭାବେ ବିଭିନ୍ନ ନିର୍ବାଚନ ଲଢି ଚାଲିଛନ୍ତି । ବିଧାନସଭା, ଲୋକସଭା ଓ ପଞ୍ଚାୟତ ନିର୍ବାଚନରେ ସେ ୯୩ ଥର ପ୍ରାର୍ଥୀ ହୋଇ ପରାଜିତ ହୋଇଛନ୍ତି । ଏବେ ସେ ୯୪ ଥର ପାଇଁ ଉତ୍ତର ପ୍ରଦେଶ ବିଧାନସଭା ନିର୍ବାଚନରେ ପ୍ରାର୍ଥୀ ହେବେ ବୋଲି ସ୍ପଷ୍ଟ କରିଛନ୍ତି । ସେ କହିଛନ୍ତି କି ୧୦୦ ଥର ନିର୍ବାଚନ ହାରି ସେ ଏକ ରେକର୍ଡ କରିବାକୁ ଚିନ୍ତା କରୁଛନ୍ତି ।
