ନୂଆଦିଲ୍ଲୀ: ବହୁ ବାଦ ବିବାଦ ପରେ ଟୋକିଓ ଅଲମ୍ପିକ ଶେଷ ହୋଇଛି । ଦୀର୍ଘ ୧୭ ଦିନ ଧରି ଟୋକିଓରେ ଚାଲିଥିବା ଅଲିମ୍ପିକ୍ସ କ୍ରୀଡ଼ା ଉଦଯାପିତ ହୋଇଯାଇଛି। ଆଡମ୍ବର ସହକାରେ ବିଭିନ୍ନ ରଙ୍ଗାରଙ୍ଗ କାର୍ୟ୍ୟକ୍ରମକୁ ନେଇ ଶେଷ ହୋଇଛି ଅଲିମ୍ପିକ୍ସ ଗେମ୍ସ । ତେବେ ଆସନ୍ତା ୨୪ ତାରିଖରୁ ଆରମ୍ଭ ହେବ ଗ୍ରୀଷ୍ମକାଳୀନ ପାରାଅଲିମ୍ପିକ୍ସ ଗେମ । ଏହା ସେପ୍ଟେମ୍ବର ୫ ତାରିଖ ପର୍ୟ୍ୟନ୍ତ ଚାଲିବ । ୨୦୨୪ରେ ପ୍ୟାରିସରେ ଅନୁଷ୍ଠିତ ହେବ ପରବର୍ତ୍ତୀ ଅଲିମ୍ପିକ ।
ସାରା ବିଶ୍ୱର ଖେଳାଳି ଏବେ ଫ୍ରାନ୍ସର ରାଜଧାନୀ ପ୍ୟାରିସରେ ଏକାଠି ହେବେ। ତେବେ ଟୋକିଏରେ ସର୍ବାଧିକ ପଦକ ହାତେଇ ଆମେରିକା ଟେବୁଲ ଟପରେ ରହିଛି । ଆମେରିକା ୧୧୩ଟି ପଦକ ସହିତ ଶୀର୍ଷରେ ରହିଛି । ସେହିପରି ୩୮ଟି ସ୍ବର୍ଣ୍ଣ ପଦକ ସହିତ ମୋଟ ୮୮ଟି ପଦକ ହାତେଇ ଚୀନ ଦ୍ବିତୀୟ ସ୍ଥାନରେ ରହିଛି । ସେହିପରି ଜାପାନ ତୃତୀୟ ସ୍ଥାନରେ ରହିଥିବା ବେଲେ ଗ୍ରେଟ ବ୍ରିଟେନ ଚତୁର୍ଥ ସ୍ଥାନରେ ରହିଛି ।
ଭାରତ ମୋଟ ୭ଟି ପଦକ ଜିତି ରେକର୍ଡ କରିଛି । ଅଲିମ୍ପିକ ଇତିହାସରେ ପୂର୍ବରୁ ଭାରତ ସର୍ବାଧିକ ୬ଟି ପଦକ ବିଜୟୀ ହୋଇଥିଲା । ତେବେ ଟୋକିଓ ଅଲିମ୍ପିକ୍ସରେ ଭାରତ ସର୍ବାଧିକ ଗୋଟିଏ ସ୍ବର୍ଣ୍ଣ ସହିତ ମୋଟ ୭ଟି ପଦକ ବିଜୟୀ ହୋଇ ରେକର୍ଡ କରିଛି । ସେହପିର ୧୨୧ ବର୍ଷର ଅପେକ୍ଷାର ଅନ୍ତ ଘଟାଇ ଆଥଲେଟିକ୍ସରେ ନୀରଜ ପ୍ରଥମ ସ୍ବର୍ଣ୍ଣ ପଦକ ବିଜୟୀ ହେବା ସହିତ ଭାରତ ପାଇଁ ଗୌରବ ଆଣିଥିଲେ । ତେବେ ଏହି ରେକର୍ଡ ସହିତ ୪୮ତମ ସ୍ଥାନରେ ରହିଥିଲେ ।
ଟୋକିଓ ୨୦୨୦ ଇଣ୍ଡିଆ ଟ୍ୱିଟର ଆକାଉଣ୍ଟ ହିନ୍ଦୀରେ ଟୁଇଟ୍ କରି କହିଛି ଯେ ଏହି ଅଲିମ୍ପିକ୍ ଗେମ୍ସ ଅନ୍ୟଠାରୁ ସମ୍ପୂର୍ଣ୍ଣ ଭିନ୍ନ ଥିଲା। ଏହି ମହାମାରୀ ମଧ୍ୟରେ ଆମେ ଯାହା ଅନୁଭବ କଲୁ, ତାହା ପୂର୍ବରୁ ଆମେ କରିସାରିଛୁ। କିନ୍ତୁ ଆମେ ଏହାକୁ ଏକ ବାସ୍ତବତାରେ ପରିଣତ କରି ପାରିଛୁ ବୋଲି ଟ୍ବିଟ କରି ପ୍ରଶଂସା କରିଛନ୍ତି।
