ମୁମ୍ବାଇ: ସାମାଜିକ କର୍ମୀ ତଥା ଏ ଯୁଗର ଗାନ୍ଧୀ ଭାବେ ସ୍ବତନ୍ତ୍ର ପରିଚୟ ଲାଭ କରିଥିବା ଆନ୍ନ ହଜାରେ ମହାରାଷ୍ଟ୍ର ସରକାରଙ୍କୁ ସମାଲୋଚନା କରିଛନ୍ତି । ମହାରାଷ୍ଟ୍ର ସରକାର ଯଦି ମଦ ଦୋକାନ ଖୋଲିପାରୁଛନ୍ତି, ତେବେ ମନ୍ଦିର କାହିଁକି ଖୋଲି ପାରୁନାହାନ୍ତି ବୋଲି ସେ ମହାରାଷ୍ଟ୍ର ସରକାରଙ୍କୁ ପ୍ରଶ୍ନ କରିଛନ୍ତି। ସେ ଆହୁରି ମଧ୍ୟ କହିଛନ୍ତି କି ଯଦି ମନ୍ଦିର ଖୋଲିବା ପାଇଁ ମୋତେ ଆନ୍ଦୋଳନ କରିବାକୁ ହେବ ତେଲେ ସେ ନିଶ୍ଚିତ ଭାବେ ଆନ୍ଦୋଳନକୁ ଓହ୍ଲାଇବେ ବୋଲି ସେ ସୂଚନା ଦେଇଛନ୍ତି।
ସୂଚନାଯୋଗ୍ୟ କୋଭିଡ଼ ପରିସ୍ଥିତି ମଧ୍ୟରେ ମହାରାଷ୍ଟ୍ର ସରକାର ମନ୍ଦିର ତଥା ଧର୍ମାନୁଷ୍ଠାନ ଖୋଲିବା ଉପରେ ବାରଣ ଲଗାଇଛନ୍ତି । ଫଳରେ ଏହି ନିଷ୍ପତ୍ତି ଉପରେ ପ୍ରଶ୍ନ ଉଠାଇ ଆନ୍ନା ହଜାରେ ପ୍ରଶ୍ନବାଣରେ ମହାରାଷ୍ଟ୍ର ସରକାରଙ୍କୁ ଘେରିଛନ୍ତି ଆନ୍ନା ହଜାରେ । ଅହମଦନଗର ଜିଲ୍ଲାର ରାଲେଗାନ ସିଦ୍ଧି ଗାଁରେ ରହୁଥିବା ଆନ୍ନା ଶନିବାର କହିଛନ୍ତି କି ମନ୍ଦିରକୁ ଖୋଲିବା ପାଇଁ ଦାବି କରୁଥିବା ଏକ ପ୍ରତିନିଧି ମଣ୍ଡଳ ତାଙ୍କୁ ଭେଟିଥିଲେ । ରାଜ୍ୟ ସରକାର ମନ୍ଦିର କାହିଁକି ଖୋଲୁ ନାହାନ୍ତି ବୋଲି ସେ ପ୍ରଶ୍ନ କରିଥିଲେ । ମନ୍ଦିର ଖୋଲିଲେ ରାଜ୍ୟବାସୀଙ୍କ ପ୍ରତି କଣ ବିପଦ ରହିଛି ଯାହା ରାଜ୍ୟ ସରକାର ଦେଖି ପାରୁଛନ୍ତି ବୋଲି ପ୍ରତିନିଧି ମଣ୍ଡଳର ଅଧିକାରୀ ତାଙ୍କୁ ପଚାରିଥିବା ନେଇ ଆନ୍ନା କହିଥିଲେ। ଯଦି କୋଭିଡ ମୁଖ୍ୟ କାରଣ କହୁଛନ୍ତି, ତେବେ ମଦ ଦୋକାନ କିପରି ଖୋଲୁଛି ବୋଲି ପ୍ରତିନିଧି ମଣ୍ଡଳୀ ମଧ୍ୟ ପ୍ରଶ୍ନ କରିଥିଲେ।
ସୂଚନାଯୋଗ୍ୟ ଉଦ୍ଧବ ଠାକରେଙ୍କ ନେତୃତ୍ବାଧୀନ ସରକାର କୋରୋନା ମହାମାରୀ ସ୍ଥିତିରେ ସୁଧାର ଆଣୁଥିବା ଦେଖିବାକୁ ମିଳିଛି । ସ୍ଥିତିରେ ସୁଧାର ଆସିବା ପରେ ଆଂଶିକ ଭାବେ ଲକଡାଉନକୁ କୋହଳ କରାଯାଇଛି । ଫଳରେ ଲୋକାଲ ଟ୍ରେନ,ବଜାର, ବ୍ୟବସାୟିକ ଅନୁଷ୍ଠାନ ପ୍ରଭୃତି ଖୋଲିବାକୁ ଅନୁମତି ପ୍ରଦାନ କରିଛନ୍ତି ସରକାର । ଏହି କ୍ରମରେ ରାଜ୍ୟରେ ମଦ ଦୋକାନ ମଧ୍ୟ ଖୋଲିଥିବା ଦେଖିବାକୁ ମିଳିଛି । ତେବେ ମନ୍ଦିର ଓ ଧାର୍ମିକ ଅନୁଷ୍ଠାନ ଗୁଡ଼ିକୁ କିନ୍ତୁ ଖୋଲିବାକୁ ଅନୁମତି ପ୍ରଦାନ କରିନାହାନ୍ତି ସରକାର । କାରଣ ଦେଶରେ ତୃତୀୟ ଲହରର ସମ୍ଭାବନାକୁ ଦେଖି ରାଜ୍ୟ ସରକାର ଏଭଳି ନିଷ୍ପତ୍ତି ନେଇଥିବା କୁହାଯାଉଛି ।
