ଭୁବନେଶ୍ୱର : ଜଗତସିଂହପୁର ଜିଲ୍ଲା ବିଜେଡିରେ ବଢ଼ୁଥିବା କନ୍ଦଳ ମଧ୍ୟରେ ଜିଲ୍ଲା ସଭାପତି ବିଷ୍ଣୁ ଦାସଙ୍କ ସମର୍ଥକମାନେ ଏକ ଗୋପନ ବୈଠକ କରି ଦଳର ସୁପ୍ରିମୋଙ୍କ ଉପରେ ଚାପ ପକାଇବାକୁ ନିଷ୍ପତି ନେଇଛନ୍ତି । ଏହା ସହିତ ବିଜେଡି ମହିଳା ସଭାନେତ୍ରୀ ପ୍ରମିଳା ମଲ୍ଲିକଙ୍କ ଏକପାଖିଆ ନିଷ୍ପତି ପାଇଁ ତାଙ୍କ ବାସଭବନ ବାହାରେ ବିକ୍ଷୋଭ କରିବାକୁ ଯୋଜନା ପ୍ରସ୍ତୁତ କରିଛନ୍ତି।
ଜିଲ୍ଲା ବିଜେଡି ସଭାପତି ବିଷ୍ଣୁ ଦାସଙ୍କ ବିରୋଧରେ ଦଳର ନେତାମାନେ କରୁଥିବା ଷଡ଼ଯନ୍ତ୍ର, ସାଂଗଠନିକ କାର୍ଯ୍ୟକ୍ରମରେ ତାଙ୍କୁ ବାରମ୍ବାର ଅଣଦେଖା ଓ ଜଗତସିଂହପୁର ଜିଲ୍ଲା ରାଜନୀତିରେ ବିଷ୍ଣୁଙ୍କ ପ୍ରଭାବ ହ୍ରାସ ପାଇଁ ଦଳୀୟ ସାଂଗଠନିକ ପଦପଦବୀରେ କଂଗ୍ରେସର ସକ୍ରିୟ ନେତାମାନଙ୍କୁ ଅବସ୍ଥାପିତ କରାଯାଇଥିବାରୁ ଏହାର ପ୍ରତିବାଦରେ ରବିବାର ବିଷ୍ଣୁ ଓ ତାଙ୍କ ସମର୍ଥକମାନଙ୍କ ଏକ ବୈଠକ ଅନୁଷ୍ଠିତ ହୋଇଯାଇଛି। ଏହାସହିତ ଗତ କିଛିଦିନ ଧରି ଜିଲ୍ଲା ରାଜନୀତିରେ ଲାଗି ରହିଥିବା ଛକାପଞ୍ଝା ଓ କନ୍ଦଳ ଏବେ ଉଗ୍ରରୂପ ନେଇଛି । ଆଜିର ବୈଠକରେ ଜଗତସିଂହପୁର, ନାଉଁଗା, ତିର୍ତୋଲ, ବିରିଡି, ରଘୁନାଥପୁର ଓ ପାରାଦୀପ ବ୍ଲକ୍ର ଦଳୀୟ ପଦପଦବୀରେ ଥିବା ୨୦୦ରୁ ଊଦ୍ଧ୍ୱର୍ ନେତା ଓ ନିର୍ବାଚିତ ଲୋକ ପ୍ରତିନିଧିମାନେ ଯୋଗ ଦେଇଥିଲେ। ସେମାନେ ଜିଲ୍ଲା ସଭାପତି ବିଷ୍ଣୁ ଦାସଙ୍କ ପାଖରେ ଜିଲ୍ଲା ସଂଗଠନରେ ଚାଲିଥିବା ବିଶୃଙ୍ଖଳାକୁ ନେଇ ବିଷୋଦଗାର କରିଥିଲେ। ଏହା ସହିତ ସେମାନେ ଏଣିକି ଦଳର କୌଣସି ସାଂଗଠନିକ କାର୍ଯ୍ୟକ୍ରମରେ ଭାଗ ନେବେ ନାହିଁ ବୋଲି ଘୋଷଣା କରିଛନ୍ତି। ସଂଗଠନକୁ ସଜାଡ଼ିବା ଦିଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତକ୍ରାଳ ହସ୍ତକ୍ଷେପ ନକରନ୍ତି ତା’ହେଲେ ସେମାନେ ବାଧ୍ୟ ହୋଇ ସମୂହ ଇସ୍ତଫା ଦେବେ ବୋଲି ଚେତାବନୀ ଦେଇଛନ୍ତି।
ବିଜେଡି ବିଧାୟିକା ରାଜଶ୍ରୀ ମଲ୍ଲିକ ଓ ବରିଷ୍ଠ ନେତା ଡାକ୍ତର ଦାମୋଦର ରାଉତଙ୍କ ସଲାସୁତରାରେ ବିଷ୍ଣୁଙ୍କ ପ୍ରଭାବ ହ୍ରାସ ପାଇଁ ବିଷ୍ଣୁ ବିରୋଧୀଙ୍କୁ ଦଳୀୟ ପଦପଦବୀରେ ଥଇଥାନ କରାଯାଇଛି। ଶ୍ରୀମତୀ ମଲ୍ଲିକ ଜିଲ୍ଲା ବିଜେଡି ମହିଳା ସଭାନେତ୍ରୀ ଅଛନ୍ତି। ଜଗତସିଂହପୁର ବ୍ଲକ୍ ସଭାନେତ୍ରୀ ଭାବେ ସୁକାନ୍ତି ଚୌଧୁରୀ ଓ ପୌରାଂଚଳ ସଭାନେତ୍ରୀ ଭାବେ ସୁପ୍ରିୟା ବିଶ୍ୱାଳ ଏବଂ ନାଉଗାଁ ବ୍ଲକ୍ର ମହିଳା ସଭାନେତ୍ରୀ ଭାବେ କଂଗ୍ରେସ ସମର୍ଥକମାନଙ୍କୁ ନିଯୁକ୍ତି ଦିଆଯାଇଛି। ଏହି ନେତ୍ରୀମାନେ ବିଜେଡିର ପ୍ରାଥମିକ ସଦସ୍ୟ ନୁହଁନ୍ତି ଓ ସେମାନେ କଂଗ୍ରେସରେ ସକ୍ରିୟ ଭୂମିକା ତୁଲାଉଥିବାରୁ ସେମାନଙ୍କୁ ତକ୍ରାଳ ବରଖାସ୍ତ ପାଇଁ ଗତ ସପ୍ତାହରେ ବିଷ୍ଣୁ ଦଳର ସଭାପତି ନବୀନ ପଟ୍ଟନାୟକଙ୍କୁ ଚିଠି ଲେଖି ଅନୁରୋଧ କରିଥିଲେ। ଆଜି ବୈଠକରେ ସେମାନଙ୍କ ନିଯୁକ୍ତିକୁ ବିରୋଧ କରାଯିବା ସହ ନବୀନଙ୍କ ତୁରନ୍ତ ହସ୍ତକ୍ଷେପ ପାଇଁ ଏହି ନେତାମାନେ ଦାବି କରିଛନ୍ତି।
