ଭୁବନେଶ୍ୱର: ବିଜେଡିରୁ ବହିଷ୍କୃତ ନେତା ଡାକ୍ତର ଦାମୋଦର ରାଉତଙ୍କୁ ଏବେ କଂଗ୍ରେସ ହିଁ ଏକମାତ୍ର ସାହାଭରସା ବୋଲି ଚର୍ଚ୍ଚା । ନୂଆ ଦଳ ଗଢ଼ିବାକୁ ଦମ୍ଭୋକ୍ତି ପ୍ରକାଶ କରିଥିବା ଡାକ୍ତର ରାଉତ ଏବେ ନୂଆ ଦଳ ପରିବର୍ତେ କଂଗ୍ରେସ ସହ ଆସନ ବୁଝାମଣା କରି ଆଗାମୀ ସାଧାରଣ ନିର୍ବାଚନରେ ୨ରୁ ୩ଟି ଆସନ ନେବା ଚକ୍କରରେ ରହିଥିବା ଜଣାପଡ଼ିଛି ।
ମିଳିଥିବା ସୂଚନା ଅନୁସାରେ ମାହାଙ୍ଗା, ନିମାପଡ଼ା, ଟାଙ୍ଗୀ, ଢେଙ୍କାନାଳ ଆଦି ସହରରେ ଡାକ୍ତର ରାଉତ ଯୋଗ ଦେଇଥିବା ସାଧାରଣ ସଭାରେ ଲୋକଙ୍କୁ ଏକଜୁଟ କରିବା ଦାୟିତ୍ୱ ସ୍ଥାନୀୟ କଂଗ୍ରେସ ନେତାମାନେ ସମ୍ଭାଳୁଥିବା ଜଣାପଡ଼ିଛି । ଖୋର୍ଦ୍ଧା ଜିଲ୍ଲାର ଟାଙ୍ଗୀଠାରେ ମହାସମାବେଶରେ ଦାମଙ୍କ ସମେତ ପିସିସି ଅଧ୍ୟକ୍ଷ ନିରଞ୍ଜନ ପଟ୍ଟନାୟକ ଓ ବାମଦଳ ଓ କଂଗ୍ରେସର ନେତାମାନେ ଯୋଗ ଦେଇ ବିଜେଡି ଓ ବିଜେପି ବିରୁଦ୍ଧରେ ସ୍ୱରକୁ ଶାଣିତ କରିଥିଲେ । ଡାକ୍ତର ରାଉତ ୧୨ତାରିଖରେ ଏରସମାରେ ଏକ ବିଶାଳ ସମାବେଶ କରି ନିଜର ପତିଆରା ପ୍ରଦର୍ଶନ ପାଇଁ ଯୋଜନା କରିଥିବାବେଳେ ଖରାପ ପାଗ ଯୋଗୁ ଏହି କାର୍ଯ୍ୟକ୍ରମକୁ ସ୍ଥଗିତ ରଖିଛନ୍ତି ।
ଏକ ଉଲ୍ଲେଖନୀୟ ଘଟଣାକ୍ରମରେ ଡାକ୍ତର ରାଉତଙ୍କ ନୂଆଦଳ ଗଠନ ପ୍ରସଙ୍ଗରେ ବରିଷ୍ଠ ନେତା ତଥା କେନ୍ଦ୍ରାପଡ଼ାର ପୂର୍ବତନ ସାଂସଦ ବୈଜୟନ୍ତ ପଣ୍ଡା ସାକ୍ଷାତ କରିଥିଲେ ମଧ୍ୟ ତାଙ୍କୁ ନିରାଶ ହେବାକୁ ପଡ଼ିଛି । ବୁଧବାର ସକାଳ ସାଢ଼େ ୮ଟାରେ ପ୍ରାୟ ୨୦ମିନିଟ୍ ଧରି ଡାକ୍ତର ରାଉତ ଓ ଶ୍ରୀ ପଣ୍ଡାଙ୍କ ମଧ୍ୟରେ ଆଲୋଚନା ହୋଇଥିଲା ।ଶ୍ରୀ ପଣ୍ଡାଙ୍କ ଘରକୁ ଯାଇ ଡାକ୍ତର ରାଉତ ଏହି ଆଲୋଚନା କରିଥିଲେ ମଧ୍ୟ ନୂଆଦଳ ଗଠନ ପ୍ରସଙ୍ଗରେ ବୈଜୟନ୍ତ ରୋକଠୋକ ମନା କରିଦେଇଥିବା ଜଣାପଡ଼ିଛି । ନୂଆ ଦଳ କିମ୍ବା କୌଣସି ଦଳରେ ଏବେ ଯୋଗ ଦେବାର ନାହିଁ ବୋଲି ବୈଜୟନ୍ତ କହିଥିବା ସୂଚନା ମିଳିଛି ।
ବିଜୁ ଅନୁଗତଙ୍କୁ ନେଇ ଡାକ୍ତର ରାଉତ ଏକ ନୂଆ ରାଜନୀତିକ ସମୀକରଣ କରିବାକୁ ଚାହୁଁଥିବାବେଳେ ବରିଷ୍ଠ ନେତା ବିଜୟ ମହାପାତ୍ର, ଦିଲ୍ଲୀପ ରାୟ ଓ ବୈଜୟନ୍ତ ପଣ୍ଡା ଧରାଛୁଆଁ ଦେଉନଥିବାରୁ ବାଧ୍ୟ ହୋଇ ସେ ଏବେ କଂଗ୍ରେସ ମୁହାଁ ହୋଇଛନ୍ତି । ଉଭୟ ବିଜେଡି ଓ ବିଜେପି ସରକାର ବିରୁଦ୍ଧରେ କଂଗ୍ରେସ ଚଳାଇଥିବା ପ୍ରଚାର ଅଭିଯାନରେ ଦାମଙ୍କୁ ଷ୍ଟାର କ୍ୟାମ୍ପେନର ଭାବେ କଂଗ୍ରେସ ଏବେ ଉପଯୋଗ କରିବାରେ ଲାଗିଛି । ସବୁଠୁ ବଡ଼ କଥା ହେଲା ବିଜୁ ଅନୁଗତମାନେ(ବିଜେଡିରେ ନଥିବା ନେତା) ଏବେ ଦାମଙ୍କ ଉପରେ ଭରସା କରିପାରୁନଥିବାରୁ ଖୁଲମଖୁଲା ଆଗକୁ ଆସିପାରୁନାହାନ୍ତି କିମ୍ବା ସହଯୋଗର ହାତ ବଢ଼ାଉନାହାନ୍ତି ।
ଦାମଙ୍କ ରଣନୀତି ଅନୁସାରେ କଂଗ୍ରେସ ସହ ଆସନ ବୁଝାମଣା କରି ଡାକ୍ତର ରାଉତ ୩ଟି ସିଟ୍ ହାତେଇବାକୁ ଚାହିଁଛନ୍ତି । ତେବେ ଏସବୁ ସିଟ୍ କେଉଁଠି ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନି ।
