ନୂଆଦିଲ୍ଲୀ: ଜାମ୍ମୁ କାଶ୍ମୀରରେ ଆତଙ୍କବାଦୀଙ୍କ ସହ ମୁହାଁମୁହିଁ ହେବା ସମୟରେ ଜେସିଓ (ଜୁନିଅର କମିଶନ ଅଫିସର) ଏବଂ ଚାରିଜଣ ସେନା ଶହୀଦ ହୋଇଛନ୍ତି। ସକାଳ ସମୟରୁ ରଜୌରୀ ସେକ୍ଟରର ପୀର ପଞୌ୍ଜଲ ରେଞ୍ଜରେ ଘଟିଥିବା ଏହି ଏନକାଉଣ୍ଟରରେ, JCO ସମେତ ୫ ଜଣ ଯବାନ ଶହୀଦ ହୋଇଛନ୍ତି। ଏହି ଶହୀଦ ସେନାମାନେ ଆତଙ୍କୀମାନଙ୍କୁ କଡ଼ା ଜବାବ ଦେଇଥିଲେ।
ଆଜି ସକାଳୁ ଜମ୍ମୁ କାଶ୍ମୀରର ବିଭିନ୍ନ ସ୍ଥାନରେ ଆତଙ୍କୀମାନେ ଆକ୍ରମଣ କରିବା ଆରମ୍ଭ କରିଦେଇଥିଲେ। ସେମାନଙ୍କୁ ଭାରତୀୟ ସେନା କଡ଼ା ଜବାବ ଦେଇଥିଲେ। ଅନନ୍ତନାଗ ଏବଂ ବାନ୍ଦିପୋରାରେ ମଧ୍ୟ ଏନକାଉଣ୍ଟର ହୋଇଥିଲା। ଅନନ୍ତନାଗ ଜିଲ୍ଲାର ଭେରିନାଗ ଅଞ୍ଚଳର ଖାଗୁଣ୍ଡରେ ଅବରୋଧ କରି ଏକ ସର୍ଚ୍ଚ ଅପରେସନ ଆରମ୍ଭ ହୋଇଥିଲା। ଆତଙ୍କବାଦୀମାନେ ସୁରକ୍ଷା ବାହିନୀ ଉପରେ ଗୁଳି ଚଳାଇବାରୁ ଏହି ଅପରେସନ୍ ଏନକାଉଣ୍ଟରରେ ପରିଣତ ହୋଇଥିଲା। ସୁରକ୍ଷା ବାହିନୀଙ୍କ ଗୁଳିରେ ଆତଙ୍କବାଦୀଙ୍କ ମୃତ୍ୟୁ ହୋଇଥିବା ସୂଚନା ରହିଛି।
ଦ୍ୱିତୀୟ ଏନକାଉଣ୍ଟର ବେଳେ ବାନ୍ଦିପୋରା ଜିଲ୍ଲାର ହାଜିନ୍ ଅଞ୍ଚଳର ଗୁଣ୍ଡଜାଙ୍ଗୀରଠାରେ ଏକ ଲସ୍କର-ଏ-ତୋଏବା ଆତଙ୍କବାଦୀ ନିହତ ହୋଇଥିଲେ। କାଶ୍ମୀରର ଇନ୍ସପେକ୍ଟର ଜେନେରାଲ ବିଜୟ କୁମାର କହିଛନ୍ତି, ନିହତ ଆତଙ୍କବାଦୀ ନିଷିଦ୍ଧ ଆତଙ୍କବାଦୀ ସଂଗଠନ ଲଶ୍କର-ଏ-ତାଇବା (ଟିଆରଏଫ) ର ଇମତିଆଜ ଅହମ୍ମଦ ଦାର ବୋଲି ଜଣାପଡିଛି। ନିକଟରେ ଶାହାଗୁଣ୍ଡ ବାନ୍ଦିପୋରାରେ ଜଣେ ସାଧାରଣ ନାଗରିକଙ୍କ ହତ୍ୟାରେ ସେ ସମ୍ପୃକ୍ତ ଥିଲେ। ଆଜି ଦୁଇଜଣ ଆତଙ୍କବାଦୀ ନିହତ ହୋଇଛନ୍ତି।
