ମୁମ୍ବାଇ: ବିଗବସ-୧୩ର ବିଜେତା ତଥା ଅଭିନେତା ସିଦ୍ଧାର୍ଥ ଶୁକ୍ଳାଙ୍କର ଆଜି ହୃଦଘାତରେ ଦେହାନ୍ତ ହୋଇଯାଇଛି । ୪୦ ବର୍ଷ ବୟସରେ ସିଦ୍ଧାର୍ଥଙ୍କର ଦେହାନ୍ତ ହୋଇଥିବା ଜଣାପଡ଼ିଛି । ଟିଭି ପରଦାରେ ସିଦ୍ଧାର୍ଥ ବେଶ ସକ୍ରିୟ ରହିଥିଲେ । ସୋସିଆଲ ମିଡ଼ିଆରେ ମଧ୍ୟ ବେଶ ଲୋକପ୍ରିୟତା ହାସଲ ମଧ୍ୟ କରିଥିଲେ ।
ମିଳିଥିବା ସୂଚନା ମୁତାବକ ସିଦ୍ଧାର୍ଥ ଗତକାଲି କିଛି ଔଷଧ ଖାଇଥିଲେ । ତେବେ ଔଷଧ ଖାଇବା ପରେ ତାଙ୍କ ଛାତିରେ ଯନ୍ତ୍ରଣା ଅନୁଭବ କରିଥିଲେ । ପରେ ତାଙ୍କୁ ଡାକ୍ତରଖାନା ନିଆଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ସିଦ୍ଧାର୍ଥଙ୍କ ମୃତ୍ୟୁ ତାଙ୍କ ପ୍ରଶଂସକ ତଥା ପରିବାର ଲୋକଙ୍କୁ ବେଶ ଝଟକା ଲାଗିଛି ।
ଏଠାରେ କହି ରଖୁକି ମୁମ୍ବାଇରେ ୧୯୮୦ ମସିହା ଡିସେମ୍ବର ୧୨ ତାରିଖରେ ସିଦ୍ଧାର୍ଥଙ୍କ ଜନ୍ମ । କ୍ୟାରିୟର ଆରମ୍ଭରୁ ସେ ମଡେଲିଂ କରୁଥିବା ବେଳେ ୨୦୦୪ ମସିହାରେ ସିନେ ଜଗତରେ ପଦ ଥାପିଥିଲେ । ୨୦୦୮ ମସିହାରେ ‘ବାବୁଲ କା ଆଙ୍ଗନ ଛୁଟେ’ ନାମକ ଏକ ଟିଭି ଶୋ ମାଧ୍ୟମରେ ଛୋଟ ପରଦାରେ କ୍ୟାରିୟର ଆରମ୍ଭ କରିଥିଲେ।ବାଳିକା ବଧୁରେ ଶିବ ଚରିତ୍ରରେ ସେ ବେଶ ପ୍ରସିଦ୍ଧି ଲାଭ କରିଥିଲେ । ତେବେ ଏହା ପରେ ତାଙ୍କୁ ଅନେକ ସିରିଏଲରେ କାମ କରିବାର ସୁଯୋଗ ମିଳିଥିଲା । ଏହା ବ୍ୟତୀତ ସେ ରିଆଲିଟି ସୋ ଖତରୋ କେ ଖିଲାଡ଼ି ଓ ବିଗବସର ବିଜେତା ମଧ୍ୟ ହୋଇଥିଲେ ।
ନିକଟରେ ସେ ବ୍ରୋକେନ ବଟ ବିୟୁଟିଫୁଲ ନାମକ ଏକ ଓ୍ୱେବ ସିରିଜରେ ମଧ୍ୟ କାମ କରିଥିଲେ । ଏହି ଓ୍ୱେବ ସିରିଜଟି ବେସ ଲୋକପ୍ରିୟତା ହାସଲ କରିଥିଲା । ସେହିପରି ତାଙ୍କୁ କରଣ ଜୋହର ପ୍ରଯୋଜିତ ବମ୍ପଟି ଶର୍ମାକି ଦୁଲହନିଆରେ ଦେଖିବାକୁ ମିଳିଥିଲା । ଶେଷଥର ପାଇଁ ସିଦ୍ଧାର୍ଥଙ୍କୁ ଡାନ୍ସ ଦିଓ୍ୱାନାରେ ଦେଖିବାକୁ ମିଳିଥିଲା । ତାଙ୍କର ଏପରି ଅଚାନକ ମୃତ୍ୟୁରେ ପରିବାର ଓ ପ୍ରଂଶସକମାନଙ୍କ ବେଶ ଝଟକା ଲାଗିଥିବା ଜଣାପଡ଼ିଛି ।
