ଭୁବନେଶ୍ବର (ଓଡ଼ିଶା ୱେୟାର) : ଶ୍ରୀମନ୍ଦିରର କର୍ପସ ଫଣ୍ଡ ଓ ଟେମ୍ପୁଲ ଫଣ୍ଡ ପୁରୀ ଷ୍ଟେଟ ବ୍ୟାଙ୍କ ଶାଖାରେ ଜମା ରହିବ । ମୋଟ ୫୪୮ କୋଟି ଟଙ୍କା ୫.୧୮ ପ୍ରତିଶତ ସୁଧହାରରେ ବର୍ଷକ ପାଇଁ ସ୍ଥାୟୀ ଜମା ବା ଫିକ୍ସଡ୍ ଡିପୋଜିଟ ଆକାରରେ ରହିବ । ଏ ସମ୍ପର୍କରେ ଆଜି ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା ସୂଚନା ଦେଇଛନ୍ତି ।
ଗତ ୨୦୨୦ରେ ଶ୍ରୀମନ୍ଦିର ପାଣ୍ଠି ଏକ ଘରୋଇ ବ୍ୟାଙ୍କ ୟେସ ବ୍ୟାଙ୍କରେ ରଖାଯିବାକୁ ନେଇ ବିବାଦ ଉଠିଥିଲା । ମନ୍ଦିର ପରିଚାଳନା କମିଟି ଓ ଫାଉଣ୍ଡେସନ ଫଣ୍ଡ କମିଟି ଅଗୋଚରରେ ଏହି ପାଣ୍ଠିକୁ ରାଷ୍ଟ୍ରାୟତ୍ତ ବ୍ୟାଙ୍କ ବଦଳରେ ଘରୋଇ ବ୍ୟାଙ୍କରେ ଜମା ରଖିବା ପ୍ରସଙ୍ଗ ସେତେବେଳେ ଖୁବ ବିବାଦୀୟ ହୋଇପଡ଼ିଥିଲା । ଏହି ପ୍ରସଙ୍ଗରେ ରାଜନୈତିକ ଦଳମାନେ ସରକାରଙ୍କୁ ଟାର୍ଗେଟ କରିଥିଲେ ।
ଏହି ବିବାଦ ପରେ ସରକାର ୟେସ ବ୍ୟାଙ୍କରେ ଥିବା ଶ୍ରୀମନ୍ଦିରର ୫୯୨ କୋଟି ଟଙ୍କା ଉଠାଇବାକୁ ବାଧ୍ୟ ହୋଇଥିଲେ । ଗତ ବର୍ଷ ଏହି ଟେଣ୍ଡର ଆହ୍ବାନ ପରେ ଏସବୁ ପାଣ୍ଠିକୁ କେତେକ ରାଷ୍ଟ୍ରାୟତ୍ତ ବ୍ୟାଙ୍କରେ ରଖାଯାଇଥିଲା ।
