ନୂଆଦିଲ୍ଲୀ: ବିଶ୍ବର ଦୁର୍ଦ୍ଦାନ୍ତ ଆତଙ୍କବାଦୀ ଓସାମା ବିନ ଲାଦେନର ସମ୍ପର୍କୀୟ ଭାଇର ଘର ବିକ୍ରି ହେବାକୁ ଯାଉଛି । ଆମେରିକାରେ ଥିବା ଏହି ଘରର ମୂଲ୍ୟ ୨୦୮ କୋଟି ଟଙ୍କାରେ ବିକ୍ରି ହେବ ବୋଲି ଜଣାପଡ଼ିଛି । ତେବେ ୯୦ ବର୍ଷ ପୁରୁଣା ଏହି ଘରଟି ଆମେରିକାର ଲସ ଆଞ୍ଜେଲସର ୬୩୪ ଷ୍ଟୋନ କୈଲୟୋନ ରୋଡ଼ ଅଞ୍ଚଳରେ ରହିଥିବା ଜଣାପଡ଼ିଛି ।
୧୯୩୧ ମସିହାରେ ଏହି ବିଳାସମୟ ବଙ୍ଗଳାର ନିର୍ମାଣ କରାଯାଇଥିଲା । ୨ ଏକର ପରିବ୍ୟାପ୍ତ ଜମି ଉପରେ ଏହି ବିଶାଳକାୟ ଘରଟି ରହିଛି । ୭୧୦୦ ବର୍ଗଫୁଟ ରେ ନିର୍ମାଣଧୀନ ଏହି ଘରେ ୭ଟି ବେଡରୁମ ଓ ୫ଟି ବାଥରୁମ ରହିଛି । ତେବେ ଏକ ରିପୋର୍ଟ ଅନୁଯାୟୀ ଓସାମା ବିନ ଲାଦେନର ସମ୍ପର୍କୀୟ ଭାଇ ଇବ୍ରାହିମ ବିନ ଲାଦେନ ୧୯୮୩ ମସିହାରେ ଏହି ଘରକୁ ୧୬.୫୩ ଆମେରିକୀୟ ଡଲାର (ଭାରତୀୟ ଟଙ୍କାର ପ୍ରାୟ ୧୨ କୋଟି ଟଙ୍କା)ରେ କିଣିଥିବା ଜଣାଯାଏ ।
୨୦୦୧ ମସିହାରେ ୯ ସେପ୍ଟେମ୍ବରରେ ହୋଇଥିବା ଓ୍ବାଲ୍ଡ ଟ୍ରେଡ଼ ସେଣ୍ଟର ଉପରେ ଆତଙ୍କବାଦୀ ଆକ୍ରମଣ ସମୟରେ ଇବ୍ରାହିମ ବିଦେଶରେ ଛୁଟି ବିତାଉଥିଲା । ମାତ୍ର ଏହି ଆକ୍ରମଣ ପରଠାରୁ ଇବ୍ରାହିମ ଆମେରିକା ଫେରିନଥିବା କୁହାଯାଉଛି । ସେବେଠାରୁ ହିଁ ସେହି ବଙ୍ଗଳା ଖାଲି ପଡ଼ିଥିବା ଜଣାଯାଏ ।
ତେବେ ଏହି ବଙ୍ଗଳା ନିକଟରେ ରହିଛି ଆଉ ଦୁଇଟି ଭବ୍ୟ ବଙ୍ଗଳା । ସେଥିମଧ୍ୟରୁ ଗୋଟିଏ ଇଜ୍ରାଏଲରେ ଜନ୍ମିତ ବେନି ଆଲଗମ ଓ ଅନ୍ୟଟି ଜେଫରି କପଲାନଙ୍କ ଘର । ବେଲିଙ୍କ ଘର ପ୍ରାୟ ୩୬ ହଜାର ବର୍ଗଫୁଟରେ ନିର୍ମାଣ ହୋଇଥିବା ବେଳେ ଜେଫରିଙ୍କ ଘର ୪୩ ହଜାର ବର୍ଗଫୁଟରେ ନିର୍ମାଣ କରାଯାଇଛି ।
ତେବେ ଇବ୍ରାହିମ ତାଙ୍କ ଘର ଚତୁଃପାର୍ଶ୍ବରେ ସବୁଜ ବଳୟ ସୃଷ୍ଟି କରିଥିଲେ । ମାତ୍ର ତାହା ଆଜି ଜଙ୍ଗଲରେ ପରିଣତ ହୋଇଯାଇଛି । ଏହି ଘରେ ନିର୍ମାଣ କରାଯାଇଥିବା ଫାଉଣ୍ଟେନ ମଧ୍ୟ ଭାଙ୍ଗିରୁଜି ଯାଇଥିବା ଜଣାଯାଏ ।
