ରାଜନୀତି
ଜଗୀଙ୍କୁ ସମନ କରାଯିବା ପ୍ରତିବାଦରେ କମିଟିରୁ କେଭିଙ୍କ ଇସ୍ତଫା
ଭୁବନେଶ୍ୱର (ଓଡ଼ିଶା ୱେୟାର):ବିଜେପି ବିଧାୟକ ଦଳର ନେତା କନକ ବଦ୍ଧନ ସିଂହ ଦେଓ ବିଧାନସଭା ସ୍ୱାଧୀକାର ଭଙ୍ଗ କମିଟିର ସଦସ୍ୟ ପଦରୁ ଆଜି ଇସ୍ତଫା ଦେଇଛନ୍ତି । ସେ ଆଜି ବିଧାନସଭା ଆସି ତାଙ୍କ ଇସ୍ତଫା ପତ୍ର ପ୍ରଦାନ କରିଛନ୍ତି । ଶ୍ରୀ ସିଂହଦେଓ ଇସ୍ତଫା ସମ୍ପର୍କରେ କହିଛନ୍ତି, ଓଟିଭି ନିର୍ଦ୍ଦେଶିକା ଜାଗି ମଙ୍ଗତ ପଣ୍ଡାଙ୍କୁ ସମନ ପ୍ରତିବାଦରେ ସେ ଏହି ପଦକ୍ଷେପ ନେଇଛନ୍ତି । ସ୍ୱାଧୀକାର ଭଙ୍ଗ ନେଇ ତାରା ବାହିନୀପତି ନୋଟିସ ଦେଇଥିଲେ । ହେଲେ ସେ କେଉଁଠି ଜାଗି ମଙ୍ଗତଙ୍କୁ ସମନ କରିବାକୁ କହିନଥିଲେ । ଏଭଳି ନୋଟିସ ଆସିଲେ ସାଧାରଣତଃ ସମ୍ପାଦକ, ରିପୋର୍ଟରଙ୍କୁ ସମନ ହୋଇଥାଏ । ଜାଗି ମଙ୍ଗତ ପଣ୍ଡା ରାଜ୍ୟର ଜଣେ ଜଣାଶୁଣା ମହିଳା ଶିଳ୍ପୋଦ୍ୟୋଗୀ । ତାଙ୍କୁ ଏମିତି ସର୍ବସାଧାରଣରେ ହଇରାଣ କରାଯିବା ମହିଳା ବିରୋଧୀ ବୋଲି ସେ କହିଥିଲେ । ଏଣୁ କମିଟି ଅଧ୍ୟକ୍ଷଙ୍କ ଏଭଳି କାରବାର ପଛରେ ରାଜନୈତିକ ଗନ୍ଧ ବାରି ହେଉଛି । ରାଜନୈତିକ କାରଣରୁ ତାଙ୍କୁ ସମନ କରାଯାଇଥିବା ସ୍ପଷ୍ଟ ହେଉଛି ବୋଲି ଶ୍ରୀ ସିଂହଦେଓ କହିଛନ୍ତି ।