ରାଜନୀତି
ତଥାଗତଙ୍କ ଅପ୍ରତ୍ୟାଶିତ ଅବସର,ନିର୍ବାଚନ ଲଢ଼ିବେନି
ଭୁବନେଶ୍ୱର(ଓଡ଼ିଶା ୱେୟାର): ବରିଷ୍ଠ ବିଜେଡି ସାଂସଦ ତଥାଗତ ଶତପଥୀ ଅପ୍ରତ୍ୟାଶିତ ଭାବେ ସକ୍ରିୟ ରାଜନୀତିରୁ ଅବସର ନେବାକୁ ଘୋଷଣା କରିଛନ୍ତି। ନିଜର ୧୩ବର୍ଷର ପୁଅ ଚାପରେ ସେ ରାଜନୀତିକ ଛାଡ଼ି ସାମ୍ବାଦିକତାରେ ମନୋନିବେଶ କରିବେ ବୋଲି ଶ୍ରୀ ଶତପଥୀ ଗଣମାଧ୍ୟମକୁ କହିଛନ୍ତି। ଏହାସହିତ ତାଙ୍କ ଅଫିସ ଦ୍ୱାରା ପରିଚାଳିତ ହେଉଥିବା ଟ୍ୱିଟର ହ୍ୟାଣ୍ଡେଲରେ ମଧ୍ୟ ତଥାଗତଙ୍କୁ ଢେଙ୍କାନାଳର ପୂର୍ବତନ ସାଂସଦ ବୋଲି ଉଲ୍ଲେଖ କରାଯାଇଛି।
ଗଣମାଧ୍ୟମକୁ ଆଜି ଶ୍ରୀ ଶତପଥୀ ଦେଇଥିବା ସୂଚନା ଅନୁସାରେ ସେ ଆସନ୍ତାକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିବେ ତଥା ଆଉ ନିର୍ବାଚନ ଲଢ଼ିବେ ନାହିଁ ବୋଲି ନେଇଥିବା ନିଷ୍ପତ୍ତି ସମ୍ପର୍କରେ ଆନୁଷ୍ଠାନିକ ଭାବେ ଅବଗତ କରାଇବେ। କୌଣସି ରାଜନୀତିକ ଦଳରେ ସାମିଲ ହେବେ ନାହିଁ ଓ ତାଙ୍କ ମାଲିକାନାରେ ଥିବା ସମ୍ବାଦପତ୍ର ଉପରେ ଅଧିକ ଧ୍ୟାନକେନ୍ଦ୍ରିତ କରିବେ ବୋଲି କହିଛନ୍ତି। ଏହାବ୍ୟତୀତ ବିଜେପିରେ ସାମିଲ ହେବା ପାଇଁ ସେ ଏଭଳି ନିଷ୍ପତ୍ତି ନେଇଥିବା ଚର୍ଚ୍ଚାକୁ ମଧ୍ୟ ଶ୍ରୀ ଶତପଥୀ ଖଣ୍ଡନ କରିଛନ୍ତି।
ତେବେ ଢେଙ୍କାନାଳ ସଦର ନିର୍ବାଚନମଣ୍ଡଳରୁ ବିଧାୟକ ଭାବେ ଜନତା ଦଳ ଟିକେଟରୁ ବିଜୟୀ ହୋଇ ନିଜର ରାଜନୀତିକ କ୍ୟାରିୟର ଆରମ୍ଭ କରିଥିବା ଶ୍ରୀ ଶତପଥୀ ୧୯୯୮, ୨୦୦୪, ୨୦୦୯ ଓ ୨୦୧୪ ମସିହାରେ ବିଜେଡି ଟିକେଟରେ ସାଂସଦ ଭାବେ ବିଜୟୀ ହୋଇଥିଲେ।