ବିଜେପିରେ ମିଶିଲେ ଅଶ୍ୱିନୀ ବୈଷ୍ଣବ

ଭୁବନେଶ୍ୱର(ଓଡ଼ିଶା ୱେୟାର): ରାଜ୍ୟସଭା ପ୍ରାର୍ଥୀ ପୂର୍ବତନ ଆଇଏଏସ ଅଫିସର ଅଶ୍ୱିନୀ ବୈଷ୍ଣବ ଆଜି ବିଧିବଦ୍ଧ ଭାବେ ବିଜେପିରେ ଯୋଗ ଦେଇଛନ୍ତି। ବିଜେପି ତାଙ୍କୁ ଗତକାଲି ରାଜ୍ୟସଭା ପ୍ରାର୍ଥୀ ଭାବେ ଘୋଷଣା କରିଥିଲା। ବିଜେଡି ମଧ୍ୟ ବିଜେପିର ପ୍ରାର୍ଥୀ ଶ୍ରୀ ବୈଷ୍ଣବଙ୍କୁ ସମର୍ଥନ ଦେବ ବୋଲି ଘୋଷଣା କରିଥିଲା। ଅବଶ୍ୟ ଶ୍ରୀ ବୈଷ୍ଣବ ବିଜେପିର ସଦସ୍ୟ ହୋଇ ନ ଥିବାରୁ ଆଜି ଦଳରେ ମିଶି ସଦସ୍ୟତା ଗ୍ରହଣ କରିଛନ୍ତି। ସେ ବିଜେପି କାର୍ଯ୍ୟାଳୟକୁ ଯାଇ ଦଳର ରାଜ୍ୟ ସଭାପତି ସାଂସଦ ବସନ୍ତ ପଣ୍ଡା ଓ ଅନ୍ୟ ନେତାମାନଙ୍କ ଉପସ୍ଥିତିରେ ସାମିଲ ହୋଇଥିଲେ। ଶ୍ରୀ ପଣ୍ଡା ତାଙ୍କୁ ଦଳରେ ସ୍ୱାଗତ କରିବା ସହ ସେ ରାଜ୍ୟସଭା ପ୍ରାର୍ଥୀ ହୋଇଥିବା ନେଇ ସୂଚନା ଦେଇଥିଲେ। ଦଳର ଅନୁରୋଧକ୍ରମେ ବିଜେଡି ତାଙ୍କ ପ୍ରାର୍ଥୀଙ୍କୁ ସମର୍ଥନ ଦେବାକୁ ଘୋଷଣା କରିଥିବାରୁ ଶ୍ରୀ ପଣ୍ଡା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଥିଲେ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତକାଲି ଶ୍ରୀ ବୈଷ୍ଣବଙ୍କ ନାମ ବିଜେଡିର ରାଜ୍ୟସଭା ପ୍ରାର୍ଥୀ ଭାବେ ପ୍ରଥମେ ଘୋଷଣା କରିଥିଲେ। କିନ୍ତୁ ପରେ ସେ ବିଜେଡିର ନୁହେଁ ବିଜେପିର ପ୍ରାର୍ଥୀ ଓ ତାଙ୍କୁ ବିଜେଡି ସମର୍ଥନ ଦେବ ବୋଲି କହିଥିଲେ। ଅଟଳବିହାରୀ ବାଜପାୟୀ ପ୍ରଧାନମନ୍ତ୍ରୀ ଥିଲାବେଳେ ଶ୍ରୀ ବୈଷ୍ଣବ ତାଙ୍କର ବ୍ୟକ୍ତିଗତ ସଚିବ ଥିଲେ। ହେଲେ ତାଙ୍କ ନାମ ରାଜ୍ୟସଭା ପ୍ରାର୍ଥୀ ଭାବେ ଘୋଷଣା ପରେ ସୋଶାଲ ମିଡିଆରେ ଭିନ୍ନ ପରିଚୟ ତାଙ୍କର ଆସୁଛି। ଆଇଏଏସରୁ ଅବସର ପରେ ସେ ବିଭିନ୍ନ କମ୍ପାନୀର ନିର୍ଦ୍ଦେଶକ ନିର୍ଦ୍ଦେଶକ ଅଛନ୍ତି। ତାଙ୍କର ଏହି ପରିଚୟ କଥା ପଦାକୁ ଆସିଲା ପରେ ରାଜନୀତିକ ଚର୍ଚ୍ଚା ଆରମ୍ଭ ହୋଇଛି।