ନୂଆଦିଲ୍ଲୀ : ୱେଷ୍ଟଇଣ୍ଡିଜର ମହାନ ବ୍ୟାଟସମ୍ୟାନ ବ୍ରାଏନ ଲାରା ଓ ଦକ୍ଷିଣ ଆଫ୍ରିକାର ପୂର୍ବତନ ଘାତକ ବୋଲର ଡେଲ୍ ଷ୍ଟେନ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ସହ ସାମିଲ ହୋଇଛନ୍ତି। ହାଇଦ୍ରାବାଦ ସନରାଇଜର୍ସ ଲାରାଙ୍କୁ ବ୍ୟାଟିଂ ଏବଂ ଷ୍ଟେନଙ୍କୁ ବୋଲିଂ ଭାବେ ନିଯୁକ୍ତ ଦେଇଛି । ଟମ୍ ମୁଡି ଦଳର ମୁଖ୍ୟ କୋଚ୍ ରହିବେ। ସହାୟକ କୋଚ୍ ଭୂମିକା ନିର୍ବାହ କରିବେ ଅଷ୍ଟ୍ରେଲିଆର ପୂର୍ବତନ ଓପନିଂ ବ୍ୟାଟସମ୍ୟାନ ସାଇମନ କାଟିଚ୍ । ଏହା ବ୍ୟତୀତ ପୂର୍ବତନ ଭାରତୀୟ କ୍ରିକେଟର ହେମାଙ୍ଗ ବଦାନୀଙ୍କୁ ଫିଲ୍ଡିଂ କୋଚ୍ ଦାୟିତ୍ଵ ଦିଆଯାଇଛି। ପୂର୍ବରୁ ମୁଥେୟା ମୁରଲୀଧରଣଙ୍କ ପରି ଖେଳାଳି ଦଳରେ ରହିଛନ୍ତି। ମୁଥେୟା ସ୍ପିନ ବୋଲରଙ୍କୁ ପ୍ରଶିକ୍ଷଣ ଦେବା ବ୍ୟତୀତ ଦଳ ପାଇଁ ରଣନୀତି ପ୍ରସ୍ତୁତ କରନ୍ତି।
ସୂଚନାଯୋଗ୍ୟ, ସନରାଇଜର୍ସ ହାଇଦ୍ରାବାଦ ୨୦୨୧ ସିଜିନରେ ପଏଣ୍ଟ ତାଲିକାରେ ସର୍ବନିମ୍ନ ସ୍ଥାନରେ ରହିଥିଲା। ଦଳ ୧୪ଟି ମ୍ୟାଚ୍ରୁ ମାତ୍ର ୩ଟିରେ ବିଜୟୀ ହୋଇ ୧୧ଟିରେ ପରାଜିତ ହୋଇଥିଲା। ଏହା ମଧ୍ୟରେ ଡେଭିଡ୍ ଓ୍ଵାର୍ଣ୍ଣରଙ୍କଠୁ ଅଧିନାୟକତ୍ଵ ଛଡାଇ ନିଆଗଲା। କେନ ଓ୍ଵିଲିୟମସନଙ୍କୁ ଅଧିନାୟକ ନିଯୁକ୍ତ କରାଯାଇଥିଲେ ମଧ୍ୟ ଦଳ ପ୍ରଦର୍ଶନରେ କୌଣସି ସୁଧାର ଆସିନଥିଲା। ଏହା ପରେ ହାଇଦ୍ରାବାଦ ପକ୍ଷରୁ ସର୍ବାଧିକ ରନ ହାସଲକାରୀ ବ୍ୟାଟସମ୍ୟାନ ଡେଭିଡ୍ ଓ୍ଵାର୍ଣ୍ଣର ଏବଂ ତାରକା ସ୍ପିନର ରଶିଦ ଖାନ ମଧ୍ୟ ଦଳରୁ ଅଲଗା ହୋଇଗଲେ।
