ଓଡ଼ିଆ ପୁଅ ସତ୍ୟନାରାୟଣ ପ୍ରଧାନ ହେଲେ ଏନସିବି ଡିଜି

ନୂଆଦିଲ୍ଲୀ: ବରିଷ୍ଠ ପୋଲିସ ଅଧିକାରୀ ସତ୍ୟନାରାୟଣ ପ୍ରଧାନଙ୍କୁ ଏନସିବିର ଡାଇରେକ୍ଟର ଜେନେରାଲ ଭାବେ ନିଯୁକ୍ତି ଦିଆଯାଇଛି। ଏହି ପଦରେ ସେ ଆସନ୍ତା ୨୦୨୪ ଅଗଷ୍ଟ ୩୧ ତାରିଖ ପର୍ଯ୍ୟନ୍ତ କାର୍ଯ୍ୟ କରିବେ। ଝାଡ଼ଖଣ୍ଡ କ୍ୟାଡ଼ର ଓଡ଼ିଆ ପୁଅ ସତ୍ୟ ନାରାୟଣ ବର୍ତ୍ତମାନ ଏନଡିଆରଏଫ ଡିଜି ଭାବେ କାର୍ଯ୍ୟ କରି ଆସୁଛନ୍ତି। ଏହି ପଦରେ ରହି ସେ ଏନସିବିର ଅତିରିକ୍ତ ଦାୟିତ୍ବରେ କାର୍ଯ୍ୟ କରି ଆସୁଥିଲେ।

ରାକେଶ ଅସ୍ଥାନାଙ୍କୁ ଦିଲ୍ଲୀ ପୋଲିସ କମିଶନର ଭାବେ ନିଯୁକ୍ତି ଦିଆଯିବା ପରେ ତାଙ୍କୁ ଏନସିବିର ମହାନିର୍ଦେଶକ ଅତିରିକ୍ତ ଦାୟିତ୍ୱ ଦିଆଯାଇଥିଲା। ୧୯୮୮ ବ୍ୟାଚ୍ ଗୁଜୁରାଟ କ୍ୟାଡର ଆଇପିଏସ୍ ଅଧିକାରୀ ଅତୁଲ କରୱାଲଙ୍କୁ ମଙ୍ଗଳବାର NDRF ର ମହାନିର୍ଦ୍ଦେଶକ ଭାବରେ ନିଯୁକ୍ତ କରାଯାଇଛି। କ୍ୟାବିନେଟର ନିଯୁକ୍ତି କମିଟି (ଏସିସି) ବୁଧବାର ବିଳମ୍ବିତ ରାତ୍ରିରେ ପ୍ରଧାନଙ୍କୁ ପୂର୍ଣ୍ଣକାଳୀନ ଭିତ୍ତିରେ ଏନସିବି ମହାନିର୍ଦ୍ଦେଶକ ଭାବରେ ନିଯୁକ୍ତ କରିଛି।

ପରେ କେନ୍ଦ୍ର ଗୃହ ମନ୍ତ୍ରଣାଳୟ ସଂପୃକ୍ତ ପକ୍ଷକୁ ଏସିସି (କ୍ୟାବିନେଟର ନିଯୁକ୍ତି କମିଟି) ର ଅନୁମୋଦନ ନିମନ୍ତେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି)ର ମହାନିର୍ଦେଶକ ପଦରେ ନିଯୁକ୍ତ କରିବା ପାଇଁ ସଂପୃକ୍ତ ପକ୍ଷକୁ ନିର୍ଦ୍ଦେଶ ଦେଇଥିଲେ। ସେ କାର୍ଯ୍ୟଭାର ଗ୍ରହଣ କରିବା ଦିନ ଠାରୁ ଏବଂ ୨୦୨୪ ଅଗଷ୍ଟ ୩୧ରେ ଅବସର ଗ୍ରହଣ ତାରିଖ ପର୍ଯ୍ୟନ୍ତ କିମ୍ବା ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଏହି ନିର୍ଦ୍ଦେଶ ବଳବତ୍ତର ରହିବ। ଗୃହ ମନ୍ତ୍ରଣାଳୟ ମଧ୍ୟ ଏନଡିଆରଏଫର ମହାନିର୍ଦ୍ଦେଶକ ପଦରୁ ପ୍ରଧାନଙ୍କୁ ତୁରନ୍ତ ମୁକ୍ତ କରିବାକୁ ଅନୁରୋଧ କରିଛି ଯାହା ଦ୍ୱାରା ସେ ନୂତନ ଦାୟିତ୍ୱ ଗ୍ରହଣ କରିବାରେ କୌଣସି ଅସୁବିଧାର ସମ୍ମୁଖୀନ ହେବେ ନାହିଁ।