ଦେଶ- ବିଦେଶ
ରିଜର୍ଭ ବ୍ୟାଙ୍କରେ ପ୍ରଥମ ଓଡ଼ିଆ ଗଭର୍ଣ୍ଣର
ନୂଆଦିଲ୍ଲୀ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଗଭର୍ଣ୍ଣର ଉର୍ଜିତ ପଟେଲ ଅଚାନକ ନିଜ ପଦରୁ ଇସ୍ତଫା ଦେବାପରେ ଓଡ଼ିଆ ଆଇଏଏସ୍ ଶକ୍ତିକାନ୍ତ ଦାସଙ୍କୁ ଏହି ପଦବୀରେ ନିଯୁକ୍ତି ଦିଆଯାଇଛି। ସର୍ବୋଚ୍ଚ ବ୍ୟାଙ୍କର ଶୀର୍ଷ ଦାୟିତ୍ୱ ନେବାରେ ଶକ୍ତିକାନ୍ତ ପ୍ରଥମ ଓଡ଼ିଆ। ସେ ଆଗାମୀ ୩ ବର୍ଷ ଯାଏ ଏହି ଦାୟିତ୍ୱ ତୁଲାଇବେ।
୨୦୧୫ରୁ ୨୦୧୭ ମସିହାଯାଏ ଅର୍ଥନୀତିକ ବ୍ୟାପାର ସଚିବ ଦାୟିତ୍ୱ ତୁଲାଇଥିବା ଶ୍ରୀ ଦାସ ବର୍ତ୍ତମାନ ଅର୍ଥ କମିଶନ୍ର ସଦସ୍ୟଭାବେ କାର୍ୟ୍ୟ କରୁଛନ୍ତି। ତାଙ୍କର କାର୍ୟ୍ୟଦକ୍ଷତା ଏବଂ ଦୂରଦୃଷ୍ଟି କୁ ସମ୍ମାନ ଜଣାଇ କେନ୍ଦ୍ର ସରକାର ତାଙ୍କୁ ଏହି ଦାୟିତ୍ୱ ପ୍ରଦାନ କରିଛନ୍ତି। ୨୦୧୪ ଜୁନ୍ ୧୬ରେ ତାଙ୍କୁ ପ୍ରଥମେ ଅର୍ଥ ମନ୍ତ୍ରଣାଳୟ ଅଧୀନରେ ଥିବା ରାଜସ୍ୱ ବିଭାଗର ଦାୟିତ୍ୱ ଦିଆଯାଇଥିଲା।
୨୦୧୬ ମସିହାରେ ନୋଟ୍ବନ୍ଦୀ ନିଷ୍ପତ୍ତି ଲାଗୁ ହୋବାରେ ସେ ପ୍ରମୁଖ ଭୂମିକା ଗ୍ରହଣ କରିଥିଲେ। ନୋଟ୍ବନ୍ଦୀର ସଫଳତାକୁ ନେଇ ପ୍ରଶ୍ନ ଉଠିବା ସମୟରେ ସେ ହିଁ ସରକାରଙ୍କ ପକ୍ଷ ରଖିଥିଲେ। ୧୯୮୦ ବ୍ୟାଚ୍ ତାମିଲନାଡ଼ୁ କ୍ୟାଡର୍ ଆଇଏଏସ୍ ଅଧିକାରୀ ଶକ୍ତିକାନ୍ତଙ୍କ ଘର ଓଡ଼ିଶାର ଭୁବନେଶ୍ୱର ସହରରେ। ସେ ୨୫ତମ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଗଭର୍ଣ୍ଣର ଭାବେ କାର୍ଯ୍ୟ କରିବେ। ଆଗକୁ ଛପା ହେବାକୁ ଥିବା ନୋଟ୍ରେ ପ୍ରଥମ ଥର ପାଇଁ ଜଣେ ଓଡ଼ିଆଙ୍କ ସ୍ୱାକ୍ଷର ରହିବ।