ଅମିତାଭ ବଚ୍ଚନ ବର୍ତ୍ତମାନ ‘କଲ୍କୀ ୨୮୯୮ ଏଡି’ ଫିଲ୍ମର ସଫଳତାକୁ ଉପଭୋଗ କରୁଛନ୍ତି। ୬୦୦ କୋଟି ଟଙ୍କା ବ୍ୟୟରେ ନିର୍ମିତ ଏହି ଫିଲ୍ମ ଘରୋଇ ବକ୍ସ ଅଫିସରେ ୬୩୨ କୋଟିରୁ ଅଧିକ ବ୍ୟବସାୟ କରିସାରିଲାଣି। ଅମିତାଭଙ୍କ ଅଶ୍ୱତ୍ଥମା ଭୂମିକା ଦର୍ଶକଙ୍କୁ ପଗଳ କରିଦେଇଛି। ତାଙ୍କ ଦମଦାର ସଂଳାପ ଫିଲ୍ମ ପ୍ରତି ଲୋକଙ୍କୁ ଆକୃଷ୍ଟ କରୁଛି। ବର୍ତ୍ତମାନ ଅମିତାଭ ଫିଲ୍ମ ‘ଫକ୍ତ୍ ପୁରୁଷୋ ମାତେ’ ମାଧ୍ୟମରେ ଦର୍ଶକଙ୍କୁ ମନୋରଞ୍ଜନ କରିବେ। ତାଙ୍କର ୫୫ ବର୍ଷର କ୍ୟାରିଅରରେ ଏହା ହେଉଛି ତାଙ୍କର ପ୍ରଥମ ଗୁଜୁରାଟୀ ଫିଲ୍ମ।
ନିର୍ମାତା ବର୍ତ୍ତମାନ ଏହାର ଟ୍ରେଲର୍ ରିଲିଜ୍ କରିଛନ୍ତି।ଟ୍ରେଲର୍ରୁ ଜଣାପଡିଛି ଯେ ପୁରୁଷୋତ୍ତମ (ଦର୍ଶନ ଜରିୱାଲା) ଶ୍ରାଦ୍ଧ ସମାରୋହରେ (ଅନ୍ତିମ ସଂସ୍କାର) ସମୟରେ ନାତି ବ୍ରିଜେଶଙ୍କ ବିବାହ ତାଙ୍କ ପିଲାଦିନର ପ୍ରେମୀକା ସହ ରୋକିବାକୁ ନିଜ ପରଲୋକରୁ ଫେରିଆସିଛନ୍ତି। ଏହା ବଂଶାନୁକ୍ରମିକ ପାର୍ଥକ୍ୟ, ପାରମ୍ପରିକ ଆଦର୍ଶ ଏବଂ ଆଧୁନିକତାକୁ ଚିତ୍ରଣ କରୁଥିବା ଏକ କାହାଣୀ।ଯାଦୁ ଶକ୍ତି ବ୍ୟବହାର କରି ପୁରୁଷୋତ୍ତମ ପରମ୍ପରା ଏବଂ ଆଧୁନିକତା ମଧ୍ୟରେ ଏକ ହାସ୍ୟାସ୍ପଦ ସଂଘର୍ଷ ସୃଷ୍ଟି କରନ୍ତି, କାରଣ ତାଙ୍କର ପୁରୁଣା ସିଦ୍ଧାନ୍ତଗୁଡ଼ିକ ତାଙ୍କ ନାତିର ସମକାଳୀନ ମୂଲ୍ୟବୋଧ ସହିତ ସଂଘର୍ଷ କରେ। ଏହାର ଇଣ୍ଟେରେଷ୍ଟିଙ୍ଗ ଭିଜୁଆଲ୍ ଏବଂ ସମ୍ମୋହକ କାହାଣୀ ଯୋଗୁଁ ଏହା ଇଣ୍ଡଷ୍ଟ୍ରିର ଚର୍ଚ୍ଚାର ବିଷୟ ହୋଇଛି।
ଏହି ଫିଲ୍ମ ୨୦୨୨ରେ ରିଲିଜ୍ ହୋଇଥିବା ‘ଫକ୍ତ୍ ମହିଳାଓ ମାତେ’ର ସିକ୍ୱେଲ୍। ଏହି ଟ୍ରେଲର୍ରେ ଅମିତାଭଙ୍କୁ ଦେଖି ପ୍ରଶଂସକମାନେ ବହୁତ ଉତ୍ସାହିତ ଅଛନ୍ତି। ଏହି ଫିଲ୍ମଟି ୨୩ ଅଗଷ୍ଟ ୨୦୨୪ ରେ ପ୍ରେକ୍ଷାଳୟକୁ ଆସିବାକୁ ପ୍ରସ୍ତୁତ। ଅମିତାଭଙ୍କ ବ୍ୟତୀତ ୟଶ୍ ସୋନି, ମିତ୍ରା ଗଡଭି, ଈଶା କଂସାରା ଏବଂ ଦର୍ଶନ ଜରିୱାଲାଙ୍କ ଭଳି ଗୁଜୁରଟୀ ତାରକା ଏହି ଫିଲ୍ମରେ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ। ଜୟ ବୋଡସ୍ ଓ ପାର୍ଥ ତ୍ରିବେଦୀ ଏହି ଚଳଚ୍ଚିତ୍ରର ମିଳିତ ନିର୍ଦ୍ଦେଶନା ଦେଇଛନ୍ତି। ଏହି ଚଳଚ୍ଚିତ୍ରର କାହାଣୀକୁ ମଧ୍ୟ ସେମାନେ ଲେଖିଛନ୍ତି। ଏହାକୁ ନିର୍ମାଣ କରିଛନ୍ତି ଆନନ୍ଦ ପଣ୍ଡିତ ଓ ବୈଶାଲ୍ ଶାହ।
