ଅଭିନେତା ଶାହାରୁଖ ଖାନ ୨ ନଭେମ୍ବର ୧୯୬୫ ଦିଲ୍ଲୀରେ ଜନ୍ମଗ୍ରହଣ କରିଥିଲେ । ୫୯ ବର୍ଷରେ ବଲିଉଡ୍ ବାଦଶାହ । ଆଜି ୫୯ ବର୍ଷରେ ପାଦ ଥାପିଛନ୍ତି ବଲିଉଡ୍ ବାଦଶାହା ଶାହାରୁଖ ଖାନ୍ । ଭାରାତୀୟ ସିନେ ଜଗତର ଜଣେ ପ୍ରଖ୍ୟାତ ଅଭିନେତା ଓ ପ୍ରଯୋଜକ । ୧୯୮୯ ମସିହାରେ ସିରିୟଲ ଫୌଜୀରୁ ନିଜର କ୍ୟାରିୟର ଆରମ୍ଭ କରିଥିଲେ ଶାହାରୁଖ । ଅଭିନେତା ଶାହାରୁଖ ଖାନଙ୍କୁ ଅନେକ ନାମରେ ଡାକନ୍ତି, ଯେପରି କିଙ୍ଗ ଖାନ୍, ରେମାନ୍ସ କିଙ୍ଗ, ଡନ୍, ବାଜିଗର ଏବଂ ବାଦଶାହ । କିନ୍ତୁ ପ୍ରକୃତରେ ସୁପରଷ୍ଟାରଙ୍କ ନାମ ହେଉଛି ଅବଦୁଲ ରେହମାନ ।
୧୯୯୨ ମସିହାରେ ଦିୱାନା ଚଳଚ୍ଚିତ୍ର ଜରିଆରେ ବଲିଉଡରେ ପ୍ରବେଶ କଲେ । ଶାହରୁଖଙ୍କ ଅଭିନୀତ ଚଳଚ୍ଚିତ୍ର ମଧ୍ୟରୁ ଡର, ବାଜିଗର, ଅଞ୍ଜାମ, ରାଜୁ ବନଗୟା ଜେଣ୍ଟଲ ମ୍ୟାନ, କରନ-ଅର୍ଜୁନ, କୋଇଲା, ପରଦେଶ, ଦିଲ ତୋ ପାଗଲ ହେ, ବାଦଶାହ, ହେ ରାମ, ଦିଲାୱାଲେ ଦୁଲହନିୟା ଲେ ଜାଏଙ୍ଗେ, କୁଛ କୁଛ ହୋତା ହେ ଅନେକ ଜନାଦୃତି ଲାଭ କରିଛି । ବର୍ତ୍ତମାନ ସୁଦ୍ଧା ଭାରତର ତଥା ବିଶ୍ବର ଜଣେ ଅପ୍ରତିଦ୍ବନ୍ଦୀ ଅଭିନେତା ଭାବେ ସ୍ଥିତି ବଜାୟ ରଖିଛନ୍ତି ଶାହାରୁଖ ।
ଭାରତୀୟ ସିନେ ଜଗତକୁ ତାଙ୍କର ଅବଦାନ ପାଇଁ ଭାରତ ସରକାରଙ୍କ ଦ୍ବାରା ପଦ୍ମଶ୍ରୀ ଉପାଧିରେ ସମ୍ମାନିତ ହୋଇଛନ୍ତି । ଲଣ୍ଡନର ପ୍ରସିଦ୍ଧ ମାଡାମ ଟୁଷଡ୍ ସଂଗ୍ରହାଳୟ ତଥା ବିଶ୍ବର ବିଭିନ୍ନ ସ୍ଥାନରେ ତାଙ୍କର ମହମ ପ୍ରତିମୂର୍ତ୍ତି ସ୍ଥାପନା କରାଯାଇଛି । ବିଶ୍ବ ଚଳଚ୍ଚିତ୍ର ଜଗତରେ ତାଙ୍କ ଅଦ୍ଭୁତପୂର୍ବ ପ୍ରଭାବ ପାଇଁ ତାଙ୍କୁ ନିକଟରେ ଆମେରିକାର ପ୍ରସିଦ୍ଧ ନିଉଜ୍-ଉଇକ୍ ପତ୍ରିକା ପୃଥିବୀର ପ୍ରଥମ ୫୦ ଜଣ ଶକ୍ତିଶାଳୀ ଲୋକଙ୍କ ଭିତରେ ସ୍ଥାନ ଦେଇଛି । ଆଜି ଜନ୍ମ ଦିନରେ ତାଙ୍କ ନିକଟକୁ ଛୁଟୁଛି ଶୁଭେଚ୍ଛାର ସୁଅ ।
