ଖାରବେଳ ସ୍ୱାଇଁଙ୍କୁ ଆକ୍ରମଣ, କ୍ରାଇମବ୍ରାଂଚ ତଦନ୍ତ ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ

ଭୁବନେଶ୍ୱର/ରାୟଗଡ଼ା(ଓଡବ୍ଲ୍ୟୁ): ଉକ୍ରଳ ଭାରତ ଅଧ୍ୟକ୍ଷ ତଥା ପୂର୍ବତନ ସାଂସଦ ଖାରବେଳ ସ୍ୱାଇଁଙ୍କୁ ରାୟଗଡ଼ା ଜିଲ୍ଲାର କାଶୀପୁରରେ ଆକ୍ରମଣ ହୋଇଛି।ଏହି ଘଟଣାକୁ ବିଭିନ୍ନ ମହଲରୁ ନିନ୍ଦା କରାଯାଇଥିବାବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର କ୍ରାଇମବ୍ରାଂଚ ତଦନ୍ତ ନିର୍ଦ୍ଦେଶ ଦେଇଛନ୍ତି । ଶ୍ରୀ ସ୍ୱାଇଁଙ୍କୁ ମାଡ଼ ମାରିଥିବା ଯୁବକ ସୁକାନ୍ତ କୁମାର ନାୟକକୁ ପୁଲିସ ଗିରଫ କରିଥିବାବେଳେ ଅନ୍ୟଜଣେ ଅଭିଯୁକ୍ତ କୃଷ୍ଣ କୁମାର ନାୟକ ଫେରାର ଅଛି।
ମିଳିଥିବା ସୂଚନା ଅନୁସାରେ ଶ୍ରୀ ସ୍ୱାଇଁ କାଶୀପୁର ବ୍ୟାଙ୍କ ଛକ ନିକଟରେ ଏକ ପଥପ୍ରାନ୍ତ ସଭା କରୁଥିବାବେଳେ କିଛି ଯୁବକ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ଜବରଦସ୍ତି ତାଙ୍କ ସଭାକୁ ବନ୍ଦ କରିଥିବାବେଳେ ସୁକାନ୍ତ ନାୟକ ନାମକ ଜଣେ ଯୁବକ ତାଙ୍କୁ ଚାପୁଡ଼ା ମାରିଥିଲେ।ଶ୍ରୀ ସ୍ୱାଇଁଙ୍କ ସମେତ ଉକ୍ରଳ ଭାରତର ବିଦ୍ୟାର୍ଥୀ ଶାଖା ସଭାପତି ପ୍ରତ୍ୟୁଷ ନାୟକଙ୍କୁ ମଧ୍ୟ ଆକ୍ରମଣ ହୋଇଛି।ଏହି ଘଟଣାକୁ ଖାରବେଳ ନିଜେ ସୋସିଆଲ ମିଡିଆରେ ଭାଇରାଲ କରିବା ପରେ ଗଣମାଧ୍ୟମରେ ଏହି ଖବର ପ୍ରସାରିତ ହୋଇଥିଲା।ତା’ପରେ ସମସ୍ତ ଦଳ ଘଟଣାକୁ ନିନ୍ଦା କରିଛନ୍ତି।ଖାରବେଳ ଏହି ଘଟଣାରେ ବିଜେଡି କର୍ମୀମାନେ ସମ୍ପୃକ୍ତ ବୋଲି ଅଭିଯୋଗ କରିଥିବାବେଳେ ବିଜେଡି ମୁଖପାତ୍ର ସସ୍ମିତ ପାତ୍ର ମଧ୍ୟ ଏହାକୁ ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କହିଛନ୍ତି।ବିଜେଡି ହିଂସାରେ ବିଶ୍ୱାସ କରେ ନାହିଁ। ଆକ୍ରମଣକାରୀକୁ ପୁଲିସ ଅଟକ ରଖିଛି।ଉଚିତ୍ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ।ତେବେ ଶ୍ରୀ ସ୍ୱାଇଁ ପ୍ରତ୍ୟେକ ବିଷୟକୁ ବିଜେଡି ଆଡ଼କୁ ଇଙ୍ଗିତ କରିବା ଅନୁଚିତ୍।ବିଜେପି ଏହାକୁ ନେଇ ଶସ୍ତା ରାଜନୀତି କରୁଛି ବୋଲି ଶ୍ରୀ ପାତ୍ର କହିଛନ୍ତି।
ତେବେ ମୁଖ୍ୟମନ୍ତ୍ରୀ ଏହି ଘଟଣାରେ ଉଦବେଗ ପ୍ରକାଶ କରିବା ସହ କାହିଁକି ଶ୍ରୀ ସ୍ୱାଇଁଙ୍କ ଉପରେ ବାରମ୍ବାର ଆକ୍ରମଣ ହେଉଛି ତା’ର କ୍ରାଇମବ୍ରାଂଚ ତଦନ୍ତ ନିମନ୍ତେ ନିର୍ଦ୍ଦେଶ ଦେଇଛନ୍ତି।ସେହିପରି ବିଜେପି ଉପସଭାପତି ସମୀର ମହାନ୍ତି କହିଛନ୍ତି ଯେ ରାଜନୀତିକ ପ୍ରତିପକ୍ଷକୁ ହିଂସାତ୍ମକ ଢଙ୍ଗରେ ବଳପ୍ରୟୋଗ କରି କଣ୍ଠରୋଧ କରିବା ଅତ୍ୟନ୍ତ ନିନ୍ଦନୀୟ ଘଟଣା।ସବୁ ସମୟରେ ଅହିଂସାର କଥା କହୁଥିବା ମୁଖ୍ୟମନ୍ତ୍ରୀ ହିଂସାକୁ ଆପଣେଇଛନ୍ତି।ବିଜୁ ଯୁବ ବାହିନୀ ଏଭଳି ହିଂସାତ୍ମକ କାର୍ଯ୍ୟରେ ଲିପ୍ତ ବୋଲି ବିଜେପି ଅଭିଯୋଗ କରିଛି।ସେହିପରି କଂଗ୍ରେସ ମଧ୍ୟ ଏହି ଘଟଣାକୁ ନିନ୍ଦା କରିବା ସହ ଆକ୍ରମଣକାରୀ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ପାଇଁ ଦାବି କରିଛି।