ରାଜ୍ୟ
ହାଇକୋର୍ଟ ପରିସରରେ ଓକିଲଙ୍କ ଧସ୍ତାଧସ୍ତି,ଦୁଇ ଫାଳ
କଟକ: ଓକିଲଙ୍କ ଆନ୍ଦୋଳନ ଆଜି ଭିନ୍ନମୋଡ଼ ନେଇଛି।ହାଇକୋର୍ଟ ବାର ଆସୋସିଏସନର ସଦସ୍ୟ ଥିବା ଓକିଲଙ୍କ ଦୁଇ ଗୋଷ୍ଠୀ ମଧ୍ୟରେ ଧସ୍ତାଧସ୍ତି ଯୋଗୁ ହାଇକୋର୍ଟ ପରିସରରେ ଉତେଜନାପୂର୍ଣ୍ଣ ପରିସ୍ଥିତି ସୃଷ୍ଟି ହୋଇଛି।ଓକିଲଙ୍କ ମଧ୍ୟରେ ଗଣ୍ଡଗୋଳକୁ ନେଇ ଥାନାରେ ୪ଟି ମାମଲା ରୁଜୁ ହୋଇଛି।
ସୂଚନା ଅନୁସାରେ ଓକିଲ ଦେବୀପ୍ରସାଦ ପଟ୍ଟନାୟକଙ୍କୁ ପୁଲିସ ମାଡ଼ ମାରିବା ପ୍ରତିବାଦରେ ଗତ ଦୁଇମାସ ଧରି ଓକିଲମାନେ କାର୍ଯ୍ୟବନ୍ଦ ଆନ୍ଦୋଳନ ଜାରି ରଖିଥିବାବେଳେ ଗତକାଲି ବିଜେଡି ଆଇନଜୀବୀନ ସାମ୍ମୁଖ୍ୟ ଏଥିରୁ ଓହରି ଯାଇଥିଲା।ଆଜି ବିଜେଡି ଆଇନଜୀବୀ ସାମ୍ମୁଖ୍ୟର ସଦସ୍ୟମାନେ କୋର୍ଟ କାର୍ଯ୍ୟରେ ଯୋଗ ଦେବାକୁ ଆସୁଥିବାବେଳେ ଅପରପକ୍ଷ ସେମାନଙ୍କୁ ବିରୋଧ କରିଥିଲା।ଏହି କାରଣରୁ ଉଭୟ ପକ୍ଷ ମଧ୍ୟରେ ଠେଲାପେଲା ହୋଇଥିଲା।ସୁରକ୍ଷାକୁ ଦୃଷ୍ଟିରେ ରଖି ହାଇକୋର୍ଟ ଗେଟ୍ ନିକଟରେ ୨୫ ପ୍ଲାଟୁନ୍ ପୁଲିସ ଫୋର୍ସ ମୁତୟନ କରାଯାଇଛି।କଟକରେ ଓକିଲଙ୍କୁ ପୁଲିସ ମାଡ଼ ଘଟଣାରେ ସମସ୍ତ ଅଭିଯୁକ୍ତ ଗିରଫ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଗୋଟିଏ ଗୋଷ୍ଠୀ କହିଛି।ବିଜେଡି ସମର୍ଥିତ ଓକିଲମାନେ ଆନ୍ଦୋଳନ ଯୋଗୁ ସାଧାରଣ ଲୋକ ହଇରାଣ ହେଉଥିବା ଦର୍ଶାଇ କୋର୍ଟ କାର୍ଯ୍ୟରେ ସହଯୋଗ କରିବାକୁ ପ୍ରତିଶ୍ରୁତିବଦ୍ଧ ବୋଲି କହିଛନ୍ତି।
ସେହିପରି ବାଲେଶ୍ୱର, ଭୁବନେଶ୍ୱର, ପୁରୀ, ମୟୂରଭଞ୍ଜ ଆଦି ଜିଲ୍ଲାରେ ଓକିଲଙ୍କ ଆନ୍ଦୋଳନ ତୀବ୍ରତର ହୋଇଛି।