ଟି-୨୦ ରାଙ୍କିଙ୍ଗରେ ଶୀର୍ଷ ସ୍ଥାନ ବଜାୟ ରଖିଲେ ଶେଫାଳି

ଦୁବାଇ: ଭାରତୀୟ ମହିଳା କ୍ରିକେଟ୍ ଟିମର ଓପନିଂ ବ୍ୟାଟ୍ସମ୍ୟାନ୍ ଶେଫାଳୀ ବର୍ମା ଟି-୨୦ ରାଙ୍କିଙ୍ଗରେ ଶୀର୍ଷ ସ୍ଥାନ ବଜାୟ ରଖିଛନ୍ତି। ସେହିପରି ନ୍ୟୁଜିଲ୍ୟାଣ୍ଡର ସୋଫି ଡିଭାଇନ୍ ଯୁଗ୍ମ ଭାବେ ଅଲରାଉଣ୍ଡର ତାଲିକାର ଏକ ନମ୍ବର ସ୍ଥାନରେ ରହିଛନ୍ତି। ଶେଫାଳୀ ୭୫୯ ରେଟିଂ ପଏଣ୍ଟ ସହ ପ୍ରଥମ ସ୍ଥାନରେ ରହିଥିବା ବେଳେ ଅଷ୍ଟ୍ରେଲିଆର ବେଥ୍ ମୁନୀ (୭୪୪) ଦ୍ୱିତୀୟ ଓ ଭାରତୀୟ ଟି-୨୦ ଦଳର ଭାଇସ୍ କ୍ୟାପଟେନ୍ ସ୍ମୃତି ମନ୍ଧାନା (୭୧୬) ତୃତୀୟ ସ୍ଥାନରେ ରହିଛନ୍ତି।
ଅଷ୍ଟ୍ରେଲିଆ ମେଗ୍ ଲାନିଙ୍ଗ୍ ୭୦୯ ପଏଣ୍ଟ ସହ ଚତୁର୍ଥ ଏବଂ ଡିଭାଇନ୍ ଗୋଟିଏ ସ୍ଥାନ ଉପରକୁ ଉଠି ୬୮୯ ପଏଣ୍ଟ ସହ ପଞ୍ଚମରେ ପହଞ୍ଚିଛନ୍ତି। ହୋଭରେ ଇଂଲଣ୍ଡ ବିପକ୍ଷ ତୃତୀୟ ଟି-୨୦ରେ ଡିଭାଇନ୍ ଉଭୟ ବ୍ୟାଟ୍ ଓ ବଲରେ ଭଲ ପ୍ରଦର୍ଶନ କରିଥିଲେ। ସେ ବ୍ୟାଟିଂରେ ୫୦ ରନ୍ କରିଥିବା ବେଳେ ବୋଲିଂରେ ୨ଟି ୱିକେଟ୍ ମଧ୍ୟ ନେଇଥିଲେ।
ଅଲରାଉଣ୍ଡର ତାଲିକାରେ ଭାରତର ଦୀପ୍ତି ଶର୍ମା, ଅଷ୍ଟ୍ରେଲିଆର ଏଲିସ୍ ପେରୀ ଓ ୱେଷ୍ଟଇଣ୍ଡିଜର ହାଲେ ମାଥ୍ୟୁସଙ୍କୁ ଗୋଟିଏ ଲେଖାଏ ସ୍ଥାନର ଫାଇଦା ହୋଇଛି। ଦୀପ୍ତି ଚତୁର୍ଥ, ପେରୀ ପଞ୍ଚମ ଓ ମାଥ୍ୟୁସ୍ ଷଷ୍ଠ ସ୍ଥାନକୁ ଉଠିଛନ୍ତି। ଅଲରାଉଣ୍ଡର ତାଲିକାରେ ଇଂଲଣ୍ଡର ନାଟାଲୀ ସ୍କିଭର୍ ପ୍ରଥମ, କିୱି ଟିମର ଡିଭାଇନ୍ ଦ୍ୱିତୀୟ ଓ ସ୍କଟଲ୍ୟାଣ୍ଡର କ୍ୟାଥରିନ୍ ବ୍ରାଇସ୍ ତୃତୀୟ ସ୍ଥାନରେ ଅଛନ୍ତି।
ବୋଲରଙ୍କ ରାଙ୍କିଙ୍ଗରେ ଭାରତର ଦୀପ୍ତି ଗୋଟିଏ ସ୍ଥାନ ଉପରକୁ ଉଠି ଷଷ୍ଠରେ ପହଞ୍ଚିଛନ୍ତି। ସେହିପରି ଲେଗ୍ ସ୍ପିନର ପୁନମ ଯାଦବ ଅଷ୍ଟମ ସ୍ଥାନରେ ସୁରକ୍ଷିତ ରହିଛନ୍ତି। ବୋଲିଂ ରାଙ୍କିଙ୍ଗରେ ଇଂଲଣ୍ଡର ସୋଫି ଇକ୍ଲେଷ୍ଟୋନ୍ ପ୍ରଥମ ସ୍ଥାନରେ ରହିଥିବା ବେଳେ ଅଷ୍ଟ୍ରେଲିଆର ମେଗାନ୍ ସ୍କଟ୍ ଦ୍ୱିତୀୟ ଓ ଇଂଲଣ୍ଡର ସାରା ଗ୍ଲେନ୍ ତୃତୀୟ ସ୍ଥାନରେ ରହିଛନ୍ତି।