ରାଜ୍ୟ
ପହିଲାରୁ ରାତିରେ ଖୋଲା ରହିବ ଆହାର କେନ୍ଦ୍ର
ଭୁବନେଶ୍ୱର(ଓଡବ୍ଲ୍ୟୁ):୨୦୧୯ ଜାନୁଆରୀ ପହିଲାରୁ ରାଜ୍ୟର ସମସ୍ତ ଡାକ୍ତରଖାନା ପରିସରରେ ଥିବା ଆହାର କେନ୍ଦ୍ରରେ ରାତିବେଳରେ ବି ୫ଟଙ୍କିଆ ଖାଦ୍ୟ ମିଳିବ।ସେହିପରି ଜାନୁଆରୀ ୨୬ ତାରିଖରୁ ରାଜ୍ୟର ସମସ୍ତ ୧୦୮ଟି ପୌରାଞ୍ଚଳରେ ଆହାର କେନ୍ଦ୍ର ଖୋଲିବାକୁ ସରକାର ନିଷ୍ପତ୍ତି ନେଇଛନ୍ତି।
ମୁଖ୍ୟମନ୍ତ୍ରୀଙ୍କ ପକ୍ଷରୁ ଜାରି ଏକ ପ୍ରେସ ରିଲିଜରେ କୁହାଯାଇଛି ଯେ, ସଚିବାଳୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଆହାର ଯୋଜନା ସମ୍ପର୍କରେ ଏତ ତର୍ଜମା ବୈଠକ ଅନୁଷ୍ଠିତ ହୋଇଥିଲା।ଏହି ବୈଠକରେ ମୁଖ୍ୟମନ୍ତ୍ରୀ ଆହାର କେନ୍ଦ୍ରଗୁଡ଼ିକରେ ଜନସାଧାରଣଙ୍କ ଭାଗିଦାରୀ ଉପରେ ଗୁରୁତ୍ଵାରୋପ ଜାରି କରିଥିଲେ।ଏବେ ରାଜ୍ୟର ୭୬ଟି ପୌରାଞ୍ଚଳରେ ଆହାର କେନ୍ଦ୍ର ଉପଲବ୍ଧ ରହିଛି। ଏ ଭିତରୁ ୫୪ ପୌରାଞ୍ଚଳରେ ଆହାର କେନ୍ଦ୍ର ଡାକ୍ତରଖାନା ନିକଟରେ ଖୋଲାଯାଇଛି। ରୋଗୀଙ୍କ ସମ୍ପର୍କୀଙ୍କ ସୁବିଧା ସକାଶେ ରାଜ୍ୟ ସରକାର ଏହିସବୁ କେନ୍ଦ୍ରରେ ରାତିବେଳା ଆହାର ଯୋଗାଣ ବ୍ୟବସ୍ଥା କରିବେ। ଏହାସହିତ ଯେଉଁମାନେ ଚାହିଁବେ ଏଣିକି ଆହାର କେନ୍ଦ୍ରକୁ ଦାନ ଦେଇପାରିବେ। ଏହି ଦାନ ପାଇଁ ଆୟକର ରିହାତି ମିଳିବ। ଅନ୍ଲାଇନ୍ ମାଧ୍ୟମରେ ଏହି ଦାନ ଗ୍ରହଣ କରାଯିବ।ବିଶେଷ ଉତ୍ସବ ଯେମିତି ଜନ୍ମଦିନ, ବିବାହ ବାର୍ଷିକୀ, ଶ୍ରାଦ୍ଧ ଉତ୍ସବ ଆଦି ଅବସରରେ ଜନସାଧାରଣ ଗରିବ ଲୋକଙ୍କ ଉଦ୍ଦେଶ୍ୟରେ ଆହାର କେନ୍ଦ୍ରରେ ଖାଦ୍ୟ ପାଇଁ ଅର୍ଥ ଯୋଗାଇପାରିବେ ବୋଲି କୁହାଯାଇଛି।