ମୁମ୍ବାଇ: ଶାହିଦ କପୁରଙ୍କ ବହୁ ପ୍ରତୀକ୍ଷିତ ଫିଲ୍ମ ‘କବୀର୍ ସିଂହ’ ତିନି ଦିନରେ ୭୦ କୋଟିରୁ ଅଧିକ ଆୟ କରିସାରିଲାଣି। ପ୍ରଥମ ଦିନରେ ହିଁ ଏହା ବକ୍ସ ଅଫିସ୍ରେ ହଇଚଇ ସୃଷ୍ଟି କରିଦେଇଥିଲା। ଫିଲ୍ମଟି ପ୍ରଥମ ଦିନରେ ୨୦.୨୧ କୋଟି ଟଙ୍କା ଆୟ କରି ରେକର୍ଡ଼ କରିଛି। ଦ୍ୱିତୀୟ ଦିନରେ ଏହା ୨୨.୭୧ କୋଟି ଓ ତୃତୀୟ ଦିନରେ ଏହା ୨୭.୨୯ କୋଟି ଆୟ କରିଛି।ଫିଲ୍ମଟିକୁ ଦର୍ଶକଙ୍କର ଭଲ ପ୍ରତିକ୍ରିୟା ମିଳିଛି।
‘କବୀର୍ ସିଂହ’ ଶାହିଦ କପୁରଙ୍କ କ୍ୟାରିୟରର ସବୁଠୁ ବଡ଼ ଓପନର ଫିଲ୍ମ ସାବ୍ୟସ୍ତ ହୋଇଛି। ଏହା ପୂର୍ବରୁ ଏହି ରେକର୍ଡ଼ ‘ପଦ୍ମାବତ୍’ ନାଁରେ ଥିଲା। ଏହି ଫିଲ୍ମ ପ୍ରଥମ ଦିନରେ ୧୯ କୋଟିର ବିଜନେସ କରିଥିଲା। ଫିଲ୍ମରେ ଶାହିଦ୍ ରାଣୀ ପଦ୍ମାବତୀଙ୍କ ସ୍ୱାମୀ ରାଜା ରାୱଲ ରତନ ସିଂହଙ୍କ ଭୂମିକାରେ ଅଭିନୟ କରିଥିଲେ।‘କବୀର ସିଂହ’ ପ୍ରଥମ ଦିନରେ ୨୦.୨୧ କୋଟି ଟଙ୍କା ଆୟ କରି ୨୦୧୯ର ଏବେ ପର୍ଯ୍ୟନ୍ତ ଚତୁର୍ଥ ବଡ଼ ଓପନର ଫିଲ୍ମ ହୋଇଯାଇଛି। ସଲମାନଙ୍କ ‘ଭାରତ୍’ ୪୨.୩୦ କୋଟି ଆୟ କରି ପ୍ରଥମ ସ୍ଥାନରେ ରହିଛି। ଦ୍ୱିତୀୟ ନମ୍ବରରେ ୨୧.୬୦ କୋଟି ଟଙ୍କା ଆୟ କରି ଫିଲ୍ମ ‘କଲଙ୍କ’ ରହିଥିବାବେଳେ ଅକ୍ଷୟଙ୍କ ‘କେଶରୀ’ ୨୧.୦୬ କୋଟି ଆୟ କରି ତୃତୀୟ ସ୍ଥାନରେ ରହିଛି।
ପ୍ରେମ, ବିଚ୍ଛେଦ ଏବଂ ବର୍ବାଦ୍କୁ ନେଇ ତିଆରି ହୋଇଥିବା ଏହି ଫିଲ୍ମରେ ଶାହିଦ୍ କପୁର୍ଙ୍କୁ ଏକ ଭିନ୍ନ ଅନ୍ଦାଜରେ ଦେଖିବାକୁ ମିଳିଛି। ଫିଲ୍ମରେ ଶାହିଦଙ୍କ ଲୁକ୍ ଓ ଅନ୍ଦାଜ ଦର୍ଶକଙ୍କୁ ବେଶ୍ ପସନ୍ଦ ଆସିଛି। ଫିଲ୍ମର ନିର୍ଦ୍ଦେଶନା ଦେଇଛନ୍ତି ସନ୍ଦିପ ବାଙ୍ଗା।
