ଭୁବନେଶ୍ୱର : ଜିଲ୍ଲାପାଳଙ୍କ ରିପୋର୍ଟ ଆଧାରରେ ୩୦ତାରିଖ ସୁଦ୍ଧା ମରୁଡ଼ି ପ୍ୟାକେଜ୍ ଘୋଷଣା ହେବ ବୋଲି ରାଜସ୍ୱ ମନ୍ତ୍ରୀ ମହେଶ୍ୱର ମହାନ୍ତି କହିବାର ୨୪ଘଂଟା ନପୁରୁଣୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ମରୁଡ଼ି ପ୍ରଭାବିତ ଅଂଚଳ ପାଇଁ ସ୍ୱତନ୍ତ୍ର ପ୍ୟାକେଜ୍ ଘୋଷଣା କରିଛନ୍ତି । ବିଜେପୁର ଉପନିର୍ବାଚନ ଆଚରଣ ବିଧି ଲାଗୁ ହେବା ଆଶଙ୍କାରେ ରାଜ୍ୟ ସରକାର ନିର୍ଦ୍ଧାରିତ ସମୟ ପୂର୍ବରୁ ଏହି ମରୁଡ଼ି ପ୍ୟାକେଜ୍ ଘୋଷଣା କରିଛନ୍ତି । ସୂଚନା ଅନୁସାରେ ରାଜ୍ୟର ୧୫ଟି ଜିଲ୍ଲାର ୭୦ଟି ବ୍ଲକ୍ର ୧୧୨୫ଟି ପଂଚାୟତର ୬୦୧୫ଟି ଗାଁ ମରୁଡ଼ିରେ ପ୍ରଭାବିତ । ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଏହି ମରୁଡ଼ି ଅଂଚଳ ପାଇଁ ସ୍ୱତନ୍ତ୍ର ପ୍ୟାକେଜ୍ ଘୋଷଣା କରି କହିଛନ୍ତି ଯେ ୩୩ ପ୍ରତିଶତ ଫସଲ ହାନି ହୋଇଥିବା ଅଣଜଳସେଚିତ ଅଂଚଳର କ୍ଷୁଦ୍ର ଓ ମଧ୍ୟମ ଚାଷୀଙ୍କୁ ହେକ୍ଟର ପିଛା ୬୮୦୦ଟଙ୍କା ଓ ଜଳସେଚନ ସୁବିଧା ଥିବା ଅଂଚଳରେ ଫସଲ ହାନି ପାଇଁ ହେକ୍ଟର ପିଛା ୧୩,୫୦୦ଟଙ୍କା କ୍ଷତିପୂରଣ ଦିଆଯିବ । ମରୁଡ଼ି ଗ୍ରସ୍ତ ଅଂଚଳରେ ଜଳକର ଆଦାୟ ସମ୍ପୂର୍ଣ୍ଣ ଛାଡ୍ କରାଯିବ । ତେବେ ରାଜସ୍ୱ କର ଏବର୍ଷ ଆଦାୟ ନକରାଯାଇ ଆସନ୍ତାବର୍ଷ ବିନା ସୁଧରେ ଚାଷୀଙ୍କଠାରୁ ଆଦାୟ ହେବ । ସେହିପରି ମରୁଡ଼ି ଅଂଚଳର ସମସ୍ତ ସରକାରୀ,ଅନୁଦାନପ୍ରାପ୍ତ ଓ ଅଣ ଅନୁଦାନପ୍ରାପ୍ତ ସ୍କୁଲରେ ପଢ଼ୁଥିବା ପିଲାଙ୍କ ଟ୍ୟୁସ୍ନ ଫି ଛାଡ଼ କରାଯିବ । ଏହା ସହିତ ମରୁଡ଼ି ଅଂଚଳରେ ଅଧିକ ୫୦ଦିନର କାର୍ଯ୍ୟ ମନରେଗା ଯୋଜନାରେ ଯୋଗାଇ ଦିଆଯିବ । ଖରିଫରେ କ୍ଷତିଗ୍ରସ୍ତ ଚାଷୀଙ୍କୁ ରବି ସହାୟତା ମିଳିବ । କ୍ଷତିଗ୍ରସ୍ତ ଅଚଳରେ ରବି ଋତୁରେ ୧.୨୫ଲକ୍ଷ ଡାଲି ଜାତୀୟ ବିହନର ମିନିକିଟ୍ ପ୍ରଦାନ କରାଯିବ । ୫୦ହଜାର ତୈଳବୀଜ ଓ ୨୫ହଜାର ପନିପରିବା କିଟ୍ ବଂଟନ କରାଯିବ । ଚାଷୀଙ୍କୁ ୫୦ ପ୍ରତିଶତ ରିହାତିରେ ୫ହଜାର ପାଣି ପମ୍ପ ସେଟ୍ ଯୋଗାଇ ଦିଆଯିବ । ଚାଷୀଙ୍କ ଫସଲ ଋଣକୁ ଦୀର୍ଘମିଆଦୀ ଯୋଜନାରେ ପରିବର୍ତନ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।
